Ke Kumu Hawaii, Volume IV, Number 23, 10 April 1839 — Page 92
92 KUMU HAWAII. (APERILA,
ea, oia ka naauao pono, aka, aole ia he mea e ola ai ka uhane, he mea no ia e ikaika ai ke apuni a he mea no hoi ia e pono ai ka noho ana o na kanaka a e maikai ai ka aina; no ka mea, ina aole e naauao na kanaka, aole loa e malu ka aina, lilo loa ka aina i mea haunaele, inoino ka noho ana o na kanaka, no ia mea o ka naauao io no ka mea e pono ai, aka ke kumu o ko Solomona naauao. A pehea kakou, ke makilo aku nei anei kakou ua naauao la a kolomona i imi aku ai me ke aloha aku i ke Akua? a me ka hoomaikai aku ia ia, i ka mea nana i haawi mai i ka naauao nona. Ke hana nei anei kakou e like me Solomona, ka imi i ke kumu o ka naauao o ke Akua? a like me ka uhane i imi ai i kona hale o ke kino; pela hoi ke kanaka i imi ai i kona naauao o ke Akua. Nolaila ea, e huli kakou i ke Akua i ke kumu o ka naauao i hoikeia mai ai, aole o ka huli me ke kino, o ka huli me ka naau a pau, o ka haawi aku i na lala a pau o ke kino, haawi aku i ka lima nona, o aihue, haawi aku i ka waha nona, o hoopunipuni, o olelo wahahee, o olelo i na mea ino; haawi aku i ka wawae nona, o hele hewa; pela no i na lala a pau o ke kino.
Auhea oukou, e ka poe haipule, ehia a oukou mea e lawe nei? hookahi anei ina hookahi ea pono? no ka mea, ua hoikeia mai ka hewa o ka lawe papalua, ina i lawe papalua kekahi mea haipule paha, kekahi ekalesia paha, aole loa he pono oia, e hooliloia auanei ke kea o Kristo i mea ole, pela mai ka olelo a Paulo i ka poe ma Korineto mua. Mokuna 1: 17, penei, ua olelo la, "Aole i hoouna mai o Kristo ia'u e bapetiso, aka, e hai i ka olelo maikai, aole ma ke akamai i ka olelo o hooliloia ke kea o Kristo, i mea ole".
Ma ua olelo la, ea kupu mai la ka manao hoomaopopo i loko o'u, he oiaio loa no kela olelo a Paulo i olelo mai ai, o ua olelo la, ea, he oleloia e kuhikuhi ai ia kakou aole e lawe papalua kakou, aka, i lawe kakou i ka mea hookahi, alaila lilo io kakou i poe kauwa na ke Akua; aka ea, he hoole kanaka okoa aku no ko'u, no ka mea, aole akaka iki ka hua o ka kakou laau, o kekahi mau mea, hakaka no, hoopapa no hoi kekahi poe, lalau kekahi io la nei, noho mihi ole, aole naauao i ke ola o ka uhane ma o Iesu la, hoomaunauna i ka manawa me ka uhauha. No ke aha la keia hana ana no i ka loaa ole mai paha o ka make i ke kino? No ka mea ua ike au i kekahi poe i loaa ka mai i ke kino, e kii ana i ka laau i na kumu, aka ea, aole kii iki i laau no ka uhane no ka mea make ole, kii no i laau no ke kino pau koke. Eia no kekahi, ke ninai aku nei no au ia oukou; e ou hoa i kaihi o o ka la, e ou hoa i ka makani lepo, e ou hoa i ke anuanu o ke kakahiaka, no ke aha la hoi kakou e hoopaakiki nei i ko kakou naau? Eia ia kakou ka hoopaakiki i ka poe hune, kai no ia Aneru ma ka hoopaakiki i ka poe waiwai, i ka poe i lako i na mea o ke kino, nui na makua, nui na hale, he mau hale maikai paha ko lakou ma ko lakou aina, aka ea, haalele lakou ia mau mea maikai a hahai i ka mea maikai ma ka lani. Aia kakou hoi, kuhikuhiia mai ke ola, aia ma ka manaoio ia Iesu, kikihi ko kakou mau poo ilalo, huli ke kua i ka maka o ke Akua, luluu kakou iloko o ka luahi, a hiki mai kahi makau iki holo hehena aku la ma kahi malu pule aku i ke Akua aole loa la e hoolohe mai. Lahainaluna. Na OPUNUI.
MAKE.
O KAAHUMANU II.
Ma Honolulu i ka la 4 o Aperila nei.
Ua loaa ia ia ka mai ma ka la 30 Maraki, ma ke kakahiaka nui; he lolo ka mai. Lolo iho la kona lima a me kona wawae hema, a i ka la 31 loohia i ka hiamoe: O ia hiamoe iho la no a emi ka lolo o ka aoao hema, aka mahuahua ka hiamoe a hiki i ka la 2 o Aperila, aole loa e hiki i kona poe hoahanau ke hoala mai ia ia.
I ka la eha hiki mai o Kamehameha III ke Alii, me kona mai no a me ka hoomanawanui no ke aloha i kona makuwahine. Ma ke kakahiaka nui ka pae ana mai o ke Lii, a ma ke awakea ma ka hapalua o ka hora 12 oia ka wa i make ai, me ka nana ole mai i ke Lii.
Kumakena nui iho la na kanaka a pau me ka uwe aloha, no ka mea ua make ko lakou alii ka mea i aloha nui ia. Aka, i ka la elima hookiia ka uwe no ka mea ua mai ke Lii, aole e pono ka walaau.
KAHI MELE.
Auhea oukou e na makamaka, Eia kekahi himeni hou mai Hawaii mai, ua loaa mai he mau himeni i koe, mamuli pai iho, aole nae me ka leo himeni e like me keia mea malalo ae.
Pohaku Kahiko.
E Ie-su ka mohai no'u,
O - ia no ka punawai,
Ho - lo au i - lo - ko ou,
Ka - hi a'u e maemae ai.
O ka mua ka hope.
Kahe mai kou koko mau,
Me ka wai mai kou aoao;
IESU KA MOHAI.
1. E Iesu ka mohai no'u,
Holo au iloko ou.
Kahe mai kou koko mau,
Me ka wai mai kou aoao;
Oia no ka punawai,
Kahi a'u e maemae ai.
2. Ina uwe waimaka wau,
Ina hooikaika mau;
Aole oia he mohai,
No ka hewa e pau ai;
Oe ke hoola nei,
Aole mohaihala e.
3. I kuu wa e ola nei.
I kuu wa e make ai;
A pii ae i kela ao,
A nana i kou nani mau,
E Iesu ka mohai no'u,
Holo au iloko ou. L. L.
Ua paiia KE KUMU HAWAII ma ka mea Paipalapala a na Misionari, Honolulu, elua hebedoma hookahi pepa, o Wenede ka la e pai iho ai.
Eia ke kuai ana, hookahi makahiki, $0,50, a na mea e lawe i ka pepa a pau.