Ke Kumu Hawaii, Volume III, Number 5, 2 August 1837 — Page 20

20 KUMU HAWAII. (AUGATE,

ka? A ina e haalele oukou ia manao, a hooiaio mai he Akua no, aole anei e hiki ia ia ke hoola mai i ke kupapau e like me kona hookupu ana i ka laau a me ka weuweu, a me kela mea keia mea. Ua maopopo, e hiki no.
                Eia ka ke Akua olelo: "E ninau mai auanei kekahi, Pehea la e hoola'i mai ai ka poe make? E hele mai lakou me ke kino hea? Ke, he lapuwale! Aole i houluia ka mea au e ulu nei, ke make ole ia" "Pela no ke ala ana mai o ka poe make. Ua kanuia oia ma ka palaho, ua hoalaia mai oia ma ka palaho ole. Ua kanuia oia ma ka ino, ua hoalaia oia ma ka nani; ua kanuia oia ma ka palaho ole. Ua kanuia oia ma ka ino, ua hoalaia oia ma ka nani; ua kanuia oia ma ka nawaliwali, ua hoalaia mai oia ma ka mana; ua kanuia oia he kino maoli, ua hoalaia mai oia, he kino uhane."
                No ia mea, o ke Akua, o ka mea e hiki ia ia ke hookupu mai i ka laau a me na mea kanu a pau, mailoko mai o ka lepo, e hiki no ia ia ke hoala hou mai i ke kupapau kanaka; a ma kana olelo, ua akaka kona manao e hana pela ma keia hope aku.
                4 Ua lohe au, ua olelo iho oukou, Aole he la nui mahope.
                Alia oukou e olelo ai pela. No ka mea, aole paha oukou i ike i na mea e hanaia ma keia hope aku. E ike pono ana anei oukou i na mea a pau e hanaia mai i ka la apopo? Aole paha kakou i ike. Nolaila, e noonoo pono, aole hoi e olelo wale, aole he la nui i kekahi kanawai, aole hoi he hope o ia kanawai, malama no kekahi poe a malama ole kekahi, aole e ahewaia ka poe malama ole, pehea ia kanawai? Aole anei he mea ole? A ina he mea ole ke kanawai, pehea ke ano o ke alii nana i kau ai i ke kanawai? He mea ole no hoi ia. A ina he mea ole ke alii, a he mea ole hoi ke kanawai, aole anei he haunaele, a he ku e, a he kaua, a he inoino ka noho ana? Oia no; pela ke ano o na aina a pau loa ina aole hope o ke kanawai, he haunaele, he ino ka hana ana, aole maluhia iki.
                No ia mea, hea mea mau no i na alii maikai a pau e kau pu me ke kanawai i kekahi hope ke malama ole ia ke kanawai. Pili kekahi uku ana o ke kanawai i ka paahao ana, pili kekahi i ka uku ana i na kala, a i ka hemo ana o ka aina, a pili no kekahi i ka make. A o ka hope o ke kanawai, ea, oia ka mea e maluhia ai kekahi aupuni, i haunaele ole. A o ka la hookolokolo, oia ka la e hoike mai ai i ka poe malama a me ka poe malama ole i ke kanawai. I ole he la hookolokolo, aole he mea e hoomaopopo ai ka like ole o ka poe hewa a me ka poe pono. No ia mea o ka la hookolokolo, oia ka mea e pono ai ke aupuni.
                A ua akamai anei na alii o ka honua nei ma ka hoomau ana i ke aupuni, a ua hawawa anei o Iehova o ke alii nui o na alii a pau? He mea pono anei i na alii ma kela aina ma keia aina ke hookolokolo pinepine i na kanaka, i kinaiia ka hewa, i uluia ka pono, i maluhia hoi ke aupuni, aole anei he pono ia Iehova ke hookolokolo mai i ko ke ao nei i mea e pono ai kona aupuni nui? Auhea ka hewa? Nolaila, ina e mea maikai ka hookolokolo ma na aupuni o keia ao, he mea maikai no hoi ia i ka pau ana o ka honua nei a i ka noho pono ana i kela ao. Owai ka mea e ike pono a e hiki ia ia hoi ke hoole, aole pela? Aole la nui mahope, aole la hookolokolo?
                Nui na mea e akaka ai ka manao, he la nui no mahope. He la hookolokolo no. A ma ka ke Akua olelo, ua maopopo. E heluhelu oukou malaila.
                "Aka, i keia manawa, ke olelo mai nei i kanaka a pau ma na wahi a pau loa, e mihi. No ka mea, ua paa i kona (ko ke Akua) manao ka la e hookolokolo ai i ko ke ao nei me ka pono, na ke kanaka (o Iesu Kristo) ana i olelo ai; ua hoike pono mai hoi ia i ka oiaio o ia mea i na kanaka a pau, i kona hoala ana mai ia ia, mai ka make mai."
                "Aia hiki mai ke Keiki a ke kanaka me kona nani, a o na anela a pau pu me ia; alaila, e noho iho ia maluna o kona noho alii nani. A e hoakoakoa mai na lahuikanaka a pau loa imua o kona alo; a e hookaawale ae ia ia lakou, i kekahi poe mai kekahi ae, e like me ke kahuhipa i hookaawale aku i ka hipa a me ke kao."
                Auhea oukou e ka poe e hoole ana, aole he uhane o ke kanaka, he kino wale no? A me ka olelo ana ae, aole o ke Akua ma ka lani? A me ka olelo ana ae, aole e ola hou mai ke kino a hui hou me ka uhane? Aole hoi he la nui mahope? E noonoo oukou, no ka mea, eia ka manawa naaupo. A ke inaina mai la ke Akua i ka poe e manao ana pela, ke kau mai la ka hoohewaia maluna o oukou, a ke noho nei oukou malalo pono iho o ka hoohewaia, no ka mea, aia no maloko o ka naau kahiko a me ka manao kahiko.
