Ke Kumu Hawaii, Volume I, Number 24, 25 November 1835 — Page 190

190 KUMU HAWAII. (NO VEMABA,

10 A o oe, no ke aha la e hoahewa nei oe i kou hoahanau? A o oe hoi, no ke aha la e hoowahawaha nei oe i kou hoahanau? No ka mea e ku no kakou a pau imua o ka noho lunakanawai o Kristo.

11 No ka mea, ua palapalaia, Me au e ola nei, wahi a ka Haku, e pau na kuli i ke kukuli ia'u, e pau hoi na elelo i ka hoike i ke Akua.

12 Nolaila hoi, e hoike aku no kela mea keia mea o kakou a pau nona iho i ke Akua.

13 No ia hoi, mai noho kakou a hoahewa hou aku kekahi i kekahi, aka e manao oukou me neia aole e waiho i ka mea e hina ai, aole hoi i ka mea e hihia ai imua o ka hoahanau.

14 Ua ike au, a ua hoomaopopoia au e ka Haku, e Iesu, aohe mea i haumia ma ona wale iho, aka ina manao kekahi ua haumia kekahi mea, haumia no ia nona.

15 Ina ua ehaeha kou hoahanau, no ka ai, aole ma ke aloha kou hele ana, mai hanamake oe me kau ai, i ka mea nona i make ai o Kristo.

16 No ia mea, e ao oukou o olelo ino ia ko oukou pono.

17 No ka mea, aole ka ai a me ka mea inu ke aupuni o ke Akua, aka o ka pono, a me ke kuikahi, a me ka olioli i ka Uhane Hemolele.

18 No ka mea, o ka mea i malama ia Kristo ma ia mau mea, ua oluolu ke Akua ia ia, a ua pono hoi ia i kanaka.

19 No ia hoi, e hahai kakou i na mea e kuikahi ai, a me na mea e kukulu ai kekahi i kekahi.

20 Mai hoohiolo oe i ka hana a ke Akua no ka ai. He maemae na mea ai a pau. Aka he mea ia e ino ai ke kanaka kee ai me ka hihia.

21 He mea pono ke ai ole i ka io, a me ka inu ole i ka waina, a me ka hana i ka mea e e hina ai kou hoahanau, a e hihia ai, a e nawaliwali ai.

22 He manaoio anei kou? E malama oe ia iloko ou iho imua o ke Akua. Pomaikai ke kanaka i hoohewa ole ia ia iho ma ka mea ana i ae aku ai.

23 O ka mea kanalua, e hoahewaia ia ke ai ia, no ka mea, aole no ka manaoio ia. A o na mea a pau aole no ka manaoio, he hewa ia.

KA HOOMOAKAKA ANA.

Mok. xiv: 8 I ko kakou ola ana i keia ao, he pono ke noho mamuli o ka Haku, a e hana i kona makemake. A i make ke kino, a noho uhane aku kakou, he pono ke noho aku ko kakou mau uhane mamuli o Iesu, me ka hana aku i kona makemake. E lilo loa kakou ia ia i keia ao, a e lilo mau nona i keia ae pau ole.

9 Lawe iho la o Iesu i kino kanaka, a make, a ola hou i Mesia ia, i Haku no na kanaka ma keia noho ana, a me kela noho ana mahope o ka make.

10 No ke aha la e hoahewa ai a e hoowahawaha ai kekahi i kona hoahanau nawaliwali? Ina manao ia aole e pono ke ai i ka mea hoolaa aku i ke kii, aole kakou e pono ke hoahewa ia ia malaila. E hai aku oia nona iho ia Kristo, a e hai aku hoi kakou ia ia i ka kakou hana ana, i kona wa e noho ai ma ka noho lunakanawai e hoopai i na kanaka a pau.

11 Ua hoohiki ke Akua ia ia iho, a ua palapalaia ma Isaia 45: 23. Me au e ola nei, wahi a ka Haku, e pau na kuli i ke kukuli ia'u, a e pau hoi na elelo i ka hoike mai i ke Akua.

O ke ano keia e hooiaio na kanaka a pau i ko Iehova alii ana, a e hoike i ka lakou hana ana imua o ia Lunakanawai no lakou a pau.

12 E ku no kakou i mua o ka noho lunakanawai o Kristo, me ka hoike aku i ke Akua i ka kakou hana ana, i ka la nui o ka Haku.

13 Nolaila aole e hoahewa hou aku kekahi o kakou i kekahi, no ka manao ana i ka io, a me na la, nolaila mai hoahewa hewa aku i ka hoahanau, no ka mea, e hai aku oia i kana i ke Akua, a e hai aku kakou kekahi, i ka kakou hana ana ia ia, a ina hewa kakou, e huhu mai no ka Haku.

