Ke Kumu Hawaii, Volume II, Number 23, 13 April 1837 — Page 89

KE KUMU HAWAII.
HE PEPA HOIKEIKE I NA MEA E PONO AI KO HAWAII NEI.
"O ka pono ka mea e pomaikai ai ka lahuikanaka; aka, o ka hewa ka mea e hoinoia'i na aina."
Buke 2. HONOLULU, OAHU, APERILA l3, l837. Pepa 23.

NO KA HOKI

                Ua like kekahi ano o ka Hoki me ko ka Lio. He mea nui no nae ka lio.
                Ua like na helehelena o ka Hoki me ko ka Lio a me ko ka Zebera, he ino nae ka Hoki.
                He ahinahina ka Hoki, a kokoke eleele kekahi, a kokoke keokeo kekahi.
                Ua loaa no ka Hoki ma na aina mehana a pau, he kakaikahi na aina i noho ole ia e ia. Ma Sepania ka Hoki maikai, no ka mea, ua malama nui ia, i ka ai, a ua ao nui ia no hoi.
                He kakaikahi ka holoholona i oi aku kona maikai mamua o ko ka Hoki.
                Ma kekahi aina oia ka mea halihali nui i ka ukana, a ua oi aku kona ikaika a me kona ahonui mamua o ko na lio e a pau i like ko lakou nui me kona. He lio pono loa ia ke hooholo, no ka mea, he wawae palahalaha ole kona: e hina ka lio maoli, hina ole ka hoki.
                Okoa ka Hoki laka, okoa ka Hoki hihiu. Ma na ululaau ma Amerika Hema, a ma Asia, ua loaa na Hoki hihiu. Ma na ohana nui lakou e holo ai, a ua hihiu loa. Ina i ai nui lakou, noho wale kekahi Hoki kane, a elua paha, e kiai. Ina ike aku laua i ke kanaka, a i kekahi enemi paha, alaila holo aku ke kiai, a poai i ua enemi la, ehia poai ana paha, ekolu paha, a pela e makaikai ai. Alaila hoi aku na kini i ko lakou poe, a hoholo nui lakou iloko o ka ululaau.
                Ua makemake nui ia ua poe Hoki hihiu la, no ka mea i ka wa i hoolakaia'i ua maikai loa lakou. Aka, no ko lakou mama i ka holo, ole i loaa ke hahai aku. A no ka hiki wawe o ko lakou honi ana, aole hiki ke hei malu, aole hoi e komo iloko o ka upena. Ma Peresia ua loaa lakou maloko o na lua i eliia, a hoopiha ia na lau a me ka opala mama. Haule ka Hoki iloko o ua lua nei, a no ka palupalu o na lau a me ka opala, aole i eha, aole nae e hiki ia ke lele iwaho. Nolaila, loaa no i ke kanaka a hoolakaia.
 

KA HALE PULE O EWA.

                He hale pohaku lepo ia. He 15 anana ka loa, a he 7 hoi ka laula, a he 15 na kapuai ke kiekie o na paia. Ua puniia ua hale nei i ka lanai, a ua akoia maluna, mai kaupaku a ka lanai i ka laui i peaia. Ua hoomaikaiia ka hale i ka puna maloko a me waho. A ua hanaia ka awae maikai, i kuaiia i ke dala, a na hoahanau ekalesia ma Honolulu.
                I ka la 10 o ka malama o Feberuari iho nei ua paa ka hale, a ia la Sabati iho halawai makou ilaila i ka pule, a ua piha loa ka hale a hu iwaho.
 

KA PULE HOOMAU.

                I ka la 14 o Feberuari, i ke 3 o ka hora ahiahi ka hoomaka ana o ka pule hoolilo i ko makou hale pule, i hale no ke Akua. Maanei no na hoahanau Kumu o Mi. Kemita a me Mi. Emekona. Himeni no makou. "He pono no kakou maanei." [Him. 139.] a pule aku la, alaila himeni hou ae la, "No Iesu ka honua." [Him. 141,] ma ka leo o ka Himeni Misionari.
                Alaila hai mai Mi. Kemita i ka olelo hoolilo mamuli o keia kumuolelo, Mataio 12; 13. "E kapaia ko'u hale, he halepule."
                A mahope iho, pule aku la o Mi. Bihopa i ka pule hoolilo, e haawi aku ai i ka hale a makou i hana'i no ke Akua, i hale hoano nona; i kahi e halawai mai ai oia me kona poe kanaka.
                O ka hoomaka ana ia o ka pule hoomau ma Ewa. Ia ahiahi iho no, halawai