Ke Kumu Hawaii, Volume III, Number 20, 28 February 1838 — Page 78

78 KUMU HAWAII. (FEBERUARI,

a ina e lohe kekahi i ko'u leo a wehe i ka puka, alaila e komo aku au io no la, a e ai pu au me ia, a oia pu hoi me au." He pono ke wehe ae i ka ipuka o ko oukou naau, e hookipa ia Iesu, e launa pono ia ia. Mai hooluhi hewa hou ia ia. E hoolohe koke i kona leo, e ae aku ma kona makemake, e komo kona Uhane iloko o oukou e kipaku i na enemi a pau mai loko aku o ko oukou naau.
                Ua lohea kona kikeke ana ma Hawaii. Ua lohea kona kikeke ana ma Honolulu nei, he awawa paapu i na iwi maloo, mai Moanalua a Maunalua. Ua lohe kekahi poe i kona leo. Ua ha mai ka Uhane Hemolele maluna o lakou, Ua hookomoia paha ke ola iloko o lakou. Ua ikea kona mana mai ka pau ana o Detemaba a hiki i keia la. He Ianuari ano e o Ianuari i hala iho ae nei, aole e poina koke ia.
                Ua hoike pinepineia ke ano o na Kauoha, "E mihi i ka hewa:" "E paulele ia Iesu;" E pau oukou i ka hanau hou e pono ai; "E koho oukou i keia la, i ka oukou mea e malama ai.'' A ua hoomaopopo ia kekahi la, o ka la mua o Feberuari nei, he la e akoakoa pu ai me ka ekalesia, o keia mea kela mea i manao ia ia iho ua mihi io i kona hewa, ua paulele io ia Iesu, ua loaa ia ia ka naau hou ma ka hanau hou ana na ka Uhane Hemolele, ua koho io ia Iehova i Akua nona, a ua haawi aku ia i ka naau a me ke kino, a me ka Uhane ia Kristo, i haumana a i kauwa mau nana.
                Pela ka hoomaopopo ana i ka Sabati hope o Ianuari. Pela hoi imua o ke anaina nui i ka po i pau ai o Ianuari. A i ka la mua o Feberuari nei, hele mai kekahi poe ekolu lau, a noho kaawale makai o ka awai. mai piha loa kekahi hapalua o ka luakini, a noho ka ekalesia mauka.
                Alaila ua hoakaka hou ia ke ano o ka mihi io, o ka paulele io, o ka hanau hou, o ke koho i ke Akua, a o ka hoolilo nona, i ole ai e kuhi hewa lakou no ka lohe ole, alaila kaheaia ko na apana elima o keia kihapai, ka poe i manao maopopo, ua oiaio ko lakou mihi ana a me ka paulele ana i ka Haku a me ke koho ana i ke Akua, a me ka haawi ana ia lakou iho ia ia, oia poe, ua kaheaia, e ku iluna. Ku ae la ko keia apana, ko kela apana, a huipu, hookahi tausani, me na haneri elua, a ua kauoha hou ia'ku lakou e malama mau i ka Iesu mau kauoha.
                Ua kuni hewa paha kekahi poe, ua hele walewale mai paha kekahi, ua hookamani wale paha kekahi, o ko lakou make ia, ke mihi ole, o ko lakou pono e mihi koke ano, aka ina i hoike lakou ia lakou iho me ka oiaio ma ko Iehova aoao, pomaikai maoli lakou. E ai pu no Iesu me lakou, e launa pono mai, a e hanai mau mai no oia i kana poe hipa. Ua hoakakaia na kanaha elua e komo i ka ekalesia.
                Auhea oukou e na lau i koe, a me na mano, a me na kini o na mea mihi ole, ahea la oukou e mihi io ai? Ahea la oukou e hoolohe io ai i ka Iesu kauoha.
                E ko Honolulu nei, e hoolohe koke i ka olelo a Iehova. E ko Ewa, e hoolohe koke i ka olelo a Iehova, E ko Waianae, e hoolohe koke i ka olelo a Iehova. E ko Waialua e hoolohe koke i ka olelo a Iehova, E ko Koolau a pau e hoolohe koke i ka olelo a Iehova. E ko Kauai a me ko Niihau e hoolohe koke i ka olelo a Iehova. E ko Molokai, e hoolohe koke i kaolelo a Iehova. E ko Lanai me Kahoolawe e hoolohe koke i ka olelo a Iehova. E ko Maui a puni e hoolohe koke i ka olelo a Iehova, E ko Hawaii, ko Kona ko Kau, ko Puna, ko Hilo, ko Hamakua a me ko Kohala, e hoolohe koke i ka olelo a Iehova. E mihi i ko oukou hewa, e paulele ia Iehova, no ka mea, pehea la oukou e pakele ai i ka make mau loa, ke malama ole oukou i ke ola nui nei? E ku iluna e hoi koke i ka Makua, mai hoomaunauna i ka waiwai o ka uhane i keia makahiki hou, o nele loa oukou i ka la nui o ka Haka.
Na ko oukou makamaka, H.B.

