Ke Kumu Hawaii, Volume II, Number 4, 17 February 1836 — Page 15

1836.) KUMU HAWAII. 15

kona kaa, e me na lio a me kona poe koa a pau---aole lakou i pakele i ka make iloko o ke kai hohonu.
                Heaha ka kumu o kona make?
                O kona malama ole i ka Iehova kauoha.
                I mai la o Parao, "Owai la o Iehova i hoolohe ai au i kona leo?"
                E na kamalii, E hoolohe  oukou i ko Iehova leo.
 

KE KUMU HAWAII.
WENEDE, FEBERUARI 17, 1836.

                MAI AMERIKA MAI.---Holo mai ka moku o Joseph Peabody, Moore ke alii, mai Nu Ioaka mai, 15 mau la ka holo ana. Ua lawe mai ia i na pepa hoolahaike. Aole loaa ia makou ka palapala lima, hookahi wale no, na Henari Hila ka malama waiwai no na Luna misionari i kakau i ua palapala la ma ke kulanakauhale o Nu Ioaka, i ka la 31 o ka malama Augate, 1835.
                Eia kekahi olelo; A hala na hebedoma elua paha, alaila e holo aku mai Bosetona aku na makou elua i ko Hawaii pae aina, he kia lua kekahi, a o Dona Kuikote kekahi. Maluna o ia mau moku ua hooiliia na papa laau, a me kekahi ukana e ae no ka poe misionari e noho ana ilaila. Aole paha holo pololei ia mau moku, e ku paha mamua i kekahi awa ma ka aoao komohana o Amerika Hema. E hiki e mamua ka moku Joseph Peabody a ku i Hawaii i kekahi mau hebedoma paha.
                Eia kekahi: I hoomakaukau ana na Luna misionari no ka halawai makahiki o lakou ma Baletimoa, ua kokoke ka manawa, hookahi paha hebedoma a koe. Ia halawai ana e wae ae paha lakou i mea nana e pani ai ka hakahaka o Mika Wisena i make aku i ke alohaia.
 

                NO KA POE KAUWA HOOLUHI.---He aneane mokuhana ko Amerika Huipuia i keia wa, no ka manao ikaika o kekahi poe o hookuu koke i na negero kauwa hooluhi, a no ka hoopaa loa o kekahi poe ma ka hoohana ia lakou.
                Nui ka olelo, nui ka hoapaapaa; he hakaka kekahi, he wawahi hale kekahi, a he pepehi kanaka. He malu nae ka nui o ka aina i na kanawai.
 

                Ua ku aku ma Bosetona, Iulai 12, 1835, ka moku, Don Quixote, Paty, mai Hawaii, nei aku a Valeparaiso, a malaila aku a i Nu Ladana, a ia wahi aku i Bosetona.
 

                NO KA MAHlNA.---Ua oleloia, ua ike kekahi poe akamai i ka nana hoku, (o Herekela ma, ma Gudehope,) i na kanaka, a me na holoholona a me na manu, a me na laau, e me na luakini nani, ma ka mahina. Ia lakou ka ohenana nui loa, ka mea e hoike mai ai ia mau mea, he ano hou ka hooponopono ana.
                Pela ka olelo. Ua manao kekahi he olelo wahahee wale ia, a ua manao kekahi he olelo oiaio no. Mamuli ike pono paha kakou.
 

                KA MULIWAI I ELIIA MA DARIENA. Ua oleloia ma kekahi palapala no ka manao maopopo o kekahi alii Beritania, ka mea ia ia ko panalaau ma Nuzelani, e hana koke i ka muliwai i eliia no na waapa nui mai ka moana Atelanita mai a hiki ma ka moana Pakifika. He alii waiwai oia, ka mea paha e hiki ai ia ia; aole nae e maopopo. E kali kakou a lohe hou.
 

                MAI BERITANIA MAI. Ua ku iho nei, Feb. 4, ka moku, Columbia ka inoa, Darby ke alii, 150 mau la mai Ladana mai. Aole loheia he wahi manao nui hou ma keia moku. E holo ana ia ma ka muliwai o Kolumebia.
                Ua ee mai kekahi haole mahiai, a me kana wahine, e holo ana laua ma Kolumebia e noho malaila elima makahiki i ka mahiai.
                Eia no kekahi. Ua ee mai kekahi haole e ae, o Corney kona inoa, ma keia moku, a ua make aku ia ma ka moana, ua waiho aku kona kino i ka hohonu o ke kai;---a ua koe mai kana wahine a me na keiki eha. Ua ehaeha iho ka wahinekanemake, i ka make ana aku o kana kane. Ke noho iho nei ia ma Honolulu i neia manawa.
 

                HE MOKU MAHU.---Ua holo mai kekahi moku ahi, O Beaver ka inoa, mai Ladana mai, a ku iho nei ma Oahu nei, Feb, 4. A e holo aku ma ka muliwai o Kolumebia ilailae hooikaika ai ma ua muliwai la. Ma ka moana mai ua holo ia me ka pea, a hiki ia ma na muliwai la, alaila paha e waiho i ka pea a holo me ka mahu wela, pa aku ka mahu i ka huila, a kaa iho la, alaila holo ua moku mahu la.
 

                PAI HEWA.—Ma ka himeni no ka La hoopai, ma ka aoao awalu, aole pono ka luaale. Eia ka pono; "He luaole! Eia mai!"
                Ma ka aoao ahiku, no ka ekalesia ma Ewa, Aole pono "A o lakou a pau, he umikumamalua." Eia ka pono, "A o lakou a pau, ho umikumamawalu."
 

                HE UA. He nui no ka ua i keia mau la ma Oahu.
 

                MIKA LI. Holo aku ia ma Hilo, Feb. 3
 

NO KO KOHALA, MA HAWAII.
WAIMEA, IAN. 15, 1836.

                Aloha oukou, e na hoahanau. Eia keia wahi manao hoakaka o'u.
                Ma ka poaono iho nei, hele aku la au i Kohala. Ma ka wawae no ka hele ana. A puka aku la au i Nunulu kahi o ka luakini, maluhiluhi loa la wau; aole okana mai ka oopa.
                Lomi mai la kekahi me ko Hawaii nei, a maha iho la. A Sabati ae la akoakoa mai la kanaka ma ka luakini. Kinikini loa ka! ua lau, ua lau; elima a e ono paha lau. Kokoke piha ka hale pule; a he hale pule nui ko laila, me ko Honolulu paha. A ahiahi ma ka lua o ka halawai, nana aku la au, a kahaha iho la ka! he mea ano e keia, ua paapu ka hale i kanaka me ke kakahiaka. Ua pono. Akahi no a ikeia. Hai aku la au i ka olelo a ke Akua. Lohe kekahi, a lohe ole kekahi. A oki ka halawai, he haunaele wale no ko na kanaka he kulikuli la, he hihiu paha hoi, me he poe holoholona la. Aloha mai no nae kekahi i ke kumu.
                Kaumaha loa wau la, no ka manao ole ana o kanaka a me ko lakou lilo ana ma na mea lapuwale. Aloha ino ka poe naaupo. He malamalama la ko laila, a mau no nae ka pouli. No ke aha? no ke aha hoi? No ka makemake ole paha ea; nolaila paha kekahi. A no ke kumu ole paha kekahi? Ae; oia iho la no; aohe kumu, e noho pu ana me lakou. A pehea? aole anei lakou i makemake i kumu noho loa me lakou? Ae, o ko lakou makemake no ia. He ako hou la lakou i ko lakou hale pule;