Ke Kumu Hawaii, Volume II, Number 14, 6 July 1836 — Page 54

54 KUMU HAWAII. (IULAI,

                Ua mahuahua ka hana ma na kula keia makahiki. Ua makemake na kanaka i ka palapala. Nui ka poe makemake i ke Kumu Hawaii. Ua ao nui ia na kamalii mai Waihee a Waikapu--a ua loaa paha i kekahi poe ka naauao iki. Olioli makou i na kula kamalii, a ua paa ko makou manao e hana nui ma keia wahi, i pau koke paha ka pouli nui ma keia pae aina.
                5. No ka poe i mareia.
                Ua mareia e maua anei ma Wailuku a ma Maui hikina a pau 130.
                6. No ka hai ana i ka olelo a ke Akua.
                Ua hai aku maua i ka olelo a ka Haku ma Wailuku i kela Sabati i keia Sabati, aole haule kekahi Sabati i keia makahiki i hala aku nei. Pela i ka po ekolu, a me ka mahina hou. Ma Haiku kekahi, ua hai pinepine ia ka olelo i ka la Sabati, a ma Hamakua poko kekahi. I ka malama o Okatoba, hele kekahi o maua a puni ka aina, a hai pinepine aku i ka ka Haku olelo. A i keia mau la, hele o Batimea a puni ka aina, a kamailio nui me kanaka. Pela, ua nui ka poe ma Maui nei i lohe i ka olelo a ke Akua, i keia makahiki i hala aku nei.
 

NO KA EKALESIA.

                Aole hookolokoia kekahi ma keia ekalesia. Aka, aole pono paha ka noho ana o lakou a pau loa. I ko maua manao, nui ka hoomaloka, a me ka palaka a me ka molowa ma na ekalesia o Hawaii nei. Aole o makou pakele i keia mau mea ino. Eia no ka Haku o Iesu ma kahi kokoke me ka makemake e kokua mai ia makou aka, aole manao ka ekalesia e hookipa ia ia. Aloha ino ka poe hewa ka i komo iloko o ka ekalesia.
                I keia makahiki, ekolu kanaka wale no ka i komo iloko o ka ekalesia ma Wailuku nei. E na hoahanau, mai Hilo a Kauai, e pule oukou i ke Akua i ninini mai ia i ka Uhane Hemolele maluna o makou, i nui ka poe e huli i ka makahiki hou aku. Aloha oukou a pau loa.
Na maua, GELINA,
LIMAIKAIKA.
 

KANAWAI HOU NO MAUI.

                Auhea oukou o na makua a pau o na kamalii.
                Ke hai aku nei makou ia oukou i na mea nou, i mea e pono ai na kamalii a pau o ko kakou pae aina nei.
                1 Auhea oukou e na makua, e hoolohe mai oukou i keia kauoha, o na keiki a oukou i aha kona mau makahiki, ea, e hookomo oukou ia lakou iloko o ke kula a na kumu, ma kela wehi ma keia wahi, a me ke kulanui ma Lahainaluna, mai ana oukou.
                2 Aka, ina i aua oukou ia lakou, aole i hookomo i ke kula, eia ka pono, nana kumu a me na konohiki e nana pono ina he keiki, ua aha na makahiki a aua ia ai: e houkuia oia malaila.
                3 Eia ka pono, o ke kumu a me ke konohiki, na laua e hookolokolo i na makua o ua keiki la i aua ia ai i maopopo ai keia hewa o na makua, a e haawiia aku ua makua la i ke alii, a ma ke alii no e haawi aku i ka uku no keia hewa.
                4 Pela no e uku mau ai ia na makua aua keiki, aole i hookomo ia lakou i ke kula. Auhea oukou e na makua, mai aua hou oukou i na keiki, o pili mau keia hewa ia oukou.
                5 E kuu loa aku ia lakou ma ka ke kumu hana ana, ina malaila na keiki a oukou e hana ai, ua pomaikai.
                6 Eia kekahi, o kela makua o keia makua, e hoomaopopo i na keiki i ko lakou hoi ana mai ke kula mai, e kokua aku ia lakou ma na mea a ke kumu i kauoha mai ai ia lakou e hana.
                7 A ina i loaa ole ia lakou na mea e ao ai i ke kula, he Buke paha, o kela mea ao keia mea ao, na na makua e kuai, a e hoolimalima paha, i mea na lakou e ao ai, aka he keiki ua oo, nana no kahi e hoolimalima.
                8 Eia kekahi, mai makamae oukou e na makua ilihune, a me na makua waiwai, a me na makua koikoi, a me na makua alii, mai hoomau i keia hewa maluna o na keiki a oukou i keia manawa, o make lakou.
                9 Auhea oukou e na makua alii, mai aua i ka oukou mau keiki, o hele lakou mamuli o ko oukou noho wale me ke ao ole, a hiki i ko lakou wa e nui ai, naau po loa lakou, a ike ole i na hana e pono ai ka aina, a me ke aupuni.
                10 Nolaila, e haawi aku i na keiki a oukou i na kumu haole, a me na kumu kanaka maoli no hoi, ma Lahainaluna kekahi, a ma na kula e ae no hoi kekahi.
                11 Eia kekahi, mai hookamalani ia lakou, mai hoopunahele, mai hoohiwahiwa, o huli nui ko lakou manao malaila, a lilo lakou i poe ike ole i na mea e pono ai ka aina.
                12 Eia kekahi, o kela makua keia makua e haawi mai i na keiki a oukou, i na kumu a pau i hoonohoia ma keia pae aina, mai Hawaii a Kauai.
                13 Eia ka wa pono no na kamalii ke ao, o ka wa opiopio, oi palupalu ka manao, aole e pono lakou e waiho a umi no makahiki, a keu aku, o paakiki ka naau, e like me kanaka makua, ua oolea loa ko lakou naau.
                14 Nolaila, e ae mai kela makua keia makua, a me na makua alii, e hookomo i na keiki a lakou i ke kula, i kela la i keia la, mai ka poakahi a hiki i ka poalima, oia na la kula mai o a o no na kamalii.
                15 Eia kekahi, o na kumu i hounaia mai ke kula nui aku, aole lakou e hele e hana i na mea hana o ka aina, eia wale no kana hana o ke ao aku.
                A ina i manao ua kumu la, e lawe i mau hoalawe hana nona, e lawe no, i elua paha, a e hai aku i ke konohiki i kona mau hoa lawe hana.
                Eia wale no ka lakou hana e malama ai, o ke ao aku, aole e hele i ka hana o ka aina, a me ke auhau. No HOAPILI.
                Novemaba, 5, 1835.
 