WAIKIKI, Detemaba 26, 1837.
I iho la ko'u naau, kahaha he manao naaupo o ka poe kahiko.

E ke Kumu Hawaii.
                I keia mau la iho nei, hele mai la kekahi kanaka io makou nei i ke kakahiaka nui, e noho ana au, a aloha aku ia makou ia ia, a aloha mai la kela ia makou. I mai la kela ia'u, E hele kaua iwaho. Hele aku la maua a kaawale o maua wale no, i mai la kela ia'u, he manao ko'u ia oe o kaua wale no, elua olua hookahi au. I aku la au, olelo mai I mai la ia, hiaa wau i keia po a ao, aole moe i ke ala wale no, i kuu lohe ana kaumaha ko'u naau, manao au e hele mai olelo aku ia olua. Kulou iho la au ilalo, noonoo iho la, Heaha la keia mea kaumaha? Ninau aku la au, Heaha keia? I mai la kela, O kou uhane ua pepehi i ka luwahine: he uhane kakaola kou e make ana oe. I iho la ko'u naau. kahaha, he manao naaupo o ka poe kahiko, ke kuhihewa nei no ka! Aloha ino. Noho aku la au, nana aku, olelo mai kela ia'u, i mai la, Puka ae no ko olua mau uhane mai loko ae o ka hale a nana aku la iwaho i ka pa o ko ia la uhane, he kapa no kona, a o kou uhane aole kapa, aole malo. Kau iho la ko ia la lima maluna ou, emi hope aku la olua, a he kanaka eleele pili mai la mahope o ia la; akolu oukou. Emi kua aku la oukou, nana mai la ua luwahine la, a ike mai la ia olua, i iho la ia, He uhane oio keia, he kakaola, emi hope aku oukou a kokoke i ka puka o ka hale e noho ana ua luwahine nei. Haliu iho la oukou nana iho la i ka luwahine, ilihia iho la ia, hina ilalo me ka haalulu, ike mai ka poe e noho pu ana, hele mai la kekahi, lomilomi ia ia, a liuliu pohala ae la ia. Ninau iho la lakou, Heaha keia? Aole ona pane mai. Ninau hou lakou ia ia. Owai keia? I mai ia, O na mea nona ka hale, kuhi aku nei au o kuu kaikamahine, aole ka laua, aloha keia mau mea, akahi no au o i ke i ko laua ano, aole a kekahi he kapa no kona, aia iho o ke kane aole ona kapa. Ninau aku la kekahi, Heaha ka hope o keia mea au i ike iho nei? I mai ua luwahine la, e hoaahi oia ka mea e pono ai o ka hoopula ahi, Ninau hou aku la ia, Heaha na mea o ke ahi? I mai la ua luwahine nei, he puhi ka ia, he awa, he kala, he puaa, he aholehole, pau na ia. Elima kapa i kauwewe no ka imu. Ninau hou aku la ia, He mea mau no keia nau? I mai la kela, Ae. Eha mamua, o ka lima keia. Ua olelo aku no au, hoomaloka mai no lakou, ua pau lakou i ka make, eia ka lima. Pela ua luwahine la i olelo ai; hele mai nei au e olelo aku ia olua i lohe olua.
                Pau kana olelo ana mai, I aku au, E! I mai la o Iehova, Aole ou aku e ae imua o ko'u alo. Mai hana oe i ke kii i kalaiia nou, aole hoi i ke ano o ko ka lani iluna, a me ko ka honua ilalo, a me ko loko o ka wai malalo i ka honua. Mai kulou oe ilalo ia lakou, aole hoi e malama ia lakou, no ka mea, owau no o Iehova o kou Akua. Auhea oe, o Iehova ke Akua ka mea nana i hana na kanaka, a nana no i haawi mai ka uhane o kela kanaka, o keia kanaka, a me kela wahine, a me keia wahine, a me na keiki, a me ka poe kahiko, e hiki no ia ia ka lawe aku i ka uhane o kela a me keia, aia no ia ia ka waiho mai. Aloha oe. Hoi aku ia ia, I kekahi la hele aku la au i ka hale o ua luwahine la e noho ana no ia, i aku la au. Aloha oe, a aloha mai kela ia'u, I aku au, e, o Iehova ke Akua ka mea nana i hana na uhane o kanaka e hiki no ia ia ke lawe aku, a ke waiho mai, e haalele oe i keia manao naaupo. Mai hooweliweli oe i kanaka. E haalele oe i keia mea. E mihi oe i kou hewa. O Iesu Kristo ka mea ka mea nana e hoola na