Ke Kumu Hawaii, Volume IV, Number 12, 7 November 1838 — Page 48
48 KUMU HAWAII. (NOVEMABA,
KAHI MELE.
NO KA NAAUPO.
O oe e ka naaupo.
Ke Kumu nana e ao mai i ka poe hewa.
He alakai makapo oe no lakou.
He alihikaua no hoi no lakou.
He mea nana e kuhikuhi mai ia lakou.
Aia ke ola ma o aia ka make ma o.
Aia ka! he hoopunipuni,
E ka hewa, Ka makua o ka poe aia.
Ka mea nana e kuhikuhi mai ia lakou.
Owau ke ola, Owau ka mea nana e hoopai i ka poe manaoio ole mai ia'u.
Aia ka! he lapuwale kou manao.
Ao mai oe me ka maalea.
Kuhikuhi mai me ka pololei.
Ao mai me ke akamai loa.
Aia ka! he maalea ko'u, akamai oe i ke ao mai.
Auwe, he lapuwale oe,
Hookohukohu hoi i maka oe e ka hewa
O oe hoi e ka make.
Ke liikoa o ka lua ahi.
Ke lele mai nei oe me he Liona la.
E imi ana i kana mea e ale ai.
E like me ka Liona wahine e moe ana ma kalua.
Pela no oe e ka hewa.
Ke lele mai ana no oe me he Liona io la.
A ke ale io mai nei no oe ia e like me kou manao.
Lahainaluna, Oka. 18. Na PAALUA
NO KA LA HOOMAIKAI.
E HOMAI AKU I KE ALOHA I KE AKUA.
Aloha oukou e o'u mau hoalawehana ma keia kihapai mai Hilo a Kauai, na mea i hoounaia mai i keia aina, mai Amerika mai, no oukou ka maluhia a me ke alohaia mai e Iesu ko kakou Haku e ola'i. Ua ike kakou i kekahi hana a ko kakou mau makua ma Amerika, i na makahiki i pomaikai nui ai lakou, ua hoomaopopo lakou i kekahi la i ke kokoke ana o ka pau ana o ka makahiki, i la e hoomaikai nui ai i ke Akua, no kona lokomakai. Oia hoi kekahi hana a kakou i hauoli ai i ka wa i noho pu ai me ko kakou mau makua. Aole anei he pono no kakou e hana hou ma ia hana ma keia pae aina? Ina he pono i ko oukou manao, e hana paha kakou i ka malama hope o keia makahiki, i ke ono o ka la o Detemaba.
O ko kakou poe makemake e hoolilo ia la i la hoomaikai, e hauoli ai a e mohai aku ai i ke aloha i ka Haku he mea pono no ia i ko makou manao; a o na hoahanau ekalesia, a me na hoaimi i ke ola e makemake e hui pu me kakou he pono no ke hana pu a e hele nui i na luakini e hoomaikai pu i ke Akua no kona hoomalu ana ia kakou i keia makahiki, a me na la a pau o ko kakou ola ana, a hoolohe pu i kana olelo maikai.
O ko'u manao no he pono no na haumana a pau a Iesu ma keia pae aina e hoomaikai nui i ka Haku ia la, no kona lokomaikai, no kona malama ana mai i ko kakou mau kino, i ko kakou waiwai, i ka kakou mau keiki, i ko kakou mau uhane; no kona hoomalu ana i ke aupuni; no kona hoola ana i ke lii a me na lii, a no kona ninini ana i kona Uhane i ulu ai ka pono ma keia pae aina, i mahuahua na ekalesia, a i emi ai ka naaupo, ka hiamoe, ka palaualelo, ka uhauha a me ka haunaele; no ka lanakila ole o na enemi, no ke koe ana mai o ka Sabati hoano me ka maluhia, no ka laha nui ana o ka ke Akua olelo; no ka holo lea o ke pai palapala, a me ka pomaikai o na kula; Oia kekahi mau mea e hoomaikai ai kakou i ke Akua ia la, me ke kakali pono i na mea oi nui aku ia makahiki aku.
