Ke Kumu Hawaii, Volume II, Number 19, 15 February 1837 — Page 75

1837.) KUMU HAWAII. 75

                Eia na mea i hoomoakakaia. Ma ka lawe iki keia pai ana.
                1 O ka popilikia, no ka lima mai o Iehova no ia. Nana no ia i hana: malaila no oia i olelo mai ai, me ka maopopo.
                2 He pono ko Iehova hahau ana mai. He pololei kona hoopai ana. He manao paipai kekahi; he manao e hoohuli, a e hoola kekahi, ko ke Akua, a he manao hoike i kona huhu ana i ka hewa.
                3 He pono ke imi ia Iehova i ka wa popilikia, i ka wa i hahauia mai ai e ia, aohe mea e ae e pono ai.
                4 Ina i hahauia kakou e ke Akua, he me na makahiki i koe, aole e hookano, aole e ku e ia ia, aole e pakike aku.
                5 O ka popilikia ana o ke kino, he mea ia e akea ai uhane, ke ae aku kakou ma ko ke Akua manao, me ka oiaio.
                6 O Iehova ke kokua no ka poe popilikia ke kahea pono lakou ia ia.
                O ke kokua no ia o Iosepa o Daniela o Davida a me Hezekia. Oia ke kokua ke kokua o kana poe kauwa ma Hawaii nei, i na wa pilikia, a hiki i keia la. Ua maopopo ia i ko kakou mau maka.
                Ua hina, ua make, ua nalo kekahi mea aloha i manao nui ia'ku. Ua ehaeha ka poe i manao ia ia, aka he oia mau ke Akua. Ina he lehulehu loa ka no ke hilinai i na 'lii o ka honua nei,' eia ka mea e lana ai ko kakou manao, O Iehova ke kokua mau loa no ka poe a pau i paulele aku ia ia.
                Eia kekahi manao o Nahienaena i ka wa i ike ai oia i kona nawaliwali loa, a me kona popilikia iho. I mai ia, "E ake au e hoi aku i ka mea a'u i haalele aku ai, ka mea a'u i hou hou aku ai. Make loa au i ka weliweli.''
                I aku ke kumu ia ia. "Eia hoi ka olelo oiaio e pono ke malama nui ia mai, ua hele mai la o Kristo Iesu i ke ao nei e hoola i ka poe hewa, owau ko lakou mea oi.'' A i lokahi manawa, hoike hou ia olelo a Paulo ia ia, me ka ninau aku, "Pehea kou manao ia olelo.'' I mai la ia, "Ku pono no ia ia'u.''
                I kekahi manawa i ae la ia i kekahi makuwahine. "Ua ikiki au." Ninau ae la kela, "I ke aha?" Olelo hou mai la ia, "I ka hoihoi i ka pule iloko; makemake au e pule pu me kuu waha."
                A i kekahi manawa, nana aku la oia iluna, e kahe ana ka wai maka, i aku la ia i ka Haku, "E ke Akua, ua pono oe; ua hewa au: ua hoomaau aku wau ia oe.''
                I kekahi mau la mamua o kona make ana, ninau aku la kekahi hoaaloha ia ia, "Pehea oe e waiho nei me ka nawaliwali?" I mai la ma, "He nawaliwali no, aka o kuu manao, ua kaumaha loa kuu naau no ka'u hana ana i ka Haku. Ua manao au aole e hoi i ka ekalesia, no ka mea ua paa kuu manao ma ka hewa, ina e hoi aku wau, ma ka hooikaika paha, aole ma ka ekalesia. Nolaila, kaumaha
loa au no kuu hana hewa ana; aka, ina e hoolaia mai au paha e ka Haku, aole au e noho hou ma ka hewa."
                I aku la ka hoaaloha ia ia, "Ke manao nei oe e ola paha kou kino.'' I hou mai la o Harieta, "Aole o'u manao ma ia mea. He kaumaha loa kuu naau ia o ke ola o kuu uhane wale no ka'u mea manao nui ina i aloha mai ka Haku.''
                Hele mai kekahi e kahili ia ia i ka la Sabati, I mai la oia, "Aole paha oia i kou kahili mai ia'u. Aia ka hana ma o; o hele malaila." Kuhikuhi ae la i kahi e pule ai.
                Olelo ae la oia i kona kaikunane, i kona wa e kamailio ai me ia, me ke aloha no, "Ea, e huli mai kaua ma ka pono. Ahea hoi oe e ae mai i ko'u manao. Aia anei a like oe me au nei, alaila ae mai oe? Ua ae wale mai no paha oe ma kou waha. Make e au, aole oe e huli mai."
                I ka po hope loa ona, noi mai oia i kahi Misionari e pule; a ma ka aoao o kona moe i pule ai oia nona. I kekahi mau hora mamua aku o kona make ana, aloha ae la oia i kona poe hoaaloha. A, olelo lokomaikai aku la o Kinau ia ia, "E nana aku i ke kea." Olelo maopopo mai la o Nahienaena, "ele - malaila kaua - ma ke kea." A hiki koke ke kaikunane malaila, a ike mai la oia ia ia i mai la ia, "Eia ka pono o ka aupuni." Ae aku la ke kaikunane.
                A liuliu iki ae, ninau aku la kekahi ia ia, i ka hora pilikia, peneia, "Ke paulele nei anei kou naau ia Iesu?'' Aole ia i hoomaopopo. Olelo ae la o Kauikeaouli ia ia, me ke aloha, "E! Harieta! Ke olelo mai nei Binamu ia oe.'' Haka pono mai la oia, a ninau maopopo hou aku la oia ia ia, "Ke paulele nei anei kou naau ia Iesu?" Ae mai oia me ka leo maopopo, "Ae.'' I aku la ke kumu, "Malaila oe e maha ai - oia wale no ke kalahala e pono ai oe.'' O ke oki no la o kona kamailio ana ma ke ao nei. Aka ina e hiki ia ia ke olelo hou mai ia kakou, e olelo maopopo no ia, a ke olelo nei no ia, 'E huli ma ka pono - E imi koke i ke Akua - E malama i ka Iehova kauoha - E paulele ia Iesu, aole loa e haalele ia ia - Mai hahai mamuli o kuu hewa; e hoolohe mau i ka leo o ka Haku.'
                A pau ka hana ma ka luakini, hoihoi ia'e la oia ma ka hale uluhe kahi i make ai, e waiho hou ilaila a hiki i ka wa e laweia'ku ai i Lahaina e waiho pu me kona makuwahine.
                I ka hele ana, o Peleiela, a o Aiahoi, na leo mele a ka poe hookanikani i hookani ai.
                Aole i walaau, aole kumakena na tausani o na kanaka i akoakoa mai i ka hoolewa ana. Aole i haalele aku ka Uhane o ke Akua i ka poe i launa ia ia.
                Minamina i ke kunu, a me ka nawaliwali o ka leo o ke kahuna ia ia ka olelo, ia la. Aole nae i nawaliwali ka leo o ke Akua.
                O kekahi kanaka i hele ma ka hewa, aole manao e hoi mai; aole launa iki i na hana ma ka halawai loa ia mau la, aka i ka hoolewa ana, hele ae la ia me ka lehulehu iloko o ka luakini, me ka manao enemi, ku e loa i ka pono; manao no ia, aia pau ia hana, e hoi i ka hale a e inu i ka rama me kona lokoino no; aka ua lohe mai la oia i ka olelo a ka Haku, hoi ae la ia i kona hale me ka hoohaahaa, me ka manao e haalele i kona hewa. - A hiki kona mau hoainu rama ilaila e inu pu, i aku la oia, "Ua pau ia hana a'u.'' A ia la ae, hoike mai la oia i kona hewa, a me kona mihi, imua o ke anaina nui, me ka mahalo i ke Akua ke kokua io.

