Ke Kumu Hawaii, Volume IV, Number 23, 10 April 1839 — Page 89
KE KUMU HAWAII.
He Pepa Hoikeike i na mea e pono ai ko Hawaii nei.
"O ka pono ka mea e pomaikai ai ka lahuikanaka; aka, o ka hewa ka mea e hoinoia'i na aina."
Buke 4. HONOLULU, OAHU, APERILA 10, 1839. Pepa 23.
HONOLULU, Maraki 12, 1839.
NO KA HOOKULI A UKU.
Auhea oukou, e na makaainana mai Hawaii a Kauai.
Eia kekahi mea hoakaka'ku. Aole anei oukou i lohe pinepine i keia mea, i olelo pinepine ia e na luna auhau aina, a me na konohiki? O na la paahao he mau la kapu ia; ina i noho, hoopaiia oia. Auhea oukou, e na makaainana, Ua hewa anei na luna kahea, a me na konohiki, a me na luna auhau? I mai la ka mea i hoopono, Aole. Owai la ka i hewa? o hookuli, o hookano, o hookiekie, o pakike, o hoolohe ole, a ikeia na hewa, huhu iho la oia. O ia hana ana la a oukou, e na makaainana la, ea, e hoohewa ana oukou i ke aupuni o Iesu a me ke alii o ka honua.
Eia kekahi; e kahea pinepine ana no o Namaile, a me Nakane, i kela Monede, i keia Monede, i lohe na kuewa, o na apana. O na luna palapala no kekahi i olelo pinepine aku ia lakou a pau, e noho ana ma na apana o Honolulu kulanakauhale, aole he la kaawale i ka oleloia aku e na luna palapala kino. Eia ka hookumu ana o ka paipai aku ia lakou: E imi i kala no ke kino, a i ole, uku no i elua dala a ke kane, he kala hookahi ka ka wahine, pela ke keiki i ka hapaha, ua hapalua.
Eia hoi keia. He hali one, ka na kuewa. A hiki ole ke kanaka i ka hali one i ka la hookahi, o uku mai oia i hookahi hapaha. Heaha la ka mea i olelo ai oukou, na hewa na luna palapala;a ua ahiahi aku ia oukou? NO kou pakike, a me ka hookiekie, ka mea i hewa ai.
Eia kekahi ia oukou, e na kanaka o ka'u apana a pau; apopo oukou hele i ka hana a ke alii nui. I mai la kekahi kanaka ia'u, "Heaha ka hana, o kakahiaka?" I aku la au he hali puna, a me ke one, alua hana a kakou. Ina i noho ke kanaka i na la a pau eha, eha hapaha ana e uku mai ai i ke alii; oia ka'u olelo ia oukou a pau, o noho oukou a olelo ia oukou a pau, o noho oukou a mahope, i mai, Aole i lohe.
A ao ae la, hele aku la na kanaka o ke kulanakauhale a pau, i ka hali puna;a me ke one, a hiki i ke awakea, nana iho la au, aole o Hoonaulu ke keiki a Hale. Hele aku la au a kona hale, ninau aku la au i kana wahine, Auhea o Hoonaulu? I mai la ia, "Aia la ihea? maenei no ia i ku mai nei me Kanae." Pii aku la au i kahi o Kanae, ike aku la au, e aneane e pee ana ia. A ike mai la ia ia'u, komo hou aku la ia iloko o ia hale. Hea aku la au ia ia, E Hoonaulu e! e Hoonaulu e! e Hoonaulu e! o mai la ia. I aku la au, ua uku oe i ka hapaha; oia ka'u olelo ia oe, i lohe oe. Hoi mai la au, e kawili lepo ana ka Palena i ke alanui, olelo au ia lakou, ua uku o Hoonaulu i ka hapaha. Olelo mai la kekahi o lakou, "A e uku no, he hoauwaepuu i ko ke alii la." I mai la o Kekuapanio, "Heaha ia?" I aku la au i ka uku o Hoonaulu i ka hapaha. I mai la ia ia'u, O lakou no a ekolu ia e noho mai la. Ike o Kanae i ka uku ana o Hoonaulu, hele aku la ia i ka hali one, a ike iho la o Kekuanaoa, aole ia i hana mai ke kakahiaka mai, hoohanaia iho la oia i ka puna a hiki i ke ahiahi. A hiki i ke ahiahi, hele aku la au i o Hoonaulu la, i aku au ia ia, Homai ka hapaha o keia la. I mai la ia, "Aole he hapaha." I aku la au, No ke aha, I mai la ia, No ka ole no. I aku la au, Ua ike la oe aole au uku, no ke aha la kou noho ana i ko ke alii ia hana: Ia olua wale aku no ia me ke alii i kakahiaka, ua pau ka'u olelo ka ka luna ia oe. I hou aku la au ia ia, Apopo hoi paha hele ae oe i ka hana, o uku hou oe i ka hapaha, I mai la ia, "Ae hoi paha." Pau ia hana.
