Ke Kumu Hawaii, Volume II, Number 16, 4 January 1837 — Page 63

1837.) KUMU HAWAII. 63

                He olioli ka naau ke hana mai ka Haku pela. E ake ko'u manao e hiki mai ko ke Akua aupuni ma keia wahi. I hanaia kona makemake ma ka honua nei, e like me ia ma ka lani. Na'u na Hopu.

KE KUMU HAWAII.
WENEDE, IANUARI 4, 1837.

NO KA HOLO ANA AKU O NA HOAHANAU.

                Ua hoi aku nei, mai Honolulu aku nei, i Amerika Huipuia o MI. RIKEKE a me kana wahine, a me ka laua mau keiki eono. O ka hiku o na keiki a me ka walu, ua waihoia laua ma Maui. Holo pu me lakou ke kaikamahine o Mi. Bihopa. Ma ka moku, Daniel Webster, o Pierson ke alii, i holo aku ai, i ke kakahiaka o ka la 9 o Detemaba 1836.
                Ua holo aku nei no hoi, i Amerika, Mi. POLENA a me kana wahine, a me ka laua keiki elua. Ma ka moku Adeline, Buckley ke alii, Detemaba 31, 1836.

MAI AMERIKA MAI.

                Ua ku mai Det. 23, ka moku o Hamilton kona inoa, Barker ke alii. Holo mai mapu me Mi. Li ma, ma ka muliwai o Kolumebia. Kauka White me kana wahine, a me na keiki elua. Mr. Beers, he amara ia, me kana wahine a me ka laua mau keiki ekolu. Mr. Wilson, he kamena ia, he haole wahine ole. Ekolu wahine kane ole, Miss Pitman, Miss Downing a me Miss Johnson. Holo mai no hoi elua kanaka opiopio, Mr. Grimes a me Mr. Pitman.
                Ua lawe mai ka moku i na pepa hoolahaike a me ka palapala lima he nui loa, a me kekahi ukana. Ua lohe makou, e holo mai ana paha, mai Amerika mai, i keia makahiki, he poe misionari hou no keia pae aina.

O KA PAIPAI I NA MAKUWAHINE.

