Ke Kumu Hawaii, Volume III, Number 24, 25 April 1838 — Page 95

1838.) KUMU HAWAII. 95

                Eia kekahi mea a'u i ike ai, aole molowa keia hoahanau. Ua hele pinepine au i kou hale, aole au i ike ia ia e moe ana ma ka moena i kona manawa mai ole. Ua ike oukou, he kanaka ikaika i ka hana o Kawailepolepo. Ua hana pinepine oia ma ka aina - ua hana oia ma ke kula - ua hana oia ma ka laau; a i kekahi manawa, ua imi ikaika oia ma na mea e naauao ai. Aole nae ia i imi i kana mau mea iho. Aole ia i kukulu i hale nui nona iho — ua imi oia i na mea e pono ai ka aina. I kona noho ana i alii o Wailuku nei, ua hoohalike ia ia ia iho me he kauwa luhi la, ua ike pinepine oia i ka pololi, a me ka maluhiluhi, a me ke kaumaha. Ua hoohewa au ia'u iho no kuu noi ikaika ana ia ia e noho konohiki ma keia aina.
J.S.G.

HE MANAO NINAU.

                Maraki 6, 1838. Auhea oukou e na hoahanau mai Kauai a Hilo nei, he wahi manao ko'u ia oukou, e na hoahanau, ma Oahu a ma Kauai, ma ke aha la ko oukou Bapetizo ana? ma o Iesu la anei? ina ma o Iesu la ko oukou bapetizo ana? no ke aha la oukou i hana ai ma ka mea ku ole i ka pono? Ke puhi nei oukou i ka baka, he mea ino loa ia, o ka baka, o ka awa, o ka rama, o ka uala awaawa, o ke ki kekahi, o na mea pono ole a pau.
                Ina ua paa ko oukou manao malaila, ua pono no oukou ke inu i ka auhuhu, a me ka ipu awaawa, a me na mea awaawa a pau. E heluhelu iho oukou i ka palapala Hemolele, ma ka Epeso 4:31. E hookaawaleia na mea awaawa a pau mai o oukou aku. Isaia 5: 20. Auwe ka poe kapa aku i ka hewa he maikai, a i ka maikai hoi he hewa. Ka poe i manao i ka pouli, he malamalama, a i ka malamalama hoi he pouli, a i manao i ka awaawa he ono, a i ka ono he awaawa. Ma Luka 1: 15. Aole hoi i ka mea awaawa. Ua hoopailua o Iesu i na ino a pau. Na'u na KEANIHO.

HILO, Maraki 21, 1838.
                Auhea oukou e o'u mau kaikuaana, a me o'u mau kaikuwahine, a me o'u kaikaina iloko o ka Haku o Iesu Kristo, mai Hawaii a Niihau.
                Eia ko'u wahi manao ia oukou a pau loa. Ua kahaha iho no hoi au i ko'u ike ana aku i kekahi mea pono ole iwaena o na hoahanau o kakou. Eia no ia. I ko'u ike ana aku i kekahi poe hoahanau e hiamoe ana, a e kunewanewa ana, a e lelehu ana na maka iloko o ka luakini o ke Akua i ka la Sabati. O ka poe hooikaika mawaho, ua makaala lakou. Ke manao nei au, o kela hiamoe ana o na hoahanau, i ko'u manao, he kumu hoohalike ia no ka poe mawaho o ko Iesu ekalesia, e keakea ana ia lakou, a e pani ana i ka puka.
                Eia kekahi mea a'u i ike ai; O ka noho wale ana o na hoahanau me ka hana ole, me ka hiamoe wale iho no i kekahi la me ka hana ole, hana uuku no nae ke makemake, aole nae hoomau i ka hana i na la a pau. I mai o Paulo ma 2 Tesalonike 3: 10.
                "No ka mea hoi, ia makou i noho ai me oukou, ua olelo aku makou ia oukou penei, ina aole e hana kekahi, aole ia e pono ke ai."
                Eia kekahi; O ka hoaikane, a me ka hoowahine, a me ka hookane ana o na hoahanau me kekahi poe hoalauna e. No ke aha? no ka makemake io anei, a no ke aloha io anei? I ko'u manao ana, aole no ke aloha maoli, aka, no ka puniwaiwai no. Eia ka pono, e aloha aku i ka poe ilihune maoli, a me ka mea nawaliwali, a me ke keiki makua ole, a me na wahinekanemake ilihune, aole i ka poe waiwai wale no, no ka mea, he mau hoaloha pu kakou a pau kekahi me kekahi. I ko'u manao ana, he hana naaupo loa kela.
                Eia kekahi; O ke kamailio pu ana o na hoahanau i ka la Sabati; i kela mea i keia mea o ke ao nei, i ka waiwai paha, i ka aina paha; i ka ai, i ka ia, a me ka hanohano paha; o kela olelo wale ana no, ua like ia me ke kanaka e hana ana me na lima i na la eono.
                Eia kekahi mea pono ole a'u i ike ai, a i lohe ai no hoi; O ka hoi hope ana o kekahi poe hoahanau i ke puhi baka, a me ka moe kolohe a me ka aihue, a me ka hoopunipuni, a me ka ona. No ke aha? no ka pololi anei i puhi hou ai i ka baka, a no ka nele anei i aihue ai, a i hoopunipuni ai, a no ka wiwi anei o ke kino ke noho malie iho. I ko'u manao ana, no ka manao kiekie paha, a no ka hoapono ana ia ia iho.
                Auhea oukou, e o'u mau hoaaloha. Mai kaumaha mai oukou i keia, aole no ka hoohewa wale aku keia, aka, no ka hilahila maoli no, a me ke kaumaha nui.
                Eia nae ko'u manao ia oukou. E haalele ae kakou i na hana o ka pouli, a e aahu iho kakou i ka malamalama, e hele me ka mea e hele ana i ke ao.
                Pono ia kakou e hookaawale ae ia kakou i ua mau mea ano ino la, no ka mea, o kakou ka poe i pu kaulaia a eo, ua paiia na lima, a ae na waha lilo kakou. Ma ka olelo o ke komo ana i ka ekalesia kakou i lilo ai.
                Auhea oukou, e o'u mau hoahanau, E ala ae kakou mai ka hiamoe ana iloko o ka palaka, e ku ae, a e hele io Kristo la, i ola kakou a pau loa ia ia i ke ao pau ole. Amene.
Pau keia wahi manao.
Na'u na SAMUELA HAANIO.

