Ke Kumu Hawaii, Volume II, Number 17, 18 January 1837 — Page 68
68 KUMU HAWAII. (IANUARI,
keiki, i huipuia kona uhane, me na anela a me na haipule o ka lani, a lilo i ka mahalo pu ia Iehova, ke make kona kino. Pule pinepine pu makou a pau ma kona wahi e waiho ana i ka mai. Malaila i lana ai ko makou manao.
A make ke keiki, kanu aku makou ia ia, ma kahi i kanuia'i kekahi keiki a Limaikaika, a me kekahi keiki a Polena, maloko o ka pa o ka halepule ma Lahaina. Malaila e waiho ai, a kii mai ke Akua ia lakou a me kakou a pau i ka la nui mahope.
Na'u Na BALUINA.
Lahaina, Aperila, 1837.
KAHI MELE.
KA PONO O KA HAIPULE KAMALII.
Hele mai, na kamalii,
Lelepau i ka Moi,
Lilo nona ponoi
Ko oukou mau naau;
Nui ke aloha mai
O ke Kahu akahai;
Make Iesu i pau ai
Ka hewa o ke ao.
Pale i ka naau po,
Mihi koke hoi, ano,
Pule me ka naau hou.
Alaila ola pu;
Huli mau i naauao,
Koho i ka Haku mau,
Noho me ka makaukau,
A hiki mai Iesu.
Mele pu na kamalii,
Me ko Iesu mau pokii,
Hoomaikai i ka Moi,
Ka Haku o ke ao:
Nani kona launa mai,
I na kamalii maikai,
Nona lakou e ola'i,
A lanakila mau. H. B.
HE MANAO NO BATIMIA.
E na hoahanau; Eia keia manao hoakaka ia kakou, i ko kakou hoohihia ana i ka mea e make ai ka uhane o na kanaka. O ka noho ana me ka palaka, a me ka nanea, a me ko kakou hoopapau loa ana i na mea o keia ao, oia ka mea e poino loa ai ko kakou mau uhane, a me ka uhane a na makamaka.
Eia hoi kekahi, e makau nui kakou i ka maka o ke Akua me ka alunuwaiwai ole. E hoonoho i na kiaaina ma lama pono i ka ke Akua olelo, a me ka hoike aku i ka ke Akua olelo i na makaainana. Eia hoopouliia ko lakou mau maka i ko lakou haalele ana, a malama ole.
Eia kekahi manao nui, no ka haunaele ana a me ka pau koke ana o na mea o neia ao. No ia mea e manao ai kakou i ka aina maikai, pau ole ma ka lani o Ierusalema hou. He nui na mea e manao ana ma ke ao nei, aka, e hoopau koke mai auanei ke Akua i na mea a pau a lakou i imi aku ai. I mai la Petero' "Ua kokoke mai ka hope o na mea a pau.'' he uwahi panee na mea o keia ao a pau, ke hoomau lakou ma na mea pau koke o ke kino, E na hoahanau, He papohakukino alii anei o mau loa? Aole paha, o ka hope oia mau mea he make ia. "No ka mea, o ka manao ana ma ke kino he make ia.'' Roma 8: 6.
Ua momona loa ka pepeiao o na kanaka a pau i ka lohe ana i ka ke Akua olelo. Aole nae i malama naau.
Aka, ke malama nei lakou i ka eha mau loa. No ka mea, ua kakauia ma ka Roma 2:9. "He ino a me ka make maluna o na uhane a pau o kanaka e hana ana i ka hewa.'' Pehea la e hiki ai i na kanaka ke hololua i mua i hope me he muhee la? Aole loa e hiki ia lakou ke hana.
KA MAIKAI O KA NAAUAO.
Nani ka maikai o ka Palapala Hemolele; a hohonu ka manao o ka mea nana i hana na me a pau loa. Ia manawa, i ko'u wa uuku a hiki mai i keia wa, ua ike pinepine au i na moku, aia na ka palapala iluna; na ka palapala no e alakai i ko lakou hele ana. Ma ia mea, ua lilo na malihini i kamaaina no na wahi ike ole ia; a he kamaaina no ka la, a me ka mahina, a me ka hoku, a me kela mea keia mea kupanaha wale.
O ka poe i hoomau i ka ao ana, a hoomaopopo, o lakou ka poe naauao; a o ka poe molowa, o lakou ke naaupo.
I ko'u manao ea, o ka poe ike a akamai i ka hana, a ike i ka palapala ea, o lakou ka i maopopo ka pomaikai, e hiki no ia lakou ke ike i ka lakou iho, a me na mea a pau loa; naauao lakou, ike i ka mea ino, a me ka mea hewa. Pomaikai lakou.
Na H. KAWAILEPOLEPO.
MAKE.
Ua make o Kekahiko, Ian. 8, 1835, ma Hakalau, Hilo. I kuu ninau ana aku i kana wahine a me kona hoahanau, hoakaka mai laua i kona manao, penei, Ua manao ia i ke Akua. Ua i mai kela, o ke Akua kona hoahele. Ina i kamailio makou ma na mea e, aohe ona hoolohe mai. Ua manao no ia, he mea uuku no ke kino; o ka uhane no ka mea nui ia ia. Ua kauoha mai i kana wahine. "E malama nui i ke Akua. Ina e aloha mai oe ia'u, e malama nui ia Iesu." I mai, "Mai manao nui i ko'u make ana; e manao ma ka uhaue. Ina e manao oe elike me au, mamuli e halawai hou: a i ole e manao oe ia Iesu e like me au, aole e halawai hou kaua.''
Ua kauoha mai i kona hoahanau, e Binamu, a me kona poe hoahanau ma Oahu. I mai, "Mai ue mai ia'u, e ue i ke Akua. Ke manao nei au ia hai oukou ia'u i ke Akua. Mai manao nui oukou i ko'u kino. Ua like ke kino me ka pumaia ka palahu wale. O ka ikaika i ke Akua, "E ke Akua. E Iesu. E Iesu," a pau kana pule, moe kona maka, a hele aku la, aohe oni, aohe no.
J. G.
NO NA MOKU.
HOLO MAI.
Dek. 15. Zone, Coffin, Nantucket, 32 mal. 1250 bar.
17. Newark, Whitfield, Pougkeepsie 16 500.
19. Loan, Luce, Edgartown, 28,800
23. Columbia, Royal, London.
23. Hamilton, Barker, Boston.
27. Adeline, Buckley, Newburyport, 36, 1700.
HOLO AKU.
Dek. 31. Adeline, Buckley, i Amerika.
Ua paiia KE KUMU HAWAII ma ka elua hebedoma hookahi pepa, o Wenede ka la e pai iho ai.
Eia ke kuai ana, hookahi makahiki $ ,50, a na mea e lawe i ka pepa a pau.