Ke Kumu Hawaii, Volume II, Number 2, 20 January 1836 — Page 8
8 KUMU HAWAII. (IANUARI,
KAHI MELE.
KA LA HOOPAI.
He luaale!
E ia mai!
O ko Iehova la hoopai!
Ke hele mai Iesu;
Nauwewe ka honua nei;
Me na hekili nui mai
Ke kani o ka pu.
"Eia'e ka Lunakanawai,
"E ala pu, a hele mai,
"E ko ke ao a pau."
Haalulu mai la na ku e;
Hoolana no ka poe maikai,
Lulumi mai lakou.
O ko ka po, o ko ke kai.
Ko lalo o ka lepo nei,
E ku mai, me kakou;
Na lii, na kauwa, na lopa,
Hoike like pu ia la
I ke Akua mau.
Wehe na buka o ke ao,
Ua kakauia na hana a pau,
Malaila ka hoopai;
Poho na aia i ka po;
Pii na haipule i ke ao.
No Iesu e ola'i,
A i nele au e noho nei.
Auwe kuu make! kuu aie!
Hookahi no Mohai!
Ina o kuu inoa ke kau
Ma kona Buke ola mau!
Me e kuu pomaikai! H. B.
KA HOPENA O KA HALAWAI.
I ka manawa e pau ai ka hana, oia no ka pule hope loa. E kakali pono a oki loa ka pule ana, a me ka olelo hoakaka;---a lohe oukou i ka "amene,''---mai holo kiki mawaho me he holoholona hihiu la. Aka e hele malie a me ke kuoo, a me ka makaala. Mai walaau, mai wawa;---e noonoo no i ka olelo a oukou i lohe iho nei. Pela oukou e hana ai.
KA HAPA HOPE O KA LA SABATI.
Pehea ka hapa hope o ka la Sabati, ka hana mai ke awakea a hiki ka pau ana o ka la? Ua kapu anei? aole anei? Nawai i hoakaka mai i ke kapu ole? Nawai la? Aole na ke Akua; na ka poe hewa paha; ka poe molowa; ka poe makemake ma ka uhauha, a me ka lealea, a me ka hiamoe. He olelo wahahee ka! ka lakou, he hoopunipuni no; mai lohe iki malaila. Ua kapu no, ua laa; o ke ahiahi ua like ia me ke kakahiaka ;---ua laa loa.
NO KA HALAWAI AHIAHI.
O na halawai ahiahi, ua like hoi ia me na halawai kakahiaka; aole pono ke haalele a noho ma ka hale. O ka haalele ana i na halawai, he mea hou ia, a he mea ano e. Aole mea like ma na aina e. Ma Amerika ma ko makou aina ka aina naauao loa no ia, ua likelike pu ka halawai ahiahi me ka halawai kakahiaka; a i kekahi manawa, ua oi aku ka poe halawai ma ke ahiahi i ka poe halawai ma ke kakahiaka; no ka mea, noho kekahi poe ma kahi loihi, a nolaila, aole paha loaa ka halawai kakahiaka i kekahi manawa; a o ka halawai ahiahi ua loaa no. A o ka poe hele mai kahi loihi mai ma ke kakahiaka, noho lakou ma kahi e halawai ai a pau ka halawai ahiahi, alaila, hoi aku i ko lakou wahi. Aole lakou halawai ma ke kakahiaka wale no, a pau ua halawai la alaila hoi, aole pela. L. L.
NO KA MOLOWA.
Ke hoakaka aku nei au i ke ano o ka molowa. Aole pono ka molowa. Ina molowa ke kanaka pono ole kana noho ana. Ua like ia me ka ilio ka ike ole i kona naau, aole mahiai, aole imi i ka pono o ke kino; aole imi i ke ola o kona uhane. Lilo loa i mau wele i aihue. Eia kana hana ana: o ka maka aloalo a ike i ka ai kokolo, a aihue. O ka hana ia a ke kanaka molowa. He ike ole i ke ano o kona naau. K.W.
WAIOLI, Dek. 1835.
O KE ALOHA.
He mea ku i ke kanaka ke aloha aku i na makua a me na keiki a kakou. He mea pono ke aloha aku i na hoalauna. He mea maikai ke malama i na malihini. He mea lokomaikai ke haawi manawalea aku i ka poe hune a me ka poe nele. Aka, ke aloha aku i ko kakou poe enemi, ke hoomaikai aku hoi i ka poe hoino mai ia kakou, a me ka hana lokomaikai aku hoi i ka poe inaina mai ia kakou, me ke Akua no ia.
MARE.
Det. 12, 1835. Ua mareia ma Honolulu nei e Binamu, Mr. James Smith, no Ladana me Kamakaopiopio.
25. Ua mareia e Binamu, Mr. Bradley Bowers, no Bsetona, me Kamanu.
O na mea i mare ia e B. i ka makahiki 1835, 300 kane, 300 wahine,—600.
O na mea i mareia e ia i ka makahiki 1834,—47 kane, 47 wahine---94.
NO NA MOKU.
HOLO MAI.
Nov. 22, 1835. Holo mai ka moku o kohola, Thos. Williams, Allen, Setonitona, 28 1-2 mal. 1250 bar.
24. Canton, Gardner, Nu Bedefoda 13, 900.
"Awashonks, Jones, Falemouta, 23, 600.
25. Henrietta, Henderson, London, 24 1-2, 650.
Mariner, Coleman, Nanetuketa, 39, 2450.
29. Marcus, Sherman, F. Havena, 26, 1500.
Dek. 7. Fabius, Chase, Nanetuketa, 27, 800.
9. Merrimac, Pease, Nuburepota, 27,1200.
" Champion, Worth, Edegatona, 23,1300.
25. James, Freeling, Keen, Ladana.
28. Loriot, Nye, mai Sana Babara, o na ili bipi ka ukana.
30. Avon, Hinckley, mai Sana Babara, o na ili bipi, a me na lio ka ukana.
Jan. 4, 1836. Honduras, Dudoit, he ea ka ukana.
5. Clementina, Handley, mai Sana Babara, o na ili bipi a me na lio, ka ukana.
7. Chelsea, Beetle, Nu Ladana, 14, 600.
Dek. 11. Iolani.
14. Bolivar, Dominis,
16. Unity, Blinn,
HOLO AKU.
Nov. 28. Mariner, Coleman, i Nanetuketa.
Jan. 13, 1836. Maydacre, Lambert, i Bosetona.
RAIATEA. Ua pae mai ka leo mai Raatea mai, Ua kapu ka rama ma Raiatea a me Tahaa, a me Huahine: koe o Borabora wale no.
NOTICE.
NOTICE is hereby given, that the copartnership heretofore existing under the firm of FRENCH & CO., is this day dissolved by limitation. All persons having unsettled accounts with said firm, and the estate of the late John Ebbets, deceased, are requested to present them to the undersigned, who is authorised to adjust the same.
WILLIAM FRENCH,
The business will hereafter be continued by the subscriber.
WILLIAM FRENCH.
Honolulu, Jan. 1, 1836.