Ke Kumu Hawaii, Volume IV, Number 23, 10 April 1839 — NO KA HOOPIOPIO. [ARTICLE]

NO KA HOOPIOPIO.

Honolulu, Maraki 28, 1839.

E ke K. H. Ua ike oe i ka hana lapuwale a kekahi wahine a me ka manao ana o kekahi poe he mea oiaio i ka hana ana ia, i ka la umikumamaiwa o Feberuari nei. Ua ikea no hoi ka lapuwale, o keia mea o ka hoopiopio, a me na mea a pau e kapaiaʻna he mau akua, e ka poe a pau i naauao. O koʻu manao no hoi ia, e ikea ka lapuwale o keia mea e ka poe a pau e manao ana he oiaio ka mana o ka hoopiopio, ka mea a lakou e kuhi aku ai i kekahi he akua kona, a me ke kuhi wale aku i kekahi he kahu no ke akua hoopiopio oia la. A ua ʻkaka paha ia lakou keia mea, he lapuwale a he hana na ka wahahee. E ka poe e manao ana he mea oiaio ka hoopiopio, a me kekahi mau mea e ae e pili i keia, e manaoio hoi oukou, he mau mea lapuwale lakou a pau. No

ka mea, o ka oukou paha keia e olelo mau ai, a e hana mau ai, I kela la a i keia la; e kapaʻna i kekahi kanaka a i ka wahine paha, he akua, he Pua, he Kapo, a he Keawe, he Hiu, Kahaea a me ka Hoopiopio, a ua hooliloia i mau mea make no kanaka ma ka olelo ana, pela koʻu lohe. A no keia mau mea, ua kapaiaʻku kekahi he kahu, a he mea hoomanaia lakou nei e ka mea i uluhia. No keia mau mea la ea; ua hoakaka iho nei hoi au a me kekahi poe i hele pu ai a ike makou i ka wahahee, i mea e ike ai na mea he nui e manao ana he oiaio ia mau mea. E ike hoi oukou i keia mau mea, he lapuwale, a he hana na ka wahahee. Ua hoakaka no hoi au i ka wahahee o kekahi e like me keia, a ua ikea no hoi kona wahahee. I ka wa e kokoke mai ana o Boki ma e ku mai, mai Beritania mai, hiki mai ma koʻu hale kekahi kanaka uluhia, olelo mai oia ia makou, o Lonoikaoualii, oia kona inoa mai Waikakalaua mai, olelo mai oia ia makou; Aole i make o Kamehamalu a me Liholiho, ke hoi ola mai nei no lakou, o makou pu no a Beritania a hoi mai nei, kapa mai oia he wahahee ka palapala hoike mai i ka make. No keia mea, hoopaapaa no wau me ka hoole aku i kana olelo mai, a kapa koke aku ia ia he wahahee, aole hoi kona hoapaapaa mai, olelo aku ia ia, A hiki mai o Boki ma ilaila e ko ai na manao o kaua. Oia hoi kekahi mea i wahahee mai i ko kakou ike ana. E ike hoi oukou i keia mea, he lapuwale, a he hana na ka wahahee. Pela no hoi au i ike ai me kekahi poe i kekahi wahahee. I ka wa e mai ai kuu makuakane i ke kuni ikaika, oia paha na la o Boki i ku mai i Lahaina, imi aku la kekahi poe i na ʻkua kii me ka pule i ke kakahiaka a me ke ahiahi me na mohai, i ola no kona mai: ua loihi no ka lakou hana ana pela, he mau akua kane, a he mau akua wahine e like me ka hana mau a ko Hawaii nei mamua, pela no lakou i hanaʻi i ko lakou hoolelo ana mai iaʻu i ka imi ana i ola; aohe ola i loaa mai no ka mea i maiia. Lohe au i keia, hoohuli koke mai la ia lakou a me ka mea i mai, i aku au ia lakou me ka ikaika. Ina aole oukou e huli mai ma koʻu Akua e hoomana pu ai kakou i keia la; e hoi koke ana wau ma Honolulu i keia la. Alaila haalele koke iho la ka mea i mai, ia la no a me kana wahine, a me kekahi poe e ae no hoi. E ike hoi oukou i keia mea, he lapuwale, a he hana na ka wahahee. A no ke koe no, aole i haalele paha kekahi poe i keia mau mea lapuwala, ke manao nei no hoi kekahi poe o

makou e hana like paha me au nei i ka imi i na mea lapuwale, e hoopau i na mea a kekahi poe i hookaumaha aku ai i na kanaka. E ka poe e ike ana, he wahahee keia mau mea, mai olelo hou aku he akua keia mau mea la. O oukou, e ka poe hookahuna lapaau kekahi, mai olelo aku i kekahi no na mea lapuwale nei, he mau akua la; pono e oki ia olelo. No ka mea, ke ike pu nei no hoi kakou i ka wahahee, aole o makou wale no. IOANE II.