Ke Kumu Hawaii, Volume III, Number 22, 28 March 1838 — HE AHI MAI KA LANI MAI. [ARTICLE]

HE AHI MAI KA LANI MAI.

Laie, Feb. 20, 1838. He la Sabati ia. A ia po iho, hoopuka mai la o Iehova i ke ahi mai ka lani mai maluna o kekahi hale, aia i ka hora akahi a me ka hapalua. He mea kupanaha ka hana a ka Haku ia po. Eia kana hana. He ahi mai ka lani mai a komo iho la ma ka wā kihi o ka hale, loaa iho la na wahine malalo o ia wahi i luna o ka hikiee, a make iho la ka ilio ma na wawae o laua, a lilo aku la na wahi kapa i, ka ili a me na wahi lole ma ka paia, a maule iho la ke kaikamahine, a nana aku la ka makuakāne e aa mai ana na wahi kapa o laua,auwe iho la ia, “Auwe| kuu kaikamahine!” No ka ua no ka kēia hekili, a kū ae la ia, a hapai i ke kaikamahine, a puka la iwaho a pakele laua, a me na ilio elua, eia na inoa o laua o Kaawi ka makoakane, o Ahukini ke kaikamahine. Aka hea aku la o Kaiwi, “Auhea oukou e, mamamake maua e! Kahea maila! lakou mai kekahi hale, hele mai. Kahea hou mai la laua, “Aole maua e hiki aku ua make kuu kaikamahine.” I aku la lakou i nui ke aho a hiki ia nei. A holo aku la kekahi kanaka a loaa laua, i aku la ia, E haele aku. I mai la ia, “E hāpai aku oe i kui kaikamahine." I aku la ia, “E haawe ma kuu kua.” I mai la ia, “Aole e hiki ua makeloa." A hapai aku la, a hoi aku la lakou a hiki ma kekahi hale, a hoaia ke kukui iloko o ka hale, a lomiia iho la ka mea i make a ola ae la. Eia na mea i make, a me na mea i ola, eiwa puaa, hookahi ilio, hookahi moa, elua waa, hookahi upena a me na buke, o na mea i ola malalo o ia hale,

elua wahine, elua ilio, eha moa, hookahi puaa. He mea kupanaha ka hana a ke Akua i kona lawe ana i na holoholona, a waiho mai no i na wahine, inā paha he manao luku kona, i na pahā ua make keia mau wahine a me na kanaka a pau loa ma Laie nei. Aka o kēia hana a ke Akua ma Koolau nei he leo no ia e kahea mai ana i ka poe hookuli a me ka mihi ole, a me ka hoolohe ole, a me ka paakiki o ka naau me he mau ala la no kahawai la. Ua hea mai ka leo o ke Akua mai ka lani mai, e ka poe hoomaloka o Koolau nei e huli mai oukou, no ke aha la oukou e hoopanee anei ai? i na i pololi oukou e hoopanee anei oukou i ka ai, mai hoopaakiki ia oukou iho. Pela mai ke Akua i kahea mai ai. Aole no Koolau wale no kēia leo, o ka poe i lawe i kēia Kumu Hawaii e heluhelu oukou me ka noonoo nui, a me ka hoolohe aku ia Iehova ka mea nona ka mana e hiki ke hana mai i na hana kupaianaha a pau loa. Na Keliihuluhulu.