A ao ae la hele mai la na kanaka i ka hali puna, halawai iho la maua me Hoonaulu i ke kae o ka imu puna, oia ka la 13 o Maraki nei, i ka hora 11 o ke awakea. I aku la au ia ia, O oe ia? Ae mai la oia, Ae. Ua loaa ka hapaha? Hoole mai la oia, Aole. No ke aha? "No ka ole no." Pehea la auanei? I mai la ia, Pehea la? I aku la au, O hele mauka me ke alii, kahaha mai la ia. Hele aku la ia, I mai la ke alii, Ua loaa ka hapaha? Hoole aku la ia, Aole, Aole la hoi i kii? Kii aku la ia; me ka manao kahaha iloko ona, a me kona namunamu wale mai i ka Kekuanaoa olelo ana aku ia ia, e kii i kana uku. No ia olelo namunamu ana mai i kulai aku ai o Kekuanaoa ia ia, a i kuke aku ai i kona wawae, no kona ku e wale mai i ka olelo a ke alii.
A no ia hana ana la ea, kii koke aku la oia i ka hapaha, a haawi mai la ia ia'u i ka luna o ia apana, I aku la au o lawe no ia ia. A lawe aku la ia, a hoihoiia mai la no ia'u. I aku la au, Pehea hoi? I mai la ia, Aia no ia oe. I aku la au, pono hoi paha, ike pu kaua i ka hewa o ke pakike i ka hana a ke alii; mai hana hou hoi paha oe. Ae mai la ia, Ae. Mai manao oe, ua hewa na'lii, Ae hou mai la ia, Ae.
Hana iho la makou a hiki i ka hora 11 a me ka hapalua o ia la, olelo aku la o Kekuanaoa e houluulu mai i na kanaka a pau. Akoakoa mai la na kanaka a pau nana iho paapu, elua tausani paha ko lakou nui.
Olelo aku la o Kekuanaoa, E hoolohe mai oukou a pau e na kanaka a pau, ua pau ae nei ka hana a kakou i keia la, mai manao oukou e uku ke noho i keia mau la aku, aole e uku, Aia no i ka la a'u e hai aku ai i ka la paahao e like me keia, oia ko kakou mau la hana, o ka aina no ke hana a hiki i ka poalima, alaila oki. Pau ae la: ou hoi nui.
IER. KAHAUOLONO.
Honolulu, Maraki 28, 1839.
NO KA HOOPIOPIO.
E ke K. H. Ua ike oe i ka hana lapuwale a kekahi wahine a me ka manao ana o kekahi poe he mea oiaio i ka hana ana ia, i ka la umikumamaiwa o Feberuari nei. Ua ikea no hoi ka lapuwale, o keia mea o ka hoopiopio, a me na mea a pau e kapaia'na he mau akua, e ka poe a pau i naauao. O ko'u manao no hoi ia, e ikea ka lapuwale o keia mea e ka poe a pau e manao ana he oiaio ka mana o ka hoopiopio, ka mea a lakou e kuhi aku ai i kekahi he akua kona, a me ke kuhi wale aku i kekahi he kahu no ke akua hoopiopio oia la.
A ua 'kaka paha ia lakou keia mea, he lapuwale a he hana na ka wahahee.
E ka poe e manao ana he mea oiaio ka hoopiopio, a me kekahi mau mea e ae e pili i keia, e manaio hoi oukou, he mau mea lapuwale lakou a pau. No