Ke Koo o Hawaii, Volume I, Number 2, 29 August 1883 — Page 11

Na Mea Hou o ka Lai o Lele.

E KE KOO O HAWAII,—Aloha oe:
                Ma ka la 19 o Augate iho nei, i hoau iho ai ka Ekalesia Hoole Pope  o Wainee i ko lakou Luakini kahiko, mamuli o ka hana hou ana i kona mau apulu kahiko mai ka hana noiau ana a ke kamana Charles Mahoe o Honolulu.
                O keia Luakini o Wainee, ua hoomaka ia kona mau pohaku kihi ma ka makahiki 1828, ma ia mau makahiki no, ua ku kilakila oia ma ke kikowaena o ke taona o ka malu Ulu o Lele, mai laila mai kona ku ana, a i ka M. H. 1856, ua kipaku aku la ka makani Kona i kona kuamoo oluna a me kona hale puoa, a ku olohelohe iho la kona mau paia, oia ku ana a me ia hana ana iloko o ia manawa, mamuli no ia o ka leo aloha o na'lii a me na makaainana.
                He mau la pokole mahope o keia ulia i loohia pilikia ai, ua ala mai la na Karistiano oiaio a kukulu i ka hale o IEHOVA a ua kaa i ka lima o ke kamana Henry Chamblain, a mamuli o kona akamai nui, ua ku kilakila hou oia e like me kona nani mamua, o kona paa mua ana. A mai kona paa mua a i kona pilikia mua ana, he 28 makahiki, a mai ia paa ana a i kona hoomaemae hou ana, 27 makahiki. Nolaila ua piha na makahiki he 55 o kona ku ana he Koo o ke Aupuni Hawaii.
                O na Kahunapule i noho Kahu maoli a haiolelo maluna o kona awai eehia, o Rev. Rikeke, Rev. D. Baldwind, Rev. J. H. Moku, Rev. M. Kuaea, Rev. A. Pali, a oia ke puhi nei i ka pu ma Ziona, a o kona ola a na hoahanau e hanai nei, hiki aku la i ka $550 i ka makahiki.

NO NA KULA SABATI O MAUI KOMOHANA.

                Ua ala a holo ka hana o ko makou mau Kula Sabati imua, a ua lokahi na Kula Sabati e kokua i ko lakou mau Kahu Ekalesia.

NA AHAHUI OPIOPIO O MAUI KOMOHANA.

                Ua ala like na Ahahui Opiopio a hapai i ka hana me ka eleu, a he mea e hauoli ai ka naau o ka mea e kakau nei, ka ike ana aku i na opiopio e hoomahui ana ma na hana pono.

KE KAHUA IMI WAIWAI.

                He mau la pokole wale no koe a paa ka Wili hou a H. Turton, mahope iho o ka hana hou ana i na mea ano hou e holo ai ka hana ana. A o ke ko ua nui, ua oo, a ane maloo kekahi, mamuli o ka hana a ka mea dala nui Mr. Horms, a o na alanui hao e lawe ai i ke ko, ke hoomaka mai nei e hihipea ma na hai alanui.

NA OIHANA AUPUNI.

                Ke kope nei ka Luna Helu o Lahaina i kana Buke Helu, a ke ohi pu mai nei no i ke dala a na Pake e holo nei i o ia nei, e like no me ka ka Luna Auhau hana ana, he nu paikini hou keia i ka ike ana. Malia paha no ka huikau o na inoa o keia ano lahui. O na oihana aupuni e ae, oia mau no lakou.
KUPA HAWAII.
[E HOOMAUIA AKU ANA.]

Na Hana Keena o ka Aha Kiekie.

                Augate 14—Ma ka waiwai banekorupa o K. Ahana (pake) o Waimea, Hawaii, imua o ka Lunakanawai Kiekie. Palapala noi a M. Hyman a me J. F. Hackfeld na lunahooponopono o ia waiwai.
                Ma keia hana ua hoolohe ka Aha i na ninaninau ana a na lunahooponopono i ka mea i banekorupa ia, no na mea e pili ana i na buke a me na dala o kana oihana.
                Ua hooholo ka Aha e hoopahaoia o Ahana me ka hana oolea ole a hiki i kona manawa e hoike mai ai i na buke, na palapala a me na dala ana i olelo ai aia maloko o ka pahu hao, a i ole, aia oia a hoike mai i na kumu kupono e hiki ole ai iaia ke hoike mai ia mau buke a me na dala.
                Ua lawe ia aku oia e ka Ilamuku.
                Augate 16—Ma ka waiwai o John Morgan, i make, imua o ka Mea Hanohano B. H. Austin. Palapala noi a W. A. Whiting, lunahooponopono, e hoapono ia kana mau lawelawe ana a e hookuu loa ia oia.
                Ma keia hana ua nana ka Aha i na palapala hoike i waiho ia mai, a ua hoapono ia na hana a ka lunahooponopono. He $42.10 ke koena aia ma ka lima o ka lunahooponopono.
                Ua hooholo ka Aha e hookuu loa ia ka lunahooponopono ke waiho mai oia i na palapala hookaa (receipt) a na mea na lakou ke dala. Ka huina o ka waiwai he $525.35; na lilo he $483.25; koena he $42.10.
                He wahi moolelo uuku ka i loaa mai ia makou e pili ana ia Johu Morgan. He Bolabola oia a ua hanauia ma Tahiti, aka, ua noho ia no ka manawa loihi ma keia paeaina. He sela moku kana hana, a ua make oia i ka malama o Novemaba, 1881, maluna o kekahi moku Amerika e holo mai ana mai Kapalakiko a i keia awa. Ua nalo kona kino kupapau ma ka moana. No kona make ana maluna o kekahi moku Amerika ua malama ia kona waiwai e ke Kanikela Amerika o Honolulu nei. Aka, i ka wa i hoolohe ia ai ke noi no ke koho ana i lunahooponopono, ua ku mai ke Komisina Farani a i mai he kupa Farani o John Morgan, oiai ma Tahiti kona hanau ana. Hoopanee ia iho la ke koho ana i lunahooponopono ahiki i ka la 8 o Dekemaba o ia makahiki no. Ma ia la ua hai ia mai la e ke Komisina Farani, aole oia e kue ke koho ka Aha i lunahooponopono, nolaila ua kohoia o Mr. Whiting.
                Augate 16.—Ma ka waiwai o Kepio, k., o Moanalua, Oahu, i make, imua o ka Mea Hanohano B. H. Austin. Palapala noi a S. Hina, hunona a ka mea i make, e noi ana e hookohu ia oia i lunahooponopono.
                Ua ae aku ka Aha i ke noi, a ua kohoia o S. Hina i lunahooponopono no ka waiwai a i kahu no Keauoho, k., he ke keiki oo ole, ka moopuna a ka mea i make. Palapala hoopaa $250.
                Ma ka waiwai o Noa, k., o Palolo, Oahu, i make, imua o ka Mea Hanohano B. H. Austin. Palapala