Aka e hoomaopopo loa i ko oukou manao aole loa e hana i ka mea e hina ai ka hoahanau.

14 Ua hoomaopopo loa ia o Paulo e ka Haku aohe haumia maoli keia mea ai kela mea ai ke manao ole ke kanaka he haumai; aka ina manao ke kanaka i kekahi mea ai he haumia, he haumia io na ia nona. Ina e ai oia pela, hewa no ia.

15 Ina ua ehaeha ka naau o kou hoahanau no kou ai ana i ka io ana i manao ai ua haumia, aole no i hana lokomaikai oe ia ia, mai hana oe i ka mea e poino ai a e make ai ka haumana a Iesu i kuai ai me kona koko iho. E noonoo i ko Iesu aloha ia ia.

16 Ua kaawale oukou, aole e kaumaha hou i kela mau kapu kahiko no ka ai, aka, e malama oukou o olelo ino ia keia pono o oukou, me he mea la e awaawa ai oukou.

17 He mea okoa ka ai, a me ka mea inu, he mea okoa ke aupuni o ke Akua. O ka hana pono, o ke kuikahi, o ka hauoli i ka Uhane o ke Akua, oia na mea nui a ka Haku i makemake ai iloko o kakou, aole o ka manao nui ana, a me ka hoopaapaa ana i ka mea ai i kapu mamua.

18 O ka mea i malama i ka pono, a me ke kuikahi, a i hauoli hoi i ka Uhane o ke Akua, mamuli o ka Iesu kauoha, oia ke kanaka i oluolu mai ai ke Akua, oia ke kanaka i pono imua o na kanaka naauao. E mahalo no lakou i kana hana pela.

19 Nolaila e imi pu kakou i na mea i kuikahi ai na hoahanau mamuli o ka Haku, i na mea hoi e ikaika ai a e oluolu ai e naauao ai kekahi i kekahi.

20 Na ke Akua i hana ka haumana a Iesu, me he hale la i kukuluia e ia -- 1 Kor. iii: 9. Epeso, ii: 21, -- iv: 16, mai alakai hewa ae ia ia ma kou ai ana, a me kou inu ana, a ma kau hoopaapaa ana i keia mau mea, mai alakai hewa ia ia o make ia ia oe.

Ua pau ke kapu ana o ka ai mamuli o ka oihana a Levi, aole haumia kekahi ai i keia manawa, ua maemae, he pono ka ai, aka ina e ai kekahi me ka hoohiliia aku i kekahi ua lilo ia ia i mea e ino

21 He mea pono ke waiho i ka mea e poino ni kou hoahanau, e waiho i ka io, e waiho i ka waina, e waiho i na hana a pau e hina ai, a e hihia ai, a e nawaliwali ai hoi kou hoahanau.

Ina i lilo ko kakou ai ana i ka io, a me ka inu ana i ka waina i mea e hele hewa ai ka hoahanau he pono no kakou e waiho; a pela hoi na hana e ae e hihia ai kekahi o poino ka hoahanau.

22 Ina ua maopopo kou manao he kapu ole ka io, e malama i kou manao maloko ou iho imua o ke Akua, malaila e hana'i oe iho. He pono ke hoohia ole i kekahi ma kau hana ana ma ke akea. Pomaikai ke kanaka ke hana ole oia i ka mea e hewa ai ia, ma na mea ana i manao ai he pono.

23. O ke kanaka kanalua, e manao ana he pono ole ke ai i kekahi mea, a ai no hoi me ka maopopo ole, ua hihia ia, a e lilo ia i ka hoahewaia, no ka mea aole mamuli o ka manaoio kana hana ana. Pela hoi na hana a pau loa, ina ua manao ke kanaka aole e pono ke hana, ua hihia hoi ia ke hana malaila.

HE MAU NINAU.

Mok. xiv, 8. I ko kakou ola ana i keia ao, pehea la e pono ai?

A mahope o ka make, pehea la e pono ai?

E hana i ke aha?

9 Make Iesu a ola hou i aha?

10 Ina makau kekahi i ka mea laa i

ke kii, pehea la ia?

E hai aku kakou ia wai?

I ka wa hea e hai ai?

11 Pehea la i olelo ai ka Haku no

na kanaka a pau?

Mahea kela pauku olelo?

Heaha ke ano o keia olelo?

12 E hoike kakou i ke aha? Ia wai?

Ahea?