Ke Koo o Hawaii, Volume I, Number 2, 29 August 1883 — Page 3
KE KOO O HAWAII
1 Makahiki $2.00 I Mau ai ke Ea o ka Aina i ka Pono. 6 Malama $1.50
BUKE 1. HONOLULU, AUGATE 29, 1883. HELU 2.
He Mele no ke "Koo o Hawaii."
E hoomaopopo iho oukou a pau ,
He wahi Koo keia nou e Hawaii,
He elua pule kona wa puka mau,
I hookumu ia e kahi mau kamalii.
Wahi a Kamuela Limaikaika,
"Ua oi aku ka ikaika o ka Nupepa ,
Mamua o ka Awai" me ka hooikaika,
Ke hookele pono ia ia pepa.
He oiaio e ike pono ia ana kona ano ,
Ma na pea a pau o ka aina,
Aka, o ka ikaika o na wahi hoano
Ma na paia wale no o ia ano anaina,
Nolaila, ke ike mai i ka makamaka
E hookipa aku iaia i hoa kamailio,
A e ike iho