Ke Kumu Hawaii, Volume II, Number 22, 29 March 1837 — Page 89

1837.) KUMU HAWAII. 87

                He 'lii opiopio no ia, he iwakalua ona mau makahiki a me kumamalua, a make iha la oia, me ka aloha nui ia aku. Aloha ino oia.
                Nui ko'u aloha ia ia, me ke kaumaha o ka naau, no kona make ana Auhea oukou, e na kanaka o ke 'lii, a me na wahine, a me na ohua a pau loa. Ua make ko kakou alii, a pehea kakou? Eia paha, e koho kakou ia Iesu i alii no kakou, penei kakou e koho ai, e pule aku kakou ia ia, me ka mihi i ko kakou hewa, a me ka haalele nui i na hoopailua ai.
                Ua make opiopio no oia aole i liuliu kona ola ana, ma keia ao. Aole no emo loaa aku no ia kakou, aloha ino no hoi ke 'lii.
NA AKULA MOKU.
 

KE KUMU HAWAII.
WENEDE, MARAKI 29, 1837.
 
HE MANAO I NA MAKUA.

                Auhea oukou? E na makua, E alakai oukou i ka oukou kamalii i ka aoao pono e hele ai. E ao aku oukou ia lakou i ka palapala, i ike lakou i ka ke Akua hana, a me kona kanawai. E hooikaika, a e hoomanawanui i kela la i keia la, a i kela makahiki a i keia makahiki. Aole he hana liilii keia, aole pakole. He nui no, a he loihi. O na keiki he waiwai io no lakou a ke Akua i haawi mai ai i na makua, i malama pono ia lakou e na makua.
                E na makua, heaha ke ano o ko oukou malama ana i na keiki, a me ka paipai ana, a me ke ao ana---E hoike mai, i paiia ko oukou manao ma Ke Kumu Hawaii.
                Ua loaa ia'u kekahi palapala na ko'u hoalauna mai. E heluhelu oukou i kana i kakau ai penei.
                "Eia kekahi mea i ko'u manao, a me ko'u lima e hana nei, o ka'u mau keiki a me ko'u poe ma ko'u hale. Ke hooikaika aku nei au i na keiki a ke Akua i haawi lilo ole mai ai ia'u.
                I ka manawa i hoohiki mai ai ke Akua i ka malamalama, kuhikuhi aku la au i na keiki i ka la, penei, "E na keiki, aia ka la ke puka mai la, e noonoo kakou i kela mea, na ke Akua ia mea i hana. Na ke Akua i hana ka lani a me ka honua, a me ka bipi a me na lio a me na holoholona a pau loa. Na ke Akua i hana ke kai."
                A i ka hiki ana mai o ka po; kuhikuhi aku la au i ka mahina, a me na hoku na ke Akua i hana. Hoike aku la au i na mea maikai a'u i ike ei oloko o ko ke Akua aupuni. I aku au penei, "E na keiki, eia ka mea maikai, o ka olelo a ke Akua. Ina i ku e ko oukou manao i keia mea maikai a'u e hai aku nei ia oukou la, ea, ua hewa oukou.''
                A i ka hiki ana mai o ka la Sabati, olelo aku la au ia lakou, penei. "Eia ka la kapu o ke Akua. Mai paani i keia la, mai hana me ke kolohe, o huhu mai ke Akua; no ka mea eono a ke Akua la i hana ai i na mea a pau loa, nolaila ke Akua i papa mai i ka la Sabati."
                Ke kuhikuhi aku nei au i na keiki i ike lakou i ke Akua, ke hai aku nei au i ka mea nana i hana na mea a pau loa, o Iehova kona inoa.
                I ke kolohe ana o na keiki i ka la Sabati ea, hoopai koke kau la au ia lakou. I ke kuamuamu ana aku i kekahi, hoopai koke aku la au. I ka hele pu ana me na kamalii ua ike aku au i ko lakou kolohe ana ea, hoopai koke aku la au, pela no i kela hewa i keia hewa.  
                Ke hooikaika nei au i ka'u mau keiki i ke ao i ka piapa; ua ike kekahi mau keiki. E imi ana au i ke aupuni o ke Akua a me kana pono. Aloha oe.
Na'u na A. U.