                E na Makuwahine, mai haalele oukou i ka akoakoa ana o oukou iho a me ka oukou mau keiki.
                He mea pono ke halawai pu a e pule pu i ke Akua e kokua mai ia oukou i ka hana nui ana i haawi mai ai ia oukou.
                He mea pono ke kamailio pu a e paipai kekahi i kekahi e malama pono i na keiki, a e hapai i na hana maikai a oukou i haalele ai. E halawai me ke kumu. A i ole e hiki mai ke kumu, e halawai no, na hoalawehana. He mea pono no oukou e pule pu no ka oukou mau keiki, e hoohuli mai ke Akua i ko lakou naau mamuli ona, i ka lakou wa opiopio; aole hoi e hoohala i keia pule a hiki i ka wa e ae mai ai ke Akua, a e haawi mai i keia me na oukou i makemake nui ai. Makaukau no oia i ka hoolohe mai, a me ke kokua mai me kona lima mana.
                Eia kekahi mea pono no oukou, e na makuwahine, i ko oukou alakai ana i na keiki, he pono ke hele pololei loa oukou, e hoonaauao, e hana hemolele loa imua o ko lakou alo, e olelo i na olelo pono wale no, a e hoike ma ka hana ana, i ko oukou hoolohe ana i ka ke Akua kauoha, a me ko oukou makemake io e lilo lakou i mau keiki pono nana. E hana pono mau me ke ahonui, oia ka mea e pono ai.
                Eia kekahi pono, e hoouna i ka oukou mau keiki i ke kula e hoonaauao i ko lakou wa kamalii, e hele pinepine i ke kula, aole lalau wale ma kahi e hihia ai.
                He pono hoi ke hoomakaukau i wahi pono no na keiki maloko o ko oukou mau hale iho, kahi e oluolu ai na keiki, kahi e heluhelu ai i ka palapala, a e ka kau ai ma ka papa pohaku, a ma ka pepa kekahi.
                E hoolako oukou i na keiki i na mea e naauao ai lakou, no ka mea, ina aole oukou e hoolako ia lakou i na mea e naauao ai lakou, a noho naaupo lakou, no oukou no ia hewa.
                Ina e waiho oukou i na keiki ma kahi ai ole, a me ke kapa ole no hoi, a haalele ia lakou, a make lakou ilaila o wai ia hewa. A ina e waiho oukou ka oukou mau keiki me ka lako ole i na mea e naauao ai, a e maona ai ko lakou mau uhane, a make ko lakou mau uhane iloko o ka naaupo, no wai ia hewa? No na makua no.
                E nana i ka oukou mau keiki, ua lako anei lakou a pau i ke keena, i ka noho, i kahi moe, i kahi kapa, i ka palapala, i ka pepa, i ka papapoku, i ka peni, i ka inika a me ke kumu, a me ka hale kula maikai? ua lako anei ka nui o na keiki o Haawii nei? Aole paha lako. Aole lako lea kekahi, aole lako iki kekahi. Ahea la e lako ai lakou ke hooikaika ole na makua me ke aloha, a me ka naauao? Ahea la e hana pono lea na keiki ke hana pono ole ko lakou mau makua?
                E na makuwahine, e kokua i na keiki e hana pono; e paipai hoi i ka oukou mau kane e hana ponoi na keiki, a e kokua oukou ia lakou e hapai pu ia hana nui e pono ai. Pela no kekahi mau makuawahine i hana'i ma Amerika, ua hana lakou e like me keia mau kauoha, a ua naauao ka lakou mau keiki, a ua oluolu ka naau o na makua i ka ike maka ana i ka pomaikai io o ka lakou mau keiki. Ua aloha nui kekahi poe i ke Akua i kona hoolohe ana mai i ka pule a lakou i pule pu aku ai ia ia no ka lakou mau keiki.
                Pela no hoi o Hana ka makuwahine o Samuela.
                O ka pono no ia no oukou nei na mea i lohe i ka ke Akua olelo i keia mau makahiki he umikumamaono.
                Ua loaa hoi ia oukou keia makahiki hou . E hana koke oukou me ka ikaika i na mea a pau a ke Akua i haawi mai ai na ko oukou mau lima e hana. Alaila, pomaikai na keiki kane, a me na kaikamahine, a me na kane a oukou. H. B.

KAHI MELE.

KA POMAIKAI I NA KULA.
(Kekoaio ka leo.)

Pomaikai Hawaii nei,
I na kula kamalii,
Me na kula Sabati,
                Ke kula nui nae:
Ua imiia ka naau hou;
Ua emi hoi ka naau po;
Olioli pu kakou;
                I keia pomaikai.

Eia hoi, ua makaukau
Kahi Kumu naau ao
Na na kanaka a pau;
                Hoolohe pu kakou:
Na keiki makamae,
Na makua, ua hanai.
Kii mai hoi i pomaikai
                I keia pono hou.

Nui ko Iesu maikai,
Kei ke Kumu akamai,
Nani keia Alakai,
                E pono ai kakou.
Lohe mau na pepeiao,
Huli io na naau,
Hahai pu kakou a pau,
                A ola ia Iesu. H. B.

HALE PAIPALAPALA, Ian. 1837.

                E pai ana, i keia manawa, na HIMENI HAWAII a me ka PUKAANA; ka AI O KA LA; a me KE KUMUMUA; KE KUMU HAWAII; a me ke KUMU KAMALII.

                E kuu keiki e, e haliu mai i ka'u olelo, i ka'u olelo hoi e huli mai ai ka pepeiao.
                Mai noho a nalowaleia mai kou mau maka aku, e malama ae iloko o kou naau.