Ke Kumu Hawaii, Volume II, Number 21, 15 March 1837 — Page 81

KE KUMU HAWAII.
HE PEPA HOIKEIKE I NA MEA E PONO AI KO HAWAII NEI.
"O ka pono ka mea e pomaikai ai ka lahuikanaka; aka, o ka hewa ka mea e hoinoia'i na aina."
Buke 2. HONOLULU, OAHU, MARAKI 15, 1837. Pepa 21.

NO KA ZEBU.

                Ua like kekahi ano o ka Zebu me ko ka bipi. Ua like na niho a me na kui a me na maiuu.
                Ua like na hoi na pepeiaohao a me ka maka, a me kehahi ano e ae o keia holoholona me ko ka bipi. Aka, maluna o kona poohiwi, he puu no kona, me he kuapuu la, nolaila, ua ano e ia.
                Ua nui loa kekahi Zebu e like me ka bipi, a nui aku, a liilii iho kekahi, aneane like me ke kao.
                No ka hanai ana, nolaila paha ka like ole, a no ka like ole o ko lakou wahi noho ai. Ma Peresia kahi i loaa ai ka Zebu nui, a ma Aferika ka Zebu uuku. O keia kii maluna, mawaena ia aole i nui aole hoi he uuku, mawaena wale no ia.
                Holo hihiu keia holoholona ma Aferika, a ma kau wahi o Asia. Ua hoolakaia no hoi ia, a lawe no ia i ka ukana ma kona kua, a e kauo no hoi ia i ke kaa, a me na mea e, e like me ka lio. Ma kau wahi o Inia, ua hoohana nui ia oia, ma keia mau mea.
                Ua oleloia, ua oi aku ka mama o ka Zebu, a me kona oolea, a me kona lokomaikai, mamua o ko ka bipi. Ina i kauo lakou i ke kaa, holo no lakou e like me ka lio, a hiki i kahi loihi, aole hoi i maloeloe. I ko lakou hele ana i kahi loihi, ua hanaiia lakou i ka berena i hanaia a ono i ke ko, a i ka bata paha.
                Ma Surata kekahi kulanakauhale o Inia ua oleloia, o ka Zebu wale no ka lakou lio nana e kauo i na kaa, a nana no i hana i ka hana a pau i hanaia e na lio ma na aina e. Ua like no ko lakou holo ana me ko ka lio, a hoonani loa ka poe waiwai i ka lakou Zebu. Kau no lakou i na bele kani ma ko lakou ai, a i ka holo ana o ka Zebu kani loa lakou. He pepeiaohao ko kekahi Zebu, a ua ole kekahi. O ka Zebu keokeo ka i manao nui ia, he ano e ko kekahi he kakaikahi ka mea keokeo. Ua kauia ka noho ma ko lakou kua a holo ke kanaka maluna e like me ka lio. Aole lakou i alakaiia i ke kaula waha, he kaula ihu ko lakou, ua houia ma kekahi puka ihu a puka iwaho ma kela puka ihu.
Lama Hawaii.

HELU 1.
NO KE KAAPUNI ANA IA OAHU.

                E ka poe e heluhelu ana i Ke Kumu Hawii, aloha oukou. Ke hoakaka aku nei au ia oukou i ko makou kaapuni ana ma Oahu nei, e hoala aku i ka poe hiamoe a me ka poe palaka, a me ka poe kanalua, a me ka poe kuihe, a me ka poe hoomaloka, na kane, a me na wahine, a me na kamalii; ka poe hooikaika mamuli o ke kino, aole mamuli o ka uhane, no ka poe hana i kela hewa, i keia hewa; no ka poe mihi ole, a me ka poe pule ole i ke Akua, a me ka poe paulele ole ia Iesu. O lakou ka makou i imi aku ai ia manawa, e paipai aku ia lakou, me ka hai aku i ka inoa o Iehova a me Iesu a me kana olelo maikai, ma kahi e halawai ai na kane a me na wahine a me na kamalii; malaila e haiia aku ai ka pono o ke Akua; oia ko makou manao i kaapuni ai ia Oahu nei.
                I ka mahina o Detemaba i ka la 13, 1836, ko makou hele ana, o Tineka o Wahinealii, a owau kekahi. I ka hora aiwa, holo aku la au maluna o ka lio a