Ke Kumu Hawaii, Volume III, Number 1, 7 June 1837 — Page 4
4 KUMU HAWAII. (IUNE,
7. Ua kukakuka ai makou ma na mea e pau ai ka inu rama ana, a me ka hehi ana i ka la Sabati. Ua wela ka huhu o ke Akua no keia mau mea elua i hanaia ma Honolulu nei. Aole paha liuliu a hoopai mai no ia i ka poe ona, a me ka poe malama ole i ka la Sabati. Auhea oukou, e na lii, na luna, na konohiki, na kumu, a me na kanaka, e malama kakou i ka la Sabati, e ao aku, a e kaohi aku i ka poe a pau e noho pu ana me kakou e malama ia la, e hoano ia.
I ko makou hoi ana i ko makou wahi e noho ai, i Hawaii, i Maui, i Molokai, a i Kauai, pono makou, e na hoahanau e hoi me ka Uhane o Kristo. Pono e hilinai nui aku maluna ona, a e pule pinepine aku ia ia, i ninini mai ia i ka Uhane Hemolele a piha keia aina i ka nani o Iehova. E na hoahanau, e pule i ke Akua no makou. E pule me ke kiai o komo oukou iloko o ka hoowalewaleia mai. E pule mau aku.
O ke aloha o ka Haku me oukou a pau.
Na na KUMU.
KAHI MELE.
HE WAHI HIMENI NO NA MAKUA.
1 E na makua, mai o a o,
He waiwai nani ko oukou:
Ua lokomaikai ka Moi,
A haawi mai i na kamalii.
2 A ia oukou e malama'i,
E like me ke kanawai:
"E na makua, e hanai
I ka oukou mau kamalii
3 Aloha, a kokua mai,
E alakai i pololei.
Mai waiho wale ia lakou,
O auwana'e a make mau.
4 Mai hoonaukiuki ae
'Na keiki liilii makamae;
Uumi i ko oukou huhu;
E ahonui ia lakou.
5 E ao i na mea e pono ai,
Ka heluhelu a maikai,
A me ka pule ia Iesu,
I ko lakou Makua mau.
6 Papa i na hewa o lakou;
Paipai i ko lakou naau
E ake, a e hele ae
'Na kula, me na halawai.
7 E pule mau no lakou nei,
I ola, a i pomaikai
Ma kela ao maluna mau,
Me ko ka lani poe a pau." L. L.
LAHAINALUNA, Aperila 17, 1837.
I ko'u hele ana ma Oloalu, i ka poalima, hiki aku la au ma kekahi mau hale ma loalu, e oleloia ana kekahi mau wahine lua i make malaila. Eia ko laua mau inoa, Makeokeo kekahi, a o Hanapilo kekahi.
Eia ke kumu o ko laua mea i make ai, apaau iho la kekahi kahuna lapaau o Keo kona inoa, i kekahi mau wahine elima. Eia ka inoa o ka laau lapaau a ke kahuna, He ipuawa, he kukui, he ko, he uala, he wai maoli, oia ka inoa o ka laau i lapaau ai i kela mau wahine elima, a wau iho la ke kahuna ka ipuawa, a me ke kukui, a me ka uala, a me ke ko, a me ka wai maoli, a huipu ae la i kela mau mea i kahi hookahi, uwi iho la i ka wai o kela mau mea i huipuia ai a ke poi, a hano iho la i na wahine elima, a puka mai la ko lakou mai he koko, i mai la na wahine i make nei. "Ua ola oukou, ua pau ko oukou mai.'' Alaila hoi aku laua me ka olioli lapaau ia laua iho, a hiki i ko laua hale, olelo aku la laua i ka laua mau kane, i aku la, "Apopo maua hele e lapaau ia maua iho,''
I mai la na kane, Heaha ka laau?''
I aku la na wahine, "He ipuawa.''
I mai la na kane, "Mai hele olua e lapaau o make olua.'' I mai la na wahine, "He akua make olua, aole paha maua e noho he mai ko maua."
I mai la na kane, Mai hoopaakiki olua, he laau make na he waiki, elua pihe o kela laau, he make, a he ola, i mai la ke Akua make, I aku la na kane. "He Akua ola keia e uwao aku la ia olua." Alaila, aohe oluolu kekahi mau wahine no kekahi mau hale e aku, hele mai la lakou a hiki i kahi o na wahine e kamailio ana me ka laua mau kane, i
mai la laua ia lakou, Ko maua mau Akua a, o ka maua mau kane, e nana mai oukou aohe kino ola, i mai la lakou, "Heaha la ko olua mai?"
