Ke Koo o Hawaii, Volume I, Number 2, 29 August 1883 — Page 12

noi a Opiopio, w., me kana kane, e noi ana e hookohu ia laua i mau lunahooponopono.
                Mahope o ka hoolohe ana o ka Aha i ka olelo a na hoike ua hooholo ka Aha he makehewa ke koho ana i lunahooponopono oiai no ka mea noi no ka ka aina, no ka mea aole hooilina e ae o ka mea i make o Opiopio wale no ka makuahine.

He Mau Olelo Ao.

                Elua mahele o ka hoopunipuni—O ka pono a me ka hewa.
                O ka mea hana mua i ka hewa, oia ka ke Kanawai e hoopai ai.
                Owai ka hoalauna o ke kanaka pono? O ka hilinai i; mahalo ia ; he makua ia no ka pono a me ka pololei.
                O ka mea uhauha,—o ka ilihune, nele, a me ka makilo kona mau hoaloha. O ka mea hoiliili mau, e nui ana kana, a oia hoi ka makua o ka home ohana.
                O ka poe i hoikeike i ko lakou naauao mawaho.—ua hiki ia ke kaupaona ia ma ka hoao ana.
                Ina i haoa ino mai kekahi ia oe, mai hana wale aku, ke ike mai la no o Alahe i kana mea e hana mai ai maluna ona. Ina i hili ia mai oe i ka laau a pahikaua paha,—e pale ae no, a mai oki aku i kau pahi o nui loa auanei ka olua hana, a owai la o olua ke poino.
                Ina i makemake oe e pau ka pipili kepau, ka, a me na ano mea pipili e ae o ia ano, penei oe e hana ai. E kau iho i ka pepa lenalena (brown paper) e wa-hi ia nei i ka lole o ka halekuai, kau pono iho maluna o kahi i pipili ia, alaila, kau iho ka aiana mokuahi i ho-a ia a wela, i ko wa no e kau iho ai i ka aiana, o ka manawa koke iho la no ia e pili mai ai ke kepau, ka, a me na mea pipili e ae i ka pepa, a hoi hou ae la ka lole a i kona ano mau. E pono nae e hoao i ike pono.

Na Lono o na Aina E.

                Ua hele mai nei kekahi haole Farani maluna o ka baluna, a i kona wa i nalowale ai iloko o na ao o ka lewa, ua ike oia i kekahi mea ano e loa; oia hoi, i ka wa i hiki ai o ka baluna i kekahi kiekiena, pau ka pii ana iluna, a aole hoi e hoi hou iho i lalo, aka, lana malie wale no i ka lewa. Ma ia wahi, ua halawai pu oia me na ano ea elua i ka wa hookahi. Mai kona poo a hoea i ka hapalua o kona kino he wela ikiiki me he la aia malalo o ka la kikiki kahi i ku ai, a mai lalo ae o kona   mau wawae a hoea i ka hapalua kino, he anu maeele like me ka apana hou i hoopili ia aku. O kona kumu i pakele ai, i hoomanawanui oia a wehe i na ki o ka ea hoolele baluna, a i ka hoomaka ana o ua baluna nei e iho, ua haule aku la ia i ka moana, he mau mile mawaho ae o na kapakai o Farani, a e ole kekahi wahi kuna lawaia, pakele ai kona ola.
                Ua oleloia, ua luai mai kekahi wahine ma Amerika he koe he hapalua iniha ke palahalaha, a he 17 iniha ka loa, a i ka oki ia ana, ua loaa aku la he 50 a oi mau koe keiki iloko o ua koe la.
                Ke hoao nei kekahi haole Sekotia e kukulu i moku lele, maluna o na eheu makani e lele ai me na peahi mai kahi wahi a kahi wahi.
                Mamua aku nei, ua malama ia kekahi aha mele nui ma Nu Ioka, a ua lohe ia imua o kekahi anaina nui ma Bolatimoa, he mau haneri mile ke kaawale, maloko o ka uwea olelo.
                Ma Farani, ua kaena ae kekahi kanaka, he hiki iaia ke kukulu i moku kaua e hiki ana ke holo maluna o ka ilikai, a ke hiki mai i ka manawa e makemake ai e pee mai na enemi mai, alaila, e luu aku no iloko o ke kai a holo me ka ike ole ia.
                Ua hoao ia mamua he mekini hoonoho huakepau, oia hoi, aole na ka lima o ke kanaka e apo i na hua, aka, na kekahi manamana hao mamuli o ka mahu; aole nae i holopono. Aka, ua oleloia, aia ma kekahi wahi kulanakauhale uuku o Nu Ioka, ua kukulu kekahi kanaka paipalapala he mekini hou, a ua holopono kana hana, koe nae ka lohi loa, aole e like ka holo me kekahi poe akamai i ka hoonoho hua kepau.
                He ekolu moa, he elima manu kapalulu, hapa ha o ke eke uala kahiki, elima popo palaoa, ehiku pola kope i pau i ka ai hookahi ana a kekahi haole Kelemania ma Kikako i kekahi mau mahina aku nei i hala, a aole oia i ana, ua hoomaka oia e inu pia, a pau he umikumamawalu mau kiaha nui mamua o kona hoopau ana, me ka alapoho ana he hapakakini huamoa—wahi a kekahi nupepa Amerika.
                Ua kauoha aku kekahi haole Italia molowa aeahaukae i kana wahi keiki uuku e hele e makilo dala ma ke alanui maloko o ke kulanakauhale o Cinicinati, Amerika, a i ka hoi ana mai o ke keiki me ka nele i ke ahiahi ana iho, ua piha loa ka makuakane i ka inaina, a hahao aku la i ka waha o ua wahi keiki nei i ka pauda a piha a kuni aku la i ke ahi, a lele liilii ae la ke poo o kana keiki. He manawa ole ua lohe ia keia hana mainoino, a ua hiki ole i ka lehulehu ke uumi i ka inaina, nolaila, ua kapae lakou i ke kanawai, a hoohei aku la a paa ua Italia nei me ke kaula, lawe ia aku la oia me ka heleuluulu a i ka pou ipukukui mua loa i loaa aku, a li ia'e la oia me ka hakalia ole a me ka hoomainoino ia.

                Ua lohe ia , e wehe ia ana he alanui hou no Iwilei ae nei, e kamoe ana ma ka aoao ma Waikiki o ka halepaahao o Kawa, alaila holo i kai. A ke lohe pu ia mai nei, e wehe ia ana he alanui hou no Kalihi e pii ai iuka, e moe ana mahope aku o ka hale o Mr. J. Wahineaua, maluna hoi o ka aina o Mr. Kainapau. A he lehulehu aku no na alanui hou e lohe ia aku nei.