WAIKIKI, Feberuari 23, 1838.
                E kuu hoahanau aloha e Davida Pa, makemake au e hoike aku ia oe no keia oihana a ka Uhane Hemolele i keia makahiki hou ma Honolulu nei, a mai Moanalua a Maunalua i keia makahiki. Eia ka mua. I ka pau ana o Detemaba, a hiki i ka la mua o Ianuari a mailaila mai a hiki i keia la, ua hoike pinepine ia ke ano o na kauoha, ke Kauoha kahiko a me ke Kauoha hou. E mihi hoopailua i ka hewa, e manaoio ia Iesu a e pau oukou i ka hanau hou i pono ai Ua hoikeia ka hope o ka poe paulele a me ka poe i hanau hou ole ia o ka lua ahi pio, malaila e uwe ai a e uwi ai na niho iloko o ka lua ahi, oiaio no ko lakou hope, Hoikeana 21: 8. Aka, o ka poe hopohopo, a me ka poe hoomaloka, a me ka poe i hoopailuaia, a me ka poe pepehi kanaka, a me ka poe moekolohe, a me ke kilo, a me ka poe malama i na kii, a me ka poe wahahee a pau, e loaa ia lakou ko lakou puu ma ka loko e aa mau loa ana i ke ahi a me ka luaipele, oia ka lua o ka make. Hoikeana 20: 14, 15. Ua hoikeia ka hope o ka poe pono, Hoikeana, 22: 5. Aole po malaila, aole hoi make kukui, a me ka malamalama o ka la, no ka mea, na ka Haku na ke Akua no e hoomalamalama ia lakou, a e lilo lakou i alii mau loa, i ke ao pau ole. A ua hoikeia ko ke Akua aloha nui i ko ke ao nei. A i ka la 28, o Feberuari i ka Wenede i ka po i ka hora 7, hoike ke kumu i ke pooolelo ma ka Ioane 3:16. No ka mea, ua aloha nui mai ke Akua i ko ke ao nei, nolaila ua haawi mai oia i kana keiki hiwahiwa, i ole e make ka mea manaoio ia ia, aka e loaa ia ia ke ola mau loa.
                A hoike mai no ke kumu i na mea maloko o keia olelo.
Eia ka mea akahi 1. Ua aloha nui mai ke Akua i ko ke ao nei.
Eia ka lua, 2. Ua haawi mai ke Akua i kana keiki hiwahiwa i ko ke ao nei.
Eia ke kolu, 3. Ina i haawi ole mai ke Akua i kana keiki, ina ua make mau loa ko ke ao nei.
Eia ka ha, 4. Ma ka manaoio i ke keiki a ke Akua e pakele ai.