                MAI AMERIKA MAI. Maraki 24, ku mai maanei kekahi moku kia lua, Rose kona inoa, Foster ke alii; 126 mau la mai Bosetona mai. Aole loaa ia makou ka palapala hookahi. Ua lohe no nae makou i ka holo ana mai o kekahi moku kia kolu mai Bosetona i Nu Ioka Okatoba 22; a malaila mai i Oahu. Aole ia i hiki mai---ua kokoke paha, Jones ka inoa o ua moku la, Merrill ke kapena.
                Mar. 25. Holo aku o Rose i Makao a i Amerika.
 

                KAUKA GARDINER. Ua make ia ma Honolulu nei, Mar. 26. Ua maha ia i kona luhi.

                HALAWAI MA KANEOHE. Ua hoomaka keia halawai loa i ka la 28 o Maraki nei.
 

HELU 2.
O KA KAAPUNI ANA IA OAHU.

                E na makamaka, Noho iho la makou ma Wailupe, a houluulu mai la kekahi mau kane, a me kekahi mau wahine, a me kekahi mau kamalii, a halawai iho la makou malaila me lakou, me ka pule aku i ke Akua, a me ka hai aku i kana olelo maikai imua o ko lakou alo. A pau ka pule ana, hana iho la makou i na noho o na lio, a paa, alaila, holo aku la makou a hiki i Maunalua. E noho ana o Pulama ilaila, he kaikamahine no makou iloko o ka Haku o Iesu. Noho iho la makou ilaila, a ahiahi, houluulu mai la na kane, a me na wahine, a me na kamalii, a halawai iho la makou me lakou, me ka manao haipule i ke Akua, a me ka hai aku i ka pono o ke Akua, aole i ko makou. A pau ka pule ana, hai aku la o Tineka i ka olelo maikai a ke Akua ia lakou, a, owau no hoi kekahi i hoakaka aku i ka pono o ke Akua, aole i ko makou. A pau ia, pule iho la.
                A pau ka pule ana, noho iho la makou, a ma ia hope iho, hoomakaukau iho la makou e ai, a ai iho la, i na mea e pono ai ke kino. He uwala ka ai, he puaa ka ia. A pau ka ai ana, noho iho la makou. A po ka la, hoi mai la kanaka mai ka lawaia mai. A i ka po, i ka manawa e ai ke kukui, haawi mai la o Pulama i ka ia ia makou, he anae ka ia, he kanawalu. Hai aku la au ia Tineka. "He ia ka kakou."
                Ninau mai la ia, "Na wai mai?"
                Hai aku la au, Na Pulama, na ke kamaaina o kakou.''
                Ae mai la ia, "Ae.''
                Alaila, hai aku la au, "He kanawalu ia.''
                Ninau hou mai la ia. "Ehia?''
                I aku la au. "He kanawalu."
                I mai la ia, "Pau loa no ia kakou aole a kanaka e noho nei."
                Alaila, olelo aku la au ia ia, i aku la au, "Na lakou mai, a haawi ae ia Pulama, a haawi mai o Pulama ia kakou.''
                Ae mai la ia. "Ae, pehea la e hiki ai ia kakou ke hali pau i ka ia, a puni Oahu nei?''
                Alaila, olelo aku la au ia ia, "Ina i manao kakou e lawe i ka ia, alaila, e waiho aku no ia ia, nana no e kapi, a na kona kanaka no e hali aku a ko kakou mau hale."
                Alaila, ae mai la ia. "Ae, nau e hana."
                Ae, aku la au. "Ae."
                Alaila, olelo hou aku la au ia Pulama, i aku la au, "Ea, nau no e malama ka ia a makou, a nau no e hoihoi aku i ko makou wahi."
                Ae mai la ia. "Ae."
                I aku la au, nau no e hana alikelike. Ae mai la ia. "Ae."
                A pau ae la ia, akoakoa mai la na kane, a me na wahine, a me na kamalii; halawai hou iho la makou me lakou i ka po, me ka manao haipule aku i ke Akua, a me ka hai aku i ka olelo maikai a ke Akua. Pule iho la makou, a pau ka pule ana, hai aku la o Tineka i ka olelo maikai a ke Akua, a o Wahinealii kekahi i hoomaopopo aku i ka pono