Ke Kumu Hawaii, Volume IV, Number 6, 15 August 1838 — Page 24
24 KUMU HAWAII. (AUGATE,
Iehova me kou naau a pau, a me kou ikaika a pau," oia ka hoomaemae ana ia loko o ka naau. No ia mea, mai manao nui kakou i ko waho pono, a me ko waho maikai, no ka mea, he mea pau wale keia mau mea a pau a kakou e ike nei, a he mea no hoi e make ai ka uhane maloko o ke ahi a mau loa, aia hoi o Gehena, penei, "O ka manao nui ana ma ke kino he make ia, aka o ka manao ana ma ka uhane he ola ia a me ka pomaikai mau loa."
Ina i manao nui kakou i ka pomaikai mawaho, aka he apiki oloko o ka naau, alaila ua kaumaha loa ko kakou hoopunipuni maluna iho o kakou a pau, aole loa kakou i hoopomaikai ke hooikaika kakou mawaho wale no o ko kakou mau kino, no ka mea, aole he ikaika maloko o ko kakou mau naau.
Ina paha i loaa ia kakou ka pomaikai, a me ke alohaia mai imua o ke alo o ke Akua ma kona aupuni nei, ma ka hooikaika kino wale no, alaila, ua oi aku ka pono o kekahi mau holoholona ana i hana mai ai, no ka mea, ua hana lakou me ka ikaika nui mawaho o ko lakou mau kino, e hali ana hoi i na ukana kaumaha a kanaka ma keia ao.
Nolaila, he mea pono ia kakou a pau loa e hooikaika nui ma ka naau, me ka hilinai nui aku maluna o Iesu Kristo ka mea e ola mau ai ko kakou mau uhane i ke ao pau ole, a me ka malama pono e like me ka kakou olelo ana.
No ka mea, o ke kanaka i malama ole i kana olelo iho, oia kona mea e paakiki mau loa ai ma ka hewa a hiki i kona la make, ke hoohuli ole ia mai oia e ka Uhane o ke Akua, no kona hoino hala ole ana ia ia.
Auhea oukou, e na haumana o ke kulanui nei, a me ka poe e hoolohe mai ana i keia manao? Ua lohe oukou a pau i ka hewa a me ka pono ole o ka hai i ka manao me ka hoohiki pu i ko ke Akua inoa weliweli loa, me ka noonoo pono ole ia la iho, i kona kupaa a me ka ole.
No ia mea, i kuu lohe ana i ka manao o kela mea keia mea o kakou e hoohiki ana ma ko Iehova inoa makau, makau iho la au, a olioli no hoi ke oiaio ka hana aku e like me ka ka waha i olelo ai.
Aole ma ka halawai hai manao wale no ka pili ana o keia manao ia kakou a pau, aka, ma na halawai a kakou e hoike ana i ko ke Akua inoa weliweli me ka hopohopo ole.
E na haumana, ua maopopo ia oukou a pau ko ke Akua makemake, aole ona makemake i ka mea noho wale me ka manao ole e like me na holoholona, ka noho wale iho me ka ike ole i na mea a pau e pono ai kona noho ana.
No ia mea, he pono i kuu manao e imi kela keia i manao nona, e hoopili ana i ke kau wahi o kona manao i ko ke Akua manao, a me kona makemake, no ka mea, oia ko ke Akua makemake. Aka, eia ka mea pono ole i kuu manao, o ka hoopili i kona manao me ko ke Akua makemake a me kona manao, me ka hooko ole e like me ka mea a ka waha i olelo ai.
No ka mea, o ka nui o na haumana a pau o kakou ma keia kula, ua ao mai lakou ia kakou a pau e malama i ko ke Akua makemake.
No keia mea, kupu mai la ka manao makau iloko o'u, no kuu ike ana aku i kekahi poe o kakou e hana ana i na mea kupono ole i ko ke Akua makemake, me ka malama ole i kana mau kauoha. NOHOUA.
KAHI MELE.
KE KAKAHIAKA.
1 Ala, kuu keiki, ala mai,
E nana i ka la laelae,
E nana i na kulu hau
I luna o na lau.
