Ke Kumu Hawaii, Volume III, Number 4, 19 July 1837 — Page 13

KE KUMU HAWAII.
HE PEPA HOIKEIKE I NA MEA E PONO AI KO HAWAII NEI.
"O ka pono ka mea e pomaikai ai ka lahuikanaka; aka, o ka hewa ka mea e hoinoia'i na aina."
Buke 3. HONOLULU, OAHU, IULAI 19, 1837. Pepa 4.

NO KA BEA KEOKEO.

                Eiwa paha kapuai ka loa o ka Bea keokeo, a eha kapuai a keu hona kiekie. Ua oleloia, hookahi tausani, eono haneri pouna ke kaumaha o kekahi; oia hoi ke kaumaha o ka Bipi nui. He umi iniha ka palahalaha o kona kapuai.
                Ua loihi kona nuku, pakole na pepeiao: ua nui loa na wawae, a ua pakole kona huelo. Ua loihi kona kino, a me kona ai; ua palahalaha na kapuai ona, a elima no manamana, me na maiuu oioi loa.
                He iwakalua niho ko na Bea a pau ma ka iwia luna, a he iwakalua kumamalua malalo.
                O kona hulu, ua keokeo melemele, aole keokeo loa. Ua loihi kona huluhulu, a manoanoa, a kunahihi.
                Aole holoholona i oi aku kona huhu a me ka makau ole, mamua o ko ka Bea keokeo. Ina i hahaiia, a eha paha, alaila, e huli no ia a hakaka me kona enemi, me ka huhu weliweli loa, a e lawe no ia i ka make a me ka luku aku ma na wahi a pau loa ana e hele aku ai. Ina eha ia i kekahi, aole loa ia e hooki i ka hakaka, a make.
                Ua malama loa ia holoholona i kana keiki. Aole holoholona i pale ae i ka hewa e like me ia. Aole loa makau iki ke hakaka me na mea a pau loa. Ina i hahaiia ka makuwahine, o ke keiki kona mea manao mua, a malama loa no ia lakou. A ina e pepehiia, e palu aku no ia i ke keiki maloko o ka make me ka malama aku, aole loa haalele, a pau ka hanu ana. Aia ma Ainaomaomao, a ma Lapalani, kahi i loaa nui ka Bea keokeo, ma kahi anu loa, ua paa ka lepo i ka hau a puni ka makahiki.
                O ka ia kana ai, a me na mea i paa ia ia ma kahakai. E ai no hoi ia i ke kino o na kohola make, a pae wale mauka, a lana paha makai.
                Mauka no kona wahi noho nui ai, aka, e hiki no ia ioa ke au, a e au no ia makai lilo, a luu ilalo i ka ia, a loaa no.
                O ka Bea keokeo ke alii o na holoholona ma na aina anu. Ma ia mau aina, aole holoholona pono ke hakaka pu me ia, nolaila, ola ke alii o na holoholona ma Ainaomaomao, a ma Lapalani.
                Okoa loa ka Bea keokeo, okoa loa ka Bea eleele. O ka eleele o kekahi, a o ke keokeo o kekahi, malaila, kekahi like ole, a ma ka ai kekahi like ole, no ka mea, he la a me ka io, oia wale no ka ai a ka Bea keokeo, aole loa ia i ai iki i na mea ulu. Aka, o ka Bea eleele, o na mea ulu, oia wale no kana ai, a i pololi loa, alaila ai ia i ka io. He loihi ka ai a me ke poo o ka Bea keokoe, a he puipui ke poo a me ka ai o ka Bea eleele. O ka Bea keokeo ka mea nui o laua, a oia hoi ka mea huhu loa.
                O ke anu no ka mea e nui ai ka Bea keokeo, a e like me ka mahuahua o ke anu, pela no ka mahuahua o kona kino, aka o na holoholona e, a me na kanaka, o ke anu no ka mea e uuku ai ko lakou kino. Ma keia mea, ua like ole loa ka Bea keokeo me na holoholona a pau.

HE WAHI MANAO KUMU.

                "I iho ka aia iloko o kona naau, Aohe Akua. "—Halelu 14:1.
                AUHEA oukou e ka poe hoomaloka a me ka poe makemake ole i ka ke Akua olelo, a me ka poe manaoio ole malaila?
                Ua lohe au, o oukou no ke olelo ana kekahi i kekahi, Aole uhane he kino wale no,—aole he Akua, - aole e ala hou mai ke kino,—aole he la nui mahope. Alia oukou e manao pela, a mai olelo hoi oukou pela, a noonoo nui oukou a maopopo;