HE MANA KO KA NAAUAO.

                Eia ka mea naauao a'u i ike ai malalo iho o ka la, a he mea nui ia ia'u; Aia ke kulanakauhale uuku, aole nui na kanaka maloko; a hiki mai kekahi alii nui, a hoopopilikia ia wahi, a kukulu iho i pa kana nui e ku e aku i ua kulanakauhale.
                A ua loaa malaila he kanaka ilihune naauao, a ua hoopakele ia i ke kulanakauhale no kona naauao, aka hoi, aole kekahi kanaka i hoomanao i ua kanaka ilihune la.
                Alaila, i iho la au, ua oi aku ka naauao mamua o ka ikaika; aka hoi, ua hoowahawahaia ka naauao o ka mea ilihune, aole hoi i hooloheia kana olelo.
                Ua loheia no na olelo a ka poe naauao ma kahi noho malu ai, mamua o ke kala ana o ka luna o ka poe naaupo.
                Ua oi aku ka naauao mamua o na mea kaua, aka hoi, ua hoohiolo ke kanaka hewa i na mea maikai he nui wale. -
Na Solomona.

NO NA HANAUNA.

                Hele aku la kekahi hanauna, a hele mai la kekahi hanauna; aka, ua mau no ka honua.

NO KA MAKANI.

                Puhi aku la ka makani i ke kukulu hema, a hule mai la ia i ke kukulu akau; huli ae la ia io, a io; a hoi hou ka makani i kona wahi i puhi ai.