Ke Kumu Hawaii, Volume III, Number 4, 19 July 1837 — Page 16
16 KUMU HAWAII. (IULAI,
kapa, me ko lakou mea a pau loa. Ua ike hoi kakou ma ke Kumu Hawaii i ka make ana o na kanaka i ke ahi baka, i ka pau ana o na hale ike ahi baka. Ua akaka loa, aole ia he mea e ola'i ke kino, a e pono ai hoi, he mea ia e make ai ke kino, a e hune ai hoi. No ke aha la i haalele ole ai ka poe puhi baka i ke baka? Eia paha, e noho a nano lakou ma ka naau kahiko, o ka poe i hoohanau hou ia mai e ka Uhane o Iesu Kristo, ua haalele koke lakou i na mea ano ino a pau. I ko lakou lohe ana i kekahi mea ano ino, hiki wawe no ko lakou haalele koke, e like me ka Paulo kauoha ana ma Tesalonike akahi 5:22. "E haalele i na mea ano ino a pau." KAILUA, Ap. 11, 1837. Na'u NAKAPAE.
KAHI MELE.
KUU KUMU.
OWAI ke ahonui mai
E ao mai ia'u, e ike ai,
E pule, e heluhelu hoi?
Kuu Kumu.
Owai ke alakai mai ia'u
'Ka halawai, i makaukau
No kela ao pomaikai mau?
Kuu Kumu.
Owai ke kuhikuhi mai
Na olel, me na kanawai
E pono ai na kamalii?
Kuu Kumu.
Owai ke ao aloha mai,
Ma keia kula kamalii,
I loaa ia'u ke akamai?
Kuu Kumu.
Aole anei pono ia'u,
Ke hana maikai aku no,
Aloha, a hoolohe mau?
Kuu Kumu.
E pono no, a pela wau
E hana'i, a e hoomanao
'Ka mea, nana au i ao,
Kuu Kumu.
Kuu kumu e, aloha mai,
A pule no kau keiki nei
I ola mau, Aloha, e,
Kuu Kumu.
Eia ko'u manao ke hai aku nei au ia oukou i kekahi hewa, o ka baka he ano ino ka baka. Eia kekahi hewa o ka baka, o ka hele i kauhale i ke ahi baka. Eia kekahi, o ka hoala i ko hai hiamoe, oia no ke akua o ka poe puhi baka, o ke ahi; ua maopopo i kuu manao e haalele loa ia mea. Ua ike pono au i kuu kaikunane, puhi baka i kona puhi ana a ona, haule iho la i kapuahi a wela, kona lae a me kona papalina, a mahope iho make loa, i ka wa no ia Kamehameha keia make ana, i ka haka. NA A. LAHABA.
O ka Kiaha rama.
"Aia ka omole. He mea maloko i kapaia he rama."
"E ke keiki uuku, ka mea heluhelu, Mai inu iki oe i kela mea i kou wa e ola ana. He mea make no ia. Pela no ka barani, a me ke gini, he mea make no; a me na mea inu e ae, he nui wale, he mea make no. Ua kapaia ua mau mea la, he mea inu ikaika.
A no ko lakou ikaika, hina na kanaka, a make no hoi na kanaka ia lakou. A ua kapaia ua mau mea inu la i kekahi manawa, o na uhane wela, oia hoi, o na uhane e aa ana. A ua kupono keia inoa, no ka mea, ua hoopauia i ka wela ka poe inu i ua mau mea la."
"Ea, ke ike nei anei oe i keia kiaha? Ina e inu oe i ka hapalua oia kiaha rama, alaila lilo oe i mea hehena."
"Ke ike nei oe i kela kanaka? O Robeta Berona kona inoa. A o kela keiki uuku, o Hu kona inoa. E hoohainu ana o Robeta ia Hu i ka mea inu ikaika iloko o ka puna. Aloha ino ua keiki la. A hoao iho la no ia, a ua ono la, no ka mea, ua hookomoia ke ko a me ka mea ala iloko. Aka he mea make no ia.''
"A mahuahua ae o Hu, hoomanao iho la ia i kona hoao ana i kela mea ono, a makemake no ia e inu hou. A i kela wa keia wa i loaa'i ia ia kekahi rama, inu uuku no ia. Ke manao nei oe he mea ino ke inu uuku? Ae, no ka mea, ina inu kekahi i ka mea uuku, aohe liuliu aku a makemake no ia e inu i kekahi mea iki hou aku. Alaila inu iki no ia i kela la keia la. Pela no i lilo ai na kanaka i mea ona?'
"He mea pepehi kanaka anei ka rama?"
E hai aku nei au ia oe. Ua ike au i kekahi keiki uuku, eono kona mau makahiki. Hele no ia i ka halepa, kuhi i waiho ai ka omole rama. Hoao iho la lia, a ono no oia ia mea. Hoao hou iho la ia i kekahi mea uuku hou.
"Alaila inu nui iho la ia, a ona a hina, a moe no ilaila a make. A loaa oia me ka omole rama, ua make,"
"Ehia na kanaka i make i ka rama ma Amerika? Kanakolu tausani a keu aku i kela makahiki keia makahiki.''
"A make ka poe ona, mahea lakou e hele ai?
"Ua hoike mai ka palapala hemolele, "Aole e loaa ke aupuni o ke Akua i ka poe ona." O kailani ko ke Akua aupuni''
"Aka o keia keiki uuku, aloha ino; aole ia he mea ona. Ua naaupo no ia, aole ia i ike i kana hana ana.''
"Auwe! Ua make anei kela kanaka? Aole i make loa, ua ona nae. O Hu no ia.—Auwe! o ua Hu la no ia, nona a'u i heluhelu ai ma kekahi aoao o keia palapala?" Ae o ua Hu la no ia. Ua hai aku au ia oe i kona inu uuku ana mamua, i ka manawa i loaa'i iaia. Aohe ona manao e lilo i kanaka ona. Aka inu mau no ia i kela la keia la, a ona iki no ia i kekahi manawa."
"Alaila ona no ia i keia hebedoma, kela hebedoma. A mahope iho ona no ia i kela la i kela la. Ea, e nana i kona hope."
"Auwe! Pehea la e malama'i ia'u iho, i lilo ole ai au i kanaka ona?"
Penei, ke hai aku nei au ia oe, Mai inu oe i wahi kulu iki o na mea ona e ona'i na kanaka, Pela oe e pakele ai.
Ua paiia KE KUMU HAWAII ma ka mea Paipalapala a na Misionari, Honolulu, elua hebedoma hookahi pepa, o Wenede ka ia e pai iho ai.
Eia ke kuai ana, hookahi makahiki $ ,50, a na mea e lawe i ka pepa a pau.
OAHU: MISSION PRESS.—R. TINKER, Editor. E. O. HALL, Printer.