Ke Kumu Hawaii, Volume III, Number 14, 6 December 1837 — KAI MIMIKI. [ARTICLE]

KAI MIMIKI.

Wailuku, Nov. 8, 1837. Eia keia mea hou ina Wailuku nei. He mea kupanaha loa. Ua pau kekahi kulanakauhale o makou i ke kai. O Kahului ka inoa o ua wahi la; I ka po nei ma ka hora 7 paha kona hina ana. I kinohou, mimiki aku la ke kai, a hiki iwaho he 20 anana paha, a ku iho la e like me he pali la. Moe wale no ia ma ka lepo, aole kai. Aia no malaila ka moku o Kuakini e ku ana iloko o ke awa, a ua ili ia. Kii wale aku na kamalii i ka ia, a kahaha aku la na kanaka i ka emi ana o ke kai, a hea nui aku kekahi poe me ka makau. Aole nae holo aku lakou iuka, me ka manao e pii mai ana ke kai maluna o ka honua. Noho lakou a liuliu iki, a o ka hoi hou mai no ia o ke kai e like me he nalu nui la; pii mai la maluna o ka honua, a holo mauka i 100 anana paha. Eono, ewalu paha, kapuai ka hohonu o ke kai maluna o ka honua ma kela wahi. Pau loa kela kulanakauhale i ke kai i pii mua mai. Hookahi wale no hale i koe, e ku ana ma kahi kiekie iki, 26 na hale i pau i a kai nei, a aia pau na waa i ka nahaha, hookahi wale no koe, ua nui na upena i haehaeia. Ua helelei liilii ua mau hale la no kela wahi keia wahi, iloko o ka loko kekahi, a maluna o ke one kekahi. Elua wale no mea i make i ke kai. He mau luwahine. Pii kekahi o laua la maluna o ke kua o kana keiki, e au ae, aka, ua make i ke anu paha. He

wahine nawaliwali no. Auau maoli kekahi, aka, ua halihaliia iloko o ka loko mauka, a malaila i make ai. Pakele na kanaka ma ka auau maoli. Auau kekahi poe me na kamalii, a halihali kekahi i ka poe nawaliwali, a halihali kekahi poe i ko lakou wahi ukana. Pau na mea i ka poino. He nui loa na ia i halihaliia mauka iloko o ua kai nei. I keia kakahiaka iho maua me Mi. Gelina malaila e nana. Mea e ka popilikia o kela poe, aka manao makou e kokua aku ia lakou. Ua lohe makou, ua puniia Maui nei i keia mea kupanaha, aole nae lohe makou i ka make o kekahi kauhale e ae, maanei wale no ka make. I i mai na elemakule, aole he mea hou keia, he mea kahiko no. Ua pii mai ke kai mamua e like me keia, ua nui no nae keia. L.