                Auhea oukou, e ka poe naau hoomaloka? He Akua no maluna ma ka lani, a ma na wahi e ae no hoi a pau, o Iehova ka inoa. A he Akua nui o Iehova, aole he Akua e ae, oia no ka Haku maluna o na'lii, oia no ka mua loa, oia no ka hope loa, oia no ke kumu i paa ai na mea a pau, oia ka mea pau ole a mau loa aku no, aole loa oia e pau iki. A no ke kipi wale ana o na kanaka ia ia a me ka haalele ana, ua inaina io mai oia. Aka, ua haawi mai o kana keiki ia ia iho i kalahala no na kanaka, a ua lilo o Iesu Kristo i mea uwao mawaena o ke Akua a me kakou, oi ano ka i make ma ke kea no ka poe hewa e like me kakou nei.
                Auhea oukou, ea, ke kali mai nei Iesu ia kakou a pua, a ke imi mai nei oia ia kakou a pau, a ke ao mai nei oia ia kakou, ke huli mai nei oia ia kakou, ua makemake oia e ola kakou a pau loa. Ea, pehea kakou? Ke kupu ae nei anei ko kakou manao ia ia? Ke makemake nei anei kakou ia ia? Ke manao nei anei kakou e hahai mamuli ona? A ina e hahai kakou mamuli ona me ka manao oiaio aku ia ia, ke hoomau nei kakou ma ka naau hou a me ka manao hou, a ina e mau kakou mamuli o ia mau mea la, ea, ke noho nei kakou malalo o ka hooponoia, a ke kau mai la ka hooponoia maluna pono iho o kakou a pau.
                Auhea oukou? Ke ola nei ka Mesia iwaena o kakou. Owai ka Mesia hou a kakou e kali aku ai? Owai ka inoa ola e ae i haiia mai ma ke ao nei? Owai ke kalahala e ae a kakou e lohe ai? Owai ka mea uwao e ae iwaena o kakou a me ke Akua? Owai ka mea e ae i make ma ke kea no kakou ? Owai ka mea nana kakou i kuhikuhi mai i ke alanui e hiki aku ai i ka lani, a me ke alanui e hiki aku ai ilalo i ka po mau lea? Owai ka mea nana kakou e hoopakele mai kela ao ino aku? Owai ka mea i lanakila maluna o ka make a me ka hewa? Ia wai la i haawiia mai ai ka mana o ka lani a me ka honua nei? Ia wai la ke ki o ka lani a me ke ki o ka lua ahi? Nawai la e hookolokolo i na anela o ka lani a me na anela o ka po? Nawai la e lawe aku ka honua nei a me ka lani mai o kakou aku? Nawai la e heluhelu mai ka buke o ka make a me ka buke o ke ola a ke Keiki hipa? Aole anei ia Iesu wale no keia mau mea? He oiaio no, ia Iesu no keia mau mea a pau loa. Ua i mai ka palapala hemolele, "Oia no ka Haku o na mea a pau."
                O ka malama ana i kana, he naauao ia; o ka hoopili aku ia Iehova, ua maemae ia; o ka paulele maluna ona, ua ola loa oia ia ao aku ia ao aku. O ka hoopili ana mamuli o kana mau kauoha wale no, ua lako ia i ke ola mai keia ao aku a i kela ao.
                Aka, ina e hoomaloka kakou, ea, e loaa auanei ia kakou ka hopeia mea. Ina e hoomau kakou ma ka manao kahiko a me ka naau kahiko a me ka hoole ana, aole akua, aole he uhane, aole he la hookolokolo mahope aku, ua maopopo no he poe kamalii kakou na ka diabolo, a ke hoomakaukau ia ia kakou iho no ka lua ahi a me ka make mau loa.
                Ke aloha aku nei kuu naau ia oukou no ko oukou make ana. Ke menemene nei kuu naau no ko oukou holo kiki ana ma ke ala e hiki aku ai i ka make, a me ko oukou poe ana ma kahi i hookapuia'i e Iehova.
                Auhea oukou? E hele koke kakou io Iesu la, e haalele loa i ka naau kahiko a me ka manao kahiko a me ke kuko kahiko. A hele kakou me ka naau aloha imua ona a me ka haawi io maoli aku ia kakou iho nona, nona wale no, nona mau loa.
                Ano la, heaha ka me i koe? Heaha ka mea pohihihi? Heaha ka mea e kali aku ai? Heaha ka mea e hookaulua aku ai? No ka hemahema anei? No ka ilihune anei? No ka lako ole anei? Aia ia Iesu ka waiwai a me ka hanohano a me ke ola loa no ka uhane.
                Auhea oukou, ea? Ke huki ikaika nei ko'u manao ia oukou, a ke hoololohe nei no oukou. E make auanei paha oukou ma ko oukou hewa, nolaila i palapala iho au i keia manao. Ua pau ko'u ia oukou, o ka oukou wale iho no ka i koe. D. MALO.

                Ua paiia KE KUMU HAWAII ma ka mea Paipalapala a na Misionari, Honolulu, elua hebedoma hookahi pepa, o Wenede ka la e pai iho ai.
                Eia ke kuai ana, hookahi makahiki, $,50, a na mea e lawe i ka pepa a pau.

OAHU: MISSION PRESS.—R. TINKER, Editor. E. O. HALL, Printer.