Ke Kumu Hawaii, Volume II, Number 10, 11 May 1836 — Page 37

KE KUMU HAWAII.
HE PEPA HOIKEIKE I NA MEA E PONO AI KO HAWAII NEI.
"O ka pono ka mea e pomaikai ai ka lahuikanaka; aka, o ka hewa ka mea e hoinoia'i na aina."
Buke 2. HONOLULU, OAHU, MEI 11, 1836. Pepa 10.

                Ua paa kela i ka nui o kana olelo, ua hoowalewaleia oia e ka malimali o kona lehelehe. Ukali koke oia mahope ona, i like me ka hele ana o ka bipi i kona wahi e make ai, e like me ka naaupo hoi i ka hoopai ana i kona hewa. SOLOMONA vii: 21, 22.
 

O SAMESONA A ME DELILA.

                Hoomoe iho la o Delila ia Samesona ma kona uha, a hea aku la i ke kanaka a haawi ia ia e kahi i na wili ehiku o kona poo a hemo; o ka mua ia o kona hoopilikia ana ia ia, a lilo aku la kona ikaika, mai ona aku la.
                I mai ia, Maluna ou auanei ko Pilisetia, e Samesona. Ala ae la ia, mai kona hiamoe ana, i mai la, E hele au iwaho e like me na wa ma mua, e hooluliluli. Aole ia i ike, ua haalele o Iehova ia ia.
                Hoopaa iho la ko Pilisetia ia ia, poalo aku la i kona mau maka, a lawe ae la ia ia i Gaza, a hoopaa iho la ia ia i na kupee keleawe, a wili ae la ia iloko o ka halepaahao.
 

NO KA OLELO WAHAHEE.

                Eia kekahi hewa i pili i ko Hawaii nei mau kanaka, o ka olelo wahahee ana. E na makua a me na keiki, ua kauoha mai ke Akua penei. "E haalele oukou i ka wahahee, e olelo oiaio aku hoi na mea a pau i kona hoalauna". O ka mea olelo wahahee he ano ino kona, he pono ole; he kolohe.
                I ko ke Akua manao, ua like pu ka hewa o ka mea e olelo wahahee me ko ka mea pepehi kanaka a me ka ona rama a me ka malama kii. Ke i mai nei kana olelo," Aole hoi e komo aku iloko o ka lani kekahi mea haumia, aole he mea e noho ma ka hewa a me ka wahahee,
                Aka aia mawaho (mawaho o ka lani) na mea kolohe a me na pepehi kanaka a me ka poe hoomana kii, a me ka poe a pau i makemake a hana aku hoi i ka wahahee.''
                Eia kekahi olelo,"O ka poe wahahee a pau e loaa ia lakou ko lakou puu ma ka loko e aa mau loa ana i ke ahi a me ka luai pele."
                He hope weliweli ka hope o na mea olelo wahahee. E haalele i keia hewa nui e ko Hawaii nei; a e olelo oiaio aku kekahi i kekahi.
 

                Eia mau mea eono e inaina mai o Iehova. Ehiku hoi he hoopailua ia i kona naau. O na maka kiekie, o ka olelo wahahee, a me na lima hookahe koko---hala ola. O ka naau e imi ana i na manao kolohe, a me na wawae o holo kiki ana i ka hewa. O ka hoike hoopunipuni e hana ana i ka wahahee, A me ka pai i ka hakaka mawaena o na hoahanau.