LUKA 18: 11, 12.

                "Ku aku la ka Parisaio oia iho no, a pule aku la penei; E ke Akua ke aloha aku nei au ia oe, no ka mea, aole au e like me na kanaka e, ka poe hookaha, ka poe pono ole, ka poe moekolohe, aole hoi me keia lunaauhau. Elua ko'u hookeai ana i ka hebedoma hookahi, ua haawi hoi au i ka umi o ko'u waiwai a pau."
                Eia ka pule a ka Parisaio. He pule hookiekie no ia. Ua pono ua kanaka la i kona manao iho, a hoike aku oia i kona pono i ke Akua. Ua haipule oia ma ka waha wale no me ka hoapono ia ia iho. Ma kona pono iho kona hilinai ana, aole maluna o Iesu. O keia hilinai ana, he mea kupu wale mai no ia iloko o ka naau o na kanaka. He upena ia a ka diabolo e hoohei ai i na kanaka; nui na mea i paa a make ia ia.
                1. Pehea e lilo ai na kanaka i poe hilinai ma ko lakou pono iho?
                He mea kiekie loa ka naau kahiko. Ua mahalo ke kanaka mea naau kahiko ia ia iho, me ka manao nui i kona maikai. Nolaila i kona imi ana i ke ola, ua manao nui oia i kona hooikaika ana, me ka hilinai ma kona pono iho.
                2 Heaha ka hewa o keia hilinai ana? O ka hookiekie no ia, o ke ku e i ke Akua, o ka haalele ia Iesu.
                3 Heaha ka hope o keia hilinai ana? O ka make no ia; no ka mea, o Iesu wale no ka mea e ola'i. O na mea a pau i hilinai pono maluna ona e ola lakou. O na mea a pau i hilinai ma na mea e ae, ma ko lakou pono paha, ma ka ekelesia paha, ma ka pule ma ka hooikaika ana, e make auanei lakou, aole ola. No ka mea, ua haalele lakou ia Iesu.
                Eia kekahi manao. Ua nui ka poe kuhihewa. Hooikaika kino wale no kekahi poe, me ka manao e loaa mai ia lakou ke ola, aole ke i loaa; no ka mea, ua hilinai lakou ma ko lakou pono iho. E malama oukou o hilinai hewa oukou a make ka uhane
E. W. C.
 

SOLOMONA 14: 34.

                "Hookiekie ae la ka pono i ka lahuikanaka, ka hewa hoi ka mea hoowahawahaia'e na kanaka."
                I. Elua no ano nui o keia olelo. Eia ka mua, O ka pono ka mea ia e pono ai na aupuni o ka honua nei. Eia kekahi mau pono e pono ai na aupuni o ka honua nei.
                1. O ka lilo io ana o na'lii i poe haumana io na Iesu, ka mea ia e pono nui ai na aupuni o ka honua nei.
                2. O ka lilo ana o na makaainana i poe haumana na Iesu ka mea no ia e pono nui ai na aupuni o ka honua nei.
                3. O ka hoopili pololei ana o ke kanawai i ka mea i hewa.
                4. O ka imi nui ana o na'lii i ka pomaikai ana a me ka lako ana o na makaainana kekahi mea e pono ai na aupuni o ka honua nei.
                5. O ke aloha ana e na makaainana i ko lakou poe alii kekahi pono no ia e pono ai na aupuni o ka honua nei.