Ke Koo o Hawaii, Volume I, Number 1, 15 August 1883 — Page 8
KO MAKOU KAHUA.
E LIKE me ka malamalama o ka La i ke awakea loa, pela no ko makou kahua. Aole a makou mau kuko ana no ka poino a pilikia o kekahi; no ka mea, ina he mea hiki ke hooko ia na kokoia iini ana o ko makou makemake, alaila, e nohoalii auanei ka pomaikai a me ka palekana maluna o na mea a pau loa.
E like hoi me ke kalae o na pali hauliuli i aloha nui ia o ko kakou aina; pela no ka waiho laula o ko makou kulana. Aohe a makou mau mea huna, a he ole loa aku hoi na aui ana i o i Hikauhi, a ia nei ae hoi o Kaumanamana.
Aohe a makou poai, aohe puulu, a aohe akoakoa ana o ka auna hookahi no na hawanawana ohumuhumu.
He hookahi wale iho no "KE KOO O HAWAII." Aohe ona koolua, aohe aku i ke kolu, a he ole loa no i ke kauna ma kona kahua kalaimanao ana.
He kuikawa "KE KOO O HAWAII" mana mea a pau—koe nae kona lili, a me kona makee no Hawaii, kona aina kulaiwi.
Aole oia he makamaka no ka hewa, aole hoi he launa aku i na pelapela; a he enemi ino loa nona na kue ana mai i kona lahui koko ponoi.
A o na hana pono; na mea ku i ka maemae; he mau hoa'loha oiaio ia mau haawina nani; a o ka ilihia o ke aloha aina; ka onipaa o na li'a no ko kakou Hae nani; a me ke akahai malalo o ko kakou Moi—ka Mahiole o KE KOO O HAWAII.
No ka Lahui Hawaii, a me ka poe Aloha io i ka Laui Hawaii makou; a no na pomaikai o ka Lahui Hawaii me kona mau makamaka ponoi, ko makou hakoko ana a hoea i ka hopena.
O ka mea ua hooiaio ia ua hewa, e ahewa ana no makou me ka nana ole i kona ano, i kona kulana, a i kona kahua. A o ka mea i pono io, nona ko makou leo mahalo.
No Hawaii ko makou paio ana; a o na enemi o Hawaii ko makou mau hoa paio. A iloko o ko makou waele ana a kapae ana ae i na unu a me na eleao mailoko ae o ka lepo nani o ke Onehanau, aole loa makou e paupauaho ana a hoomaha, a hiki i ka wa e kani ai ka hoe, a ku kilakila ke kaena ana ae—"aohe pohaku i hoohuli ole ia."
A iloko o ko makou ola ana, ma ka lokomaikai o ka MANA LANI, aole loa e hoohala ia he aui ana o ka manawa, ma na hoomanao ana a me na hooikaika pauaho ole ana, e hooiaio aku, o keia ka io o na io, a o keia wale iho no i na wa a pau e paio hopo ole ai
"KE KOO O HAWAII!"
Ke eli ia nei he luawai aniani maloko o ka pa o Kimo o Lahaina, ma alanui Emma.
I KA Poakahi i hala iho nei, ua hoomaka ka eli ia ana o ke alanui Emma, e hoomaka ana mai ke alanui Beritania aku a hoea iuka i ke alanui Kula. He eli ana keia i hoomoe ia aku ai na Paipu hao nunui no ka oihana wai. He iwakalua paha a oi ka nui o na paahao e hana nei malaila.
NUHOU O NA AINA E.
Ka Hanohano o Hawaii.
Ua hoohenehene ia ka Elele Alii C. P. Iaukea e ka poe enemi ia Hawaii, a ua hoino pu ia me kana Kakauolelo, oia o Henry F. Poor, no na mea e pili ana i ka laua huakai. O keia mau hoino, aole ia na hai, aka, na ka poe e manaoino nei i ke Aupuni a me ka Lahui Hawaii. Ua ikeia ko lakou manaoino iloko o ka lakou mau hanaino, ua hiki no nae ia kakou ke olelo ae—"Na Hawaii no ke Eo!"
O ka papaaina kapu o na Alii Kiekie o na aupuni nui o ka honua nei, aole e ae ia ka poe i loaa ole ia lakou ke kuleana, a he ole loa aku hoi i ka poe aole o lakou kulana.
A na ua papaaina nei e hoike ae ia kakou o Hawaii nei i ke kulana o Hawaii imua o na Alo Alii kapu o Europa, ma ko kakou nana ana i ke kulana i haawi ia ia Hawaii ma ka papaaina hoomanao ma ke Alo Alii o Serevia, no ka Poni ia ana o ka Emepera me ka Emeperesa o Rusia.
Ma keia papa hoikeike e hoomaopopo ia ai, ua haawi ia no Hawaii ke kulana kiekie o ka noho ana ma ka aoao akau o ka Moiwahine o ke Aupuni o Serevia, a ma ke alo hoi o ke Kama'liiwahine Countess Bray, kekahi o na Aliiwahine Kiekie o ka aina.
E ike ia no hoi, o ke Kakauolelo a ka Elele o Hawaii, aia oia ma ke kihi akau ma ka aoao o ka Moi.
O keia mau hanohano, he mau haawina, a he mau kulana keia i loaa ole i na Luna o na aupuni e ae.
Penei malalo iho ke ano o ka hoonoho ia ana o ke Pakaukau a me ke kulana o na Kaukau Alii a pau i konoia e hoohanohano ae i ka papaaina a na Alii ka Moi a me ka Moiwahine o Serevia:
Ka Papaaina Alii.
Lieut. Barlovaty 15 16 Col. Angelakeirtch
Mr. Christich 13 14 Major Baialovitch
Co. Pantellitch 11 12 Marquis Piennes
Col. Angelkovitch 9 10 Miss Buckwikh
General Nicolitch 7 8 Mr. Marinovitch
Mr. Novakovitch 5 6 Madame Leshianon
Countess Bray 3 4 Curtis P. Iaukea
HIS MAJESTY 1 2 HER MAJESTY
Mrs. Pirochanay 17 18 M. Pirochauaz
Count Bray 19 20 Mrs. Betant
Miss Cartage 21 22 Col. Zdrakovitch
Mr. Radovitch 23 24 Mr. Betant
Mr. Gowashanin 25 26 Mr. Spassikh
Mr. Petrovitz 27 28 Lieut. Col. Franassovitch
Henry F. Poor 29 30 Mr. Dimitryevitch
1—Ke Alii ka Moi,
2—Ke Alii ka Moiwahine,