Ke Kumu Hawaii, Volume II, Number 21, 15 March 1837 — Page 84
84 KUMU HAWAII. (MARAKI,
ana ia ia kona manao e luku aku ia oukou?
Peneia paha ka manao o kekahi poe, "E ai kakou e inu kakou, no ka mea e make paha kakou i ka la apopo."
J.S.E.
KAHI MELE.
KE AO ANA A IOANE BAPETITE.
Ka leo o ka mea e kala ana ma ka waonahele,
E hoomaukau oukou i alanui no Iehova,
E hoopolei hoi ma ka waoakua,
I kuamoo no ko kakou Akua.
E hoopihaia'na na awawa a pau,
A e hoohaahaaia'na na mauna a pau, a me na puu,
E lilo no ka me kekee i pololei,
A me kahi puupuu i laumania.
E hoikeia mai no ka nani o Iehova,
A e ike pu aku no na kanaka a pau,
No ka mea, na ka waha o Iehova i olelo mai.
I mai la ka leo, E kala aku.
I aku la ia, Heaha ko'u e kala'i?
He mauu no na kanaka a pau,
Ua like hoi kona nani a pau me ka pua o ke kula.
Mimino ka mauu, a mae wale ka pua,
Ke pa mai ka makani o Iehova maluna ona.
He oiaio no, he mauu keia poe kanaka.
Mimino ka mauu, a mae wale ka pua,
Aka, o ka olelo a ko kakou Akua.
E ku paa mau loa no ia.
HELU 4.
HE MANAO NO NA HOAHANAU I HOOLILOIA IA IESU I KA BAPETISO ANA.
l. Aole i ka ka naaupo a me ka molowa i ko kakou ekalesia ana.
Eia na mea e akaka ai kela manao.
1. Aole kekahi mea naaupo a molowa ma ka lani, kahi i noho ai Iesu ko kakou Haku, ua pau lakou i ka imi i na mea naauao a hana hoi i na hana ka pono i kela wahi.
2. Aole i naaupo Iesu: Aole ona molowa. E nana i kana hana'na a me kana kamakamailio ana. Aole i puka iki kekahi mea naaupo ma kona wahi. Aole kamailio lalau oia ma ka halawai. Aole i noho hoopalaleha, hana ole o Iesu. Aole i haule wale kekahi la ona me ka noho wale hana ole; Aole loa. Nolaila aole e hiki i kekahi ke hahai ia ia a noho molowa a palaualelo paha, ua akaka ia.
3. Ina ua komo naaupo kekahi hoahanau iloko o ko Iesu pa hipa, oia ka ekalesia, pono ia ia e mihi koke a imi aku i kahi naauao; ole pono kekahi ke noho iho me ka molowa i ka i iho la, "Auhea, aole au i ike i ka palapala a me ka naauao." Pono ia ia ke kuai koke i piapa a hookamalii i ka naaupo, oia e hele i ke kula e like me na kamalii a e ao, i pau ai kona naaupo. Mai noho kekahi a hoomau i kona naaupo.
4. I mai o Iesu i ka ekalesia, "O oukou no ka malamalama o ke ao nei." Ka malamalama. Auhea ka malamalama o ka hoahanau e noho oluolu ana iloko o ka naaupo a me ka molowa? Auhea ka malamalama o ka hoahanau i hooikaika ole i ka naauao? Aole ona malamalama.
5. Pehea la e hiki ka hoahanau naaupo e hooikaika aku ai ia hai e imi i ka naauao? Aole anei e i mai kela kanaka ia oe, "E ka hookamani, e unuhi oe i ka laau nui mailoko ae o kou maka iho." Mat. 7:4. No ka mea kamailio aku ai oe ia ia e haalele i ka hewa a me ka naaupo a e noho ana ka oe maloko o ka naaupo me ka makau ole a me ka mihi ole.
6. Pehea ka hoahanau mea aina; he ahupuaa paha kona; he ohana okoa paha, he moku aina paha kona, a waiho wale oia ia lakou iloko o ka naaupo, aole minamina a hooikaika nui i lako lakou i na kula a me na palapala? Pehea ka hoahanau i hooikaika nui i na kanaka o kona aina e loaa nui ka ai a me na holoholona ia ia, a nui hoi ka waiwai, aka o na kula a me ka palapala, aole hooikaika aku ia lakou ilaila; aole anei e manao na kanaka, o ka waiwai ka mea nui i kona manao a me ka mea ana e hoomana aku ai? "No ka mea, no ka piha o ka naau i olelo mai ai ka waha:" a o ka waiwai ko lakou i lohe nui ma kona waha.