Kani ka bele, e ala'e,
E kuu keiki makamae.
2 Komo ke kapa maemae ou,
No ka mea, ua pau ka po,
Puka mai ke ao maikai
No ka Haku mai.
I ke ala'na, hoomaikai,
I ke Kahu e ola'i.
3 Hoolea aku ia Iesu,
No ke ola ma ka po;
Pule a e hoomanao
I ka Haku mau;
Pela oukou e lilo ai
I mau keiki pomaikai. L.L.
Lahainaluna, Maui, Iune l9, 1838.
HE WAHI MANAO ALOHA I NA KUMUAO HAWAII.
Aloha oukou e na kumuao mai Hawaii a Kauai; He wahi manao aloha wale no ko'u ia oukou no ko kakou noho pu ana i kekahi manawa, a hiki mai i ko oukou la i hookaawaleia'ku ai mai keia wahi aku. He nui no kuu makemake e palapala pakahi aku ia oukou a pau loa, aka, aole nae i hiki. Ua hooleia mai au e ka pepa a me ka moku nana e lawe aku ka palapala. No ia mea manao au e palapala ma ke Kumu Hawaii i ko'u manao aloha ia oukou a pau e noho ana ma kela wahi keia wahi o Hawaii nei, mai Hawaii a Kauai.
Mai manao oukou ua make makou ka poe ma Lahainaluna nei, aole, eia no makou ko oukou mau hoaloha luhi ke noho nei no. Aole loaa ia makou ka oukou mau palapala a me ko oukou mau manao ma ke K.H, kakaikahi wale no ka poe a'u i ike ai ma ke K.H. Ua like pu paha oukou me au nei.
Aole ano e loa o Lahainaluna nei i keia manawa, oia mau ana no ka honua, a me ka lepo, a me na pohaku, a me na mea ulu, a me na awawa kahawai.
Ua nui ko ke Akua aloha ana mai ia makou maanei. Ua haawi wale oia ia makou i na mea a pau e pono ai ko makou mau kino. Ua loaa mai ia makou ka noho lako ana ma keia ao; aole nae ia he mea ia e pono ai ko makou mau uhane. Eia kahi mea a'u i noonoo ai no ko kakou noho ana. I ka wa o kakou i noho pu ai maanei, ua like wale no ko kakou noho ana. No ia mea, kahaha kuu naau i ka molowa loa o kela mea keia mea o kakou a pau. No ia mea, manao iho la wau penei: Ina he mea hiki i kela mea keia mea ke palapala aku i kekahi i kekahi, me ka hoakaka aku i ke ano o kona noho ana, e like me ka noho ana o na misionari; ina aole paha e nalowale loa kakou. Manao wau ma ka palapala, malaila paha kakou e halawai pinepine ai. Eia hou, Mai noho aku oukou mamuli o ka hana kua ole mai; aka, e noho oukou me ka makaala a me ke kuoo, e hoolilo ana ia oukou i mau Liona, e holoholo ana ma kela wahi keia wahi, me ka hooikaika loa i ka oukou mea i hele aku ai e hana.
He pono ia oukou ke noonoo mai i ka mea e pono ai ko kakou noho ana ma keia hope aku, a e helelei ole ai na kula o keia pae aina. Na oukou no e noonoo pono i ka mea e mau ai ke ao ana, a me ka mea e pau koke ai; no ka mea, aole makou i ike pono i ke ano o ka noho pu ana me na haumana, a me na konohiki; o oukou no ka poe i maopopo. Ua ike oukou i ko oukou noho lako ana, a me ko oukou noho popilikia ana. Aloha oukou a pau loa mai Hawaii a Kauai, a me ka oukou mau wahine, a me na kamalii a oukou. E malama i ka Haku, a me kana mau olelo a pau loa. Mai hoopili mea ai, aka e noho me he mea la i makaukau no ke kaua, a na ke Akua o ko kakou kupunakane e malama mai ia kakou.
Na ko oukou pokii. KALAMA.
KUMU HAWAII. Elua hebedoma hookahi pepa, a he iwakaluakumamaono mau pepa i ka makahiki, he hapalua wale no ka uku.