Ke Kumu Hawaii, Volume III, Number 22, 28 March 1838 — Page 88
88 KUMU HAWAII. (MARAKI,
KAHI MELE.
KE KULA SABATI.
1 A wehe ae ka la maikai,
A ala kamalii,
I hea oukou e hele ai?
'Ke kula Sabati.
2 I hea hoi e ao mai ai,
Na keiki makalii,
I naauao, a pomaikai?
'Ke kula Sabati.
3 I hea e hoike ai,
Na kumu kamalii,
I ko lakou aloha mai?
'Ke kula Sabati.
4 I hea e lohe ai kakou,
Ua hewa kamalii,
E hele ana i ka po?
'Ke kula Sabati.
5 I hea oukou e ao ia'i,
O Iesu ka Moi,
Ke Kalahala e ola'i?
'Ke kula Sabati.
6 He nani ka i ke kula nei!
Ko kakou pono, e,
E lohe, pule, himeni,
'Ke kula Sabati. L. L.
Mei. 13 1837.
NO KA LOKOMAIKAI O KE AKUA.
Ke hoomaopopo nei au i ka lokomaikai o ke Akua. I kona hana ana i na holoholona nui a me na holoholona liilii, a me na holoholona laka a me na holoholona hihiu; o ka Elepani, oia ka holoholona nui i oi aku mamua o na holoholona a pau, a me kona noho malie.
Eia kekahi o ke Kamelo, ua oi aku kona ikaika i ke amo i na mea kaumaha a pau a me na mea nui maluna ona. O ka Lio kekahi he lokomaikai nui no kona i ke amo ana'ku i kona kahu a me kekahi mea e ae. O ka Pipikauo kekahi, he lokomaikai no hoi kona, i kona kauo ana i na mea kaumaha a kanaka.
Eia kekahi o ka manu o ka Okekelike, he lokomaikai no hoi kona i kona amo ana i ke kanaka maluna ona. Aole loa e hiki ia lakou ke kipaku aku i keia mau mea a pau, no ko lakou lokomaikai.
Eia kekahi, o ka Liona ua oi aku kona ikaika a me kona huhu i ka pepehi wale aku ia mea'ku ia mea'ku, o ka Laehaokela, o ka Leopadi, o ke Tiga, o ka Pakelani, o ka Bea, o ka Moonihoawa, o ke Kouka, mai ka Liona a i ke Kouka. Ua like pu ko lakou huhu a me ka pepehi wale aku.
I ke ao lakou e hele ai, o ke Kouka hoi, moe ia i ke ao, a po hele ia e pepehi wale aku i kela mea i keia mea.
Nani ko ke Akua lokomaikai i kona haawi ole ana mai i keia poe holoholona huhu pepehi wale aku, ma Hawaii nei. O keia poe holoholona a pau.
Ma na ululaau o Amerika a me Aferika, a ma ka Hema o Asia ko lakou wahi e noho ai.
Pela paha na kanaka pono o Hawaii nei hele no lakou i ke ao a me ka po. ma na ululaau a me na wahi mehameha. Ike no lakou i ke kanaka me ka haawe ia a he haawe ukana paha, pepehi no a make, lawe ae la no i ka haawe ia i ka ukana paha, waiho wale aku la i ke kanaka. Eia na ululaau a lakou i hele ai, o Panaewa, o Mahiki, o Kapuokoaie, o Opeopekoaie (he awawa ia.) oia na wahi pepehi kanaka i kela manawa.
Nani ka lokomaikai o ke Akua, i kona haawi ana mai i ke kanawai aono a me ke kanawai ahiku. Mai pepehi kanaka oe. NA SOLOMONA.
KALUAAHA, Dek. 10, 1837.
