Ke Kumu Hawaii, Volume IV, Number 11, 24 October 1838 — Page 44
44 KUMU HAWAII. (OKATOBA,
HE HIMENI.
1 E kahea aku ia Iehova,
Ke Akua nani kamahao,
Ke Lii pookela mau,
Ka wai nani oia mau.
2 Nana no i hana kakou nei,
A me na mea a pau,
Oia ke ahonui mai
Ia kakou i ku e aku ai.
3 He aloha kou ia makou,
He ahonui wale mai
Ia makou, i noho naaupo ai,
O oe ke huikala mai.
4 Eia wau ke hele nei
Ma kau aoao mau,
He nani, he ihiihi no,
O oe ka Haku mau.
5 Ke Lii maluna o na puu,
A me na mauna a pau,
Na kai, na aina; na moana,
A me kolaila mau mea a pau.
6 E hiilani lakou ia oe,
Ka mea nana lakou e hana.
E hauoli hoi lakou ia oe
No kou lokomaikai mai.
7 Iesu e, e ahonui mai
Ia makou nei ka aia.
I ola loa i kela ao,
Na uhane o makou.
Na KAUWAHI, He uuku.
Auhea oe e Kauwahi e ka mea i kakau iho i keia himeni. Ke hoakaka aku nei au i ka pono a me ka hewa o kau himeni.
Eia ka hewa, aole nae he hewa ma ka heluhelu ana he pono no ia, aka eia, ina i hooliloia kau himeni i mea mele ma kekahi leo mele paha aole e hiki, Ina e hana ia ma ka leo o ka Himeni 104, a me na mea like pu me ia himeni, a pela no ka leo o ka himeni 15, a me na mea like, aole no e hiki.
Ina e hana oe i kau himeni me ka leo o ka himeni 15, ma ka pauku akahi,
"E kahea aku ia Iehova."
A hana oe, aole e hiki, no ka mea, ewalu hopunaolelo ma ka lalani mua o ka himeni 15, a he aiwa kau, nolaila hiki ole, pela ka lalani 2.
"Ke Akua nani kamahao.''
Eiwa no leo ma kau, a eono na leo ma ka himeni 15, nolaila ponoole o kela mea i kau ia ae mamua ae o ka mea leo penei, "Keola, 8, 6.'' O ka walu, e awalu hopunaolelo ia ma ka lalani mua o ka pauku himeni, o ke ono, eono hopunaoleloma ka lalani lua, a ua like ke kolu me ka mua, a o ka ha me ka lua, pela ma na mea like. Pela hoi ka himeni 104, "Ka haneri 8." He mau mea like lakou a pau, o ka mua o ka lalani a me ka lua, a me ke kolu a me ka ha; ewalu hopunaolelo ko lakou a pau. Pela no ma kela himeni keia himeni i hanaia. Ina i kau keia hoailona 8, 7, 4, ma ka mua o ka lalani, 8, ma ka lua 7, ma ke kolu 8, ma ka ha 7, ma ka lima 4, ma ke ono 8, pela ma kela himeni keia himeni i kauia ka hoailona no ka leo, oia iho la ka hewa o kau himeni la e Kauwahi keiki uuku loa ma ke kulanui. Aole no he hewa, aka, ina e hooliloia i mea hoolea i ke Akua aole pono.
O oukou kekahi e ka poe e makemake ana e himeni hoolea i ke Akua, pono ia oukou ke hana pololei make ano o ka hoailona, a ina e hana i himeni a pai ma ke K. H. pono e hoolilo i kekahi leomele a hoolilo i ka oukou olelo i himeni alaila pono, a kau no hoi i ka hoailona leo maluna no ka mea, ina e makemake kekahi mea e himeni ma ia mea ua pono ka hana ana.
Na HOOHANO.
Mokuna III.
AOLE loaa i ka mea hana, ka popilikia.