I mai la laua, "He nahu, ina e haha mai kekahi oukou he puu okoa no iloko o ko'u opu.
I mai la kekahi wahine, "Ua like oe me au.'' I mai la kela mau wahine, "Apopo kakou hele e lapaau ia kakou iho.''
A hele aku la lakou a hiki i kahi o ke kahuna
lapaau, i mai la ke kahuna,'' Owai ka mai oukou?
I aku la ua mau wahine la, "O make nei o maua."
I mai ke kahuna, Aole olua e ola he mai kahiko ko olua.''
Hoopaakiki aku la ua mau wahine nei, alaila kuha mai la ke kahuna i ko laua maka, i mai la, "Hele pela."
Hoopaakiki aku la no ua mau wahine nei, a kii aku la i ka ipuawa, a wau iho la, kowi iho la i ka wai a piha ke poi hele mai la ke kahuna, halalo iho i ua mau wahine la, a liuliu iki iho, puka mai la ke koko aweawea keokeo.
I mai la, "Ola au, ua puka mai ka mai,"
I mai la i kekahi. "Ua ola kaua."
A puka mai la ke koko eleele, alaila haalele kaikai ia laua, a koe iho ka make, a hiki ke awakea, make loa iho laua, i ka la umi o Aperila. Na MAAWEIKI.
NO NA HOAHANAU I MAKE.
KAILUA, Hawaii, Mar. 9, 1837.
Aloha oe e Tineka. Ke hai aku nei au i na hoahanau i make ma Kailua nei i keia manawa.
Mai ka malama o Iune mai, i ka makahiki o ka Haki 1836 a hiki i ka malama o Maraki, i ka makahiki o ka Haku 1837; maloko o ia mau malama he umi, ewalu mau hoahanau i make, o Leleahana, ma Honalo, kona wahi i make ai; i ka la 30 Iune, kona make ana; hookahi ona makahiki i noho ai maloko o ka ekalesia, a me na malama he umi.
O Wahakane, i Hianaloli kona wahi i make ai, i ka la 11 o Dekemaba, kona la i make ai, hookahi ona makahiki i noho ai maloko o ka ekalesia, a me malama he umi. Ohule, i Hianaloli kona wahi i make ai, i ka la 20 Ianuari, ewalu ona mau malama i noho ai maloko o ka ekalesia, a me na la he iwakalua.
Umene, i Keauhou kona wahi i make ai, i ka la 12, o Maraki kona make ana, 5 makahiki o kona noho ana maloko o ka ekalesia. Eleele i Keelehuluhulu, kona wahi i make ai, i ka la 15 Mar. 1 makahiki o kona noho ekalesia ana a me na malama 10. Halawai i Auhaukea kona wahi i maka ai, i ka la 5 Iulai, ka makahiki o kona noho ana maloko o ka ekalesia, a me na malama 9. Kapulikoliko i Keopu kona aina i make ai i ka la 11 Iulai, 6 makahiki a me na malama 2 o kona noho ana maloko o ka ekalesia. Keoua, Lanihau kona aina i make ai i ka la 15 Dekemaba, 8 makahiki a me la 15 kona noho ana maloko o ka ekalesia.
O keia mau hoahanau a ewalu aole i ikea ko lakou hewa a me ka hihia, ua noho no lakou me ka oluolu me ke aloha, he mau hoaaloha lakou, he mau hoalawehana hoi no ko Iesu poe kanaka ma keia wahi. Ua kii mai ka Haku ia lakou i keia mau malama he umi e hele aku me ia, ua loaa ia lakou paha ka pomaikai.
No ia mea e na hoahanau, e kiai kakou e like me ka Iesu kauoha i na haumana, Luka 12: 40. "Nolaila, e noho makaukau hoi oukou, no ka mea, e hiki mai ana ke Keiki a ke kanaka i ka hora e manao ole ia e oukou."
Na'u NA KAPAE.
Ua paiia KE KUMU HAWAII ma ka mea Paipalapala a na Misionari, Honolulu, elua hebedoma hookahi pepa, o Wenede ka la e pai iho ai.
Eia ke kuai ana, hookahi makahiki $ ,50, a na mea e lawe i ka pepa a pau.