Aloha oe e Tineka. Ua loaa iho nei au ka pepa 12 o ke kumu Hawaii, a i ko'u heluhelu ana aloha au i ke Akua i kona hoohuli ana mai i na kanaka o Hawaii ma ka pono. He hana kupaianaha no ia; na ke Akua wale no i haiia. A i ko'u lohe ana i ka pule ana o na kanaka ma ka pono o ko kakou Haku aia ma Waimea, aia hoi ma Hilo a ma Kaawaloa, aloha au i na kanaka o Molokai nei i ko lakou noho hoomaloka ana. O ko'u makemake nui no ia i huli mai koonei kanaka e ola ko lakou poe uhane. Aka he manawa ino loa keia ma Molokai nei. Koho pau loa na kanaka i ka haalele i ka pono ma ka hewa ka malama nui ana i keia manawa.
I ko'u hele ana iho nei malalo ma Kalae me Hikakoke wahine a me na keiki a maua; aole launa iki mai na kanaka hihiu maoli no. Ia maua i hele ai malaila i kekahi manawa mamua launa mai no. Hele mai no a lalau i ka lima me ke aloha mai. Lawe mai no kekahi poe i na makana, i na moa, i uala a i na aha la; hele mai no me ka manao i ke Akua; aka i keia hele ana o maua malaila, pau loa na kanaka i ka noho aku, a hele aku no maua me kekahi hoahanau i kau hale e kamailio pu me na kanaka ma ka pono aole lakou ekemu mai, aole makemake iki e lohe na mea e pono ai na uhane o lakou. Ninau aku au i kekahi kanaka, Owai kou Akua?
I mai pela," Aole o'u Akua''.
Ninau hou au ia ia i kona uhane; hoole mai ia aole ona uhane, aole ona noonoo iki, aole pule. Noho wale iho no me he ilio wale la no. A pela no na kanaka a pau a'u i ike ai, aole lakou i makau i ke Akua. Ekolu la ekolu po o ko makou noho ana malaila, aole hoi loaa iki ia'u ke kanaka e makau ana i ke Akua. Lokahi io no ka manao o lakou a pau ma ke alanui o ka make. Nui no ko'u aloha i na kanaka, e ake au e loaa ia lakou ke ola, aole nae lakou i makemake. Nani no ka paakiki o kanaka, aole mea e palupalu ai, o ka Uhane Hemolele wale no. Nolaila auhea ka Uhane Hemolele me he ua nui la i mea e hoomakaala mai i kanaka i mea hoi e hoohanauhou mai ia lakou.
Eia kekahi; I ko makou hoi ana mai lalo mai ikaika no ka makani a make e ke kai, mau ka wa. Nolaila haalele maua me Davida ka waa aia ma Kamaloo a hoi loa mai no ma ka lio. Hoi hou aku la ka lio e lawe Mi Hekakokewahine a me na keiki elua. Hiki aku ka lio io lakou la, ee no ia maluna o ka lio a me kekahi keiki, a holo mai a hiki i kekahi pa pohaku he pa haahaa no, aole nae he puka; lele ikaika mai ka lio i ka pa, o ka haule iho no ia o laua maluna iho o na pohaku, pakele ke keiki; aka ua eha ka lima o kona makuwahine aole pono ia ia ke lawelawe iki. Ma ka lokomaikai wale no o ko kakou Haku ko laua pakele ana i ka make.
Eia kekahi; Ua ano e iho nei ke kai, ma ka 7 o ka la o Novemaba ahiahi poeleele, emo ole ka maloo ana o ke kai. I ke kai nui ka maloo ana'e. Ua maloo loa, o ke one a me ke koa wale no i koe. E lawa iana kekahi poe aole liuliu iki mai a hoi hou mai ua kai la me ka popoi nui mai i ka aina; komo no i kauhale a pau i ka wawahiia kekahi mau pauku o na kuapaa eono kapuai ke kiekie o ka paa a ewalu paha ka laula. Ekolu no ka emi ana o ke kai, a ekolu hoi ana mai, aole i ikeia keia mea kupaianaha ma Molokai nei mamua. Emi iki no mamua aole loa e like me keia. Kapa aku na kanaka he kaiakahinalii, aka ua kuhihewa ko lakou manao, no ka mea hoole mai o Iehova aole ona e lawe hou mai i ke kaiakahinalii maluna o ka honua.
Na'u na HIKAKOKE.
OAHU: MISSION PRESS. - R. TINKER, Editor. E. O. HALL, Printer.