He nui na makahiki o ko kakou noho maluhia ana aole i haule kekahi oho o ko kakou mau poo i ka lalauwale o na enemi, ua mahuahua nae ka hana a me ka pomaikai i keia makahiki; e hiki no ia oukou ke olelo pela, no ka lua ole o ko Iehova aloha ia kakou. Nolaila, "E mohai aku i ke aloha i ke Akua."
Aloha oukou a pau loa.
H. BINAMU.
Honolulu, Nov. 8, 1838.
HE OLELO HOAKAKA I KA HANA ANA A LONO MA.
Eia ka mea i akaka ai; O ke komo ana i ka luakini o ke akua kii ka mea kapu loa i ko Hawaii nei mau alii, a me ka poe kahuna. Ina e komo ka wahine i ka heiau make, make i ka pepehiia no ko lakou komo wale ana aole i ae aku na kamaaina e komo, aka, manao iho la na kahuna a me na'lii he akua ka haole a pau, hoomana aku la lakou ia Lono.
A hiki mai o Kalaniopuu mai Maui mai, e noho ana ka haole i Kealakekua, ua ku ka hale ulaula iuka, aole i manao na'lii a me na kahuna e pepehi wale aku ia lakou, noho lakou me ka manao he Akua. A manao iho la Kalaniopuu a me na'lii e haawi wale aku i ka puaa me ka niu. I ka ai hele ana o ka haole i ka niu. Alaila, i aku la ke kahuna ia Kalaniopuu, Aole keia o Lono nui a Kea, o Lono Nuianiha keia.
Alaila kuai lakou i ka wahie me ka ai. Holo mai la o Lono ma iuka e kuai wahie me na koi, a kuai aku la i wahie me ke kahuna, o ka laau o ka heiau ka mea i pue ai ka haole e haawi mai. Aole i ae mai ke kahuna a me Kalaniopuu. O ka hala ia e huhu loa o Lono. Alaila kena aku la o Lono i ka haole e wawahi i ka pa laau o ka heiau o ke kii. Halihali ka haole iluna o ka waapa, a hoihoi no na kanaka iuka i ka honua. Pela lakou i hana ai, a holo ka moku a Kawaihae, haiia ka hao o ka moku e Kalaniopuu. Alaila hoi hou mai o Lono mai Kawaihae mai a Kealakeakua ku hou. Alaila hoao iho la o Palea ma e aihue i ka waapa, ina i ikeia ka lawe ana, a me ka mea nana i aihue, alaila manao lakou he mana ka haole.
Na IOSEPA KALAPAUAHIOLE.
Mokuna IV.
PONO ole ke kanaka hana ole, palaualelo, molowa, manaka i ka hana ke noho ma keia ao.
2 Aole ona kuleana, aole ona mea e pono ai ilaila,
3 No ka mea, ua hoolilo oia i kona mau lima i alii,
4 A o kona kino, ke kauwa a kona mau lima a me na wawae.
5 Kaumaha wale no ka manao o ka mea mauwele, palaualelo,
6 I kona noho ana ma ka honua nei.
7 Aole ona noonoo pono iki, e lilo wale no kona manao ma na mea lapuwale o keia ao.
8 He hune, make ai, make kapa, make ia, noho wale iho no na mea i loaa mai ia ia.
9 He ola anei maloko o ka mea manaka i ka imi i na mea e pono ai kona uhane a me kona kino?
10 O ka mea palaualelo, he ilio no ia e imi ana i na mea i kiolaia,
11 E aihamu ana i na hunahuna ai i helelei iho maialo iho o ka papaaina a ka mea hoolako.
12 Loaa no i ka mea hana ole, ka hoopiliwale,
13 Mahope o ke kanaka waiwai.
14 Ua loaa ia ia kana ai maloko o ka hana kolohe.
15 He loaa inoino maloko o ka maka aloalo a me ka ike ole ia mai.
16 Makau no oia i kona ikeia mai a huna no ia ia iho. Na KALAMA.
KUMU HAWAII. Elua hebedoma hookahi pepa, a he iwakaluakumamaono mau pepa i ka makahiki, he hapalua wale no ka uku.