2 A me ka luhi a me ka poino,
3 A me ka ahewaia, a me ka hoinoia mai,
4 E like me ke kanaka mauwele.
5 O ke kanaka mauwele, hana ole,
6 Ua hoahewaia oia no kona malama ole ana i ka ke Akua olelo,
7 A loaa no hoi ia ia ka poino a me ka luhi a me ka eha pono ole o ka naau.
8 A ia ia no ka hilahila a me ka heneheneia mai.
9 Ua pololi ka lima o ke keiki malama ole i ka olelo a kona makua, a hookuli no.
10 Ua loaa ia ia ka noho ilihune ana a me ka hoowahawahaia.
11 Moe wale iho no ka mea ilihune, me ka manao ole i ka mea e pono ai oia a me kona mau ohua.
12 Loaa no ia ia ka ilihune,
13 Aole ona kapa, aole ona moena, aole wahi e waiho ai kona mau wawae:
14 E hele wale aku no oia ma na ipuka hale e makilo wale ai.
15 E like me na ilio, ka hele wale aku no ia hale aku ia hale me ka hilahila ole.
16 E noi wale aku no oia i ka ai a ka mea hana;
17 A i ole, e aihue aku ao oia, me ka makau ole, a me ka wiwo ole.
18 Aia ma kona kua a ma kona alo ka puu mai hehe nui,
19 E nahu ana ia ia i ka po a me ke ao.
20 A ma kona wahi moe na mea ino a me na mea haumia he nui wale. KALAMA.
HILO, Okatoba 10, 1838.
No ka hoike ana o na haumana o ke kulanui ma Hilo nei.
I ka malama Okatoba i ka la 3 o ia malama, mahope iho o ka aina awakea, i ka hora 2 ka hoomaka ana o ka hoike.
Eia ka hana mua, o ka heluhelu. Ua noho like na haumana ma na papa, a i ka heluhelu ana, ua ku pakahi mai kela haumana keia haumana e heluhelu, elua pauku e heluhelu ai.
A ma ke kakau lima ma ka papa eleele. Penei ka hana ana. Ua hoakaka pono ia ka hookaawale pono ana o na huaolelo kekahi, a me kekahi, a me ke kau pono ana o na hua nui ma ko lakou wahi pono e kau ai, a me kahi e hoomaka iho ai e kakau i ka palapala, a me ka hope o ka pau ana o ka palapala, a me kahi o ka inoa o ka mea nana ka palapala, a me ka mea nana i kakau.
Eia kekahi, Ua hoike mai no hoi i na mea a lakou i kakau ai ma ka pepa keokeo i na la kula. A po ia la; a kakahiaka ae, i ka hora 9 o ia la, hoike hou no. Aia ma ka holoholoholona kekahi poe, a me ka helu kakau kekahi papa. Aia ma ka mokuna elua: a hiki i ka mokuna ehiku: me ka ninau kikokikoi ana aku no, a me ka hoakaka pono mai no, i ke kakau ana, a me ka olelo mai no, aia ma ka lima akau e hoomaka ai, ma kahi o na akahi, a me kahi o na umi, a me kahi o na haneri, a pela aku no a hiki i ka pau ana, a pau ia.
A mahope iho o ka aina awakea, hoike hou, ma ka Hoikehonua, a me ka niele o ka palapala honua kekahi papa. A i ke ahiahi poeleele iho o ia la, hoike hou. Aia ma ka Himeni pakoli. A kakahiaka ae, i ka iwa o ka hora hoike hou ma ka helunaau, a pau ia, ma ka mooolelo Hawaii kekahi. Elua la o ka hoike ana, alaila pau.
Eia kekahi. O ka poe i hele mai i keia hoike ana, o na hoahanau, a me na kumu, a me kekahi poe e ae no hoi i makemake mai, a pau ia, alaila, hoomaha iho la makou, i hookahi hebedoma ka hoomaha ana.
Eia kekahi, Ua loaa ia makou keia hoike ana ma ka honua nei, aole nae i maopopo loa ka loaa hou ana aku o ia hoike hou ana mahope.
A o keia hoike ana, ke uuku, aka, o kela hoike ana aku i ka la mahope, he nui loa aku ia, alaila, e hoike ai kela mea keia mea o kakou a pau i kana iho i ke Akua. Ua pau keia wahi manao. Na'u na S. HAANIO.
KUMU HAWAII. Elua hebedoma hookahi pepa, a he iwakaluakumamaono mau pepa i ka makahiki, ke hapalua wale no ka uku.