7. Pehea ka hoahanau palaleha, palaualelo: noho hana ole? E hahai ana kela ia Iesu? Ea! e ka mea hoopalala ha, e heluhelu i keia pauku; Tim. 5: 8. "A i hoolako ole kekahi i kona a me ko ka hale ponoi ona iho no hoi, ua hoole ia i ka manaoio a ua oi aku kona hewa i ko ka mea manaoio ole."
Aole anei i maa kekahi hoahanau o keia pae aina e noho molowa a hoolako ole i kana wahine a me na kamalii?
Menei ko'u ike ana kekahi hoahanau. Hele paha i kekahi hana iki, kahi kahumu paha, kahi mahiai iki paha, kahi lawaia iki paha, a poalua paha hele i ke koele a poakou aole. Aahu paha i kona kapa a noho wale paha i kona puka a haule wale aku paha i kahi kauhale a kamailio wale paha, a moe paha ma ka moena, puhi baka paha, a kani kahi bele no ka halawai poakolu alaila puiwa kona manao, hapuku iho la ia i kahi kapa, aahu iho la a hele i ka halawai, pau paha ka himeni mua a me ka pale, komo aku la ia a hoohaunaele i ka hale i kona komo ana mahope loa. Aka hoi, aole liuliu a pili iho la kona mau maka a kiwi paha kona poo, a luli io, a luli io. Pela no hoi ma ke Sabati aole no ka hoolohe kona hele ana i ka halawai; mau i ka hiamoe no. Pehea hoi oia i na la a pau? Kakaikahi kana hana. O ka noho wale ka nui. Hiamoe kahi manawa i ke awakea a ahiahi. Kahi manawa neo wale aku kuleana ole i kahi kauhale a noho a makaikai wale. Nana wale paha i na kamalii hooholo lio. Aku o ka hana, aole ia. He wahi heluhelu palapala iki paha kahi manawa. Ua malama anei kela hoahanau hoopalaleha i ka Iesu? He haumana anei oia na Iesu? Aole. Mai hoopunipuni kekahi ia ia iho. He mea hiki ole ke hahai mamuli o Iesu a hoopalaleha i ka hana. Mai kaukai hoi kahi ma ka hana i kahi manawa. Ina hoomaunauna oe i hookahi hapalua o ka la hookahi ua hana hewa oe. Hookahi mea pono no na hoahanau a pau, oia ke lilo i ka hana kela la i keia la, aole e noho hana ole hookahi la. - Ina aole au hana, alaila e imi oe i kekahi hana, aole e noho wale kamailio wale - hiamoe wale - palaualelo wale.
ALOHAKANAKA.
NO KA LUAKINI MA KAILUA.
KAILUA, Feb. 11, l837.
Aloha oe e Tineka. Ke hai aku nei au ia oe, i ke komo ana o ko makou hale pule ma Kailua.
I ka makahiki o ka Haku 1837, i ka malama o Feb. i ka la 4, i ka hora 11 o ua la la, ke komo ana.
Komo ae la na kanaka, a me na wahine, me na kamalii, a me Kuakini: na Mi Tatina i haawi aku i ka hale no Iehova, ma ka pule ana; me ka hoolea aku i ke Akua, a me ka hai aku i ka ke Akua olelo, ma ka Oihanalii, ka olelo ana i heluhelu ai, mokuna 6: a pau ka heluhelu ana, hoolea hou aku la, me ka pule hou aku i ke Akua, a pau ka pule ana; hai hou aku la o Tatina, i kekahi olelo a ke Akua.
Eia ka olelo ana i hai hou aku ai, ma ka palapala a Hagai 2:9. "O ka nani o keia hale hope e oi aku mamua o ko ka hale mua, wahi a Iehova o na kaua; A ma keia wahi e haawi mai ai au i ka malu, wahi a Iehova o na kaua."
Ua maikai no keia hale, aole e like me na hale pule mamua ma Kailua nei: he hale pohaku oiaio, he hale laau maluna, ua hoonaniia oloko i ke pena, ua hanaia a maikai.
O ka nui o keia hale pule: o ka loa 120 kapuai; o ka laula 48 kapuai: a o ke kiekie mai lalo a hiki i ka pau ana o ka halepohaku 27 kapuai.
Ua hookumuia ka pohaku kihi o keia luakini, i ka la mua o Ianuari, i ka makahiki o ka Haku 1836, a ua paaia i ka la 31 o Ianuari i ka makahiki o ka Haku 1837.
Na'u NAKAUAE.
NO KA LA.
Puka mai ka la, a napoo ka la, a wikiwiki aku la ia ma kona wahi i puka mai ai.
NO NA MULIWAI.
Kahe aku la na muliwai pau i ke kai, aole nae i piha ke kai; i kahi a lakou i kahe mai ai, malaila lakou hoi hou aku ai.
OAHU: MISSION PRESS,—R. TINKER, Editor E.O. HALL, Printer.