Ke Kumu Hawaii, Volume III, Number 1, 7 June 1837 — Page 1
KE KUMU HAWAII.
HE PEPA HOIKEIKE I NA MEA E PONO AI KO HAWAII NEI.
"O ka pono ka mea e pomaikai ai ka lahuikanaka; aka, o ka hewa ka mea e hoinoia'i na aina."
Buke 3. HONOLULU, OAHU, IUNE 7, 1837. Pepa 1.
HE TIGA.
1. Ua like ka nui o ke Tiga me ko ka Liona. He iwilei ke kiekie a he anana ka loa. Ua oi aku no hoi kekahi i keia, a ua emi mai kekahi.
2. He nani ko ke Tiga ke nana' ku. He olenalena ka nui o kona hulu, onionio nae, he eleele kekahi. Ma ke kua ka lena loa, he lena ula. Ma na aoao he hapa ka olenalena.
3. Ua like kona mau helehelena me ko ka popoki. Ua palahalaha ka waha. Ua loihi loa na niho. A ua oioi a ua ikaika loa hoi na maiuu.
4. Ua like ka lele ana o ke Tiga me ko ka popoki. Kolo malu no ka popoki a hiki i kahi kolohe, alaila, e lele aku no ia, a paa ka mea ana i ike aku ai. Pela no ke Tiga. Moe malu no ia ma ke ala, kahi e hele ai na holoholona. A hookokoke mai kekahi me ka naaupo, lele aku no ke Tiga, a paa koke ua mea la i kona mau maiuu a me kona mau niho.
5. He mea hae loa ke Tiga, a he mea puni koko. O ka io maka o na holoholona e paa ia ia, oia wale no kana e ai ai.
6. He mea ikaika loa ke Tiga. Aole oia e holo, ke ike aku i ka Liona, aka, e hakaka no. A i kekahi hakaka ana, make pu laua i ka weluwelu o ko laua mau kino, kekahi i kekahi. No ka ikaika loa o ke Tiga, e pepehi no ia i ka bipi, a i ka lio paha, a hoolei ia mea ma kona ai, a paa ke poo ma kona waha, a holo mama aku no.
7. Ma ka hema o Asia, a ma Aferika kahi e loaa'i ke Tiga.
KANAWAI V.
E malama oe i kou makua kane a me kou makuwahine, e loihi ai kou mau la maluna o ka aina a Iehova, a kou Akua i haawi mai ai ia oe.
He kanawai maopopo loa keia, a ua hai pinepine ia ma ka palapala hemolele. E nana i Kanawailua 5: 16. Mat. 15: 4, 6, a me Epeso 6: 2.
Eia hoi ma Kanawailua 27: 16. E poino ke kanaka, ke hoowahawaha i kona makuakane a me kona makuwahine.
Eia ka Solomona olelo 1: 8. E kau keiki, e hoolohe oe i ke ao ana o kou makuakane; mai haalele hoi i ke kauoha a kou makuwahine.
Eia ka pomaikai o ka mea i hoolohe i ka makuakane a me ka makuwahine. "He mea ia e loihi ai kou mau la maluna o ka aina a Iehova a kou Akua i haawi mai ai ia oe.''
E nana hoi ma Mat. 19:19.
Eia kekahi mau keiki hoolohe i ka makua.
O Iosepa, Kinohi 47: 12, 49: 26.
O Timoteo, 2 Timoteo, 1 : 5, 4: 14, 15.
O Iesu Kristo, Luka 2: 51.
He mau keiki hookuli i ka makua.
Na keiki o Eli, 1 Sam. 2: 25, 31, 35. Solomona 30: 17. "O ka maka i hoowahawaha i kona makuakane.
A hoole hoi, aole e malama i kona makuwahine,
E kiko iho ka poe koraka o ke awawa ia mea,
A e ai iho no ka poe aeto opiopio. E nana i Kanawailua 21: 18, 21, a me 17: 16.
Na wai e ao aku i ke keiki, e hoolohe i ka leo o ka makua?
Na ka makua no. Solomona 22: 6. "E ao aku i ke kamalii i kona aoao, a elemakule oia, aole ia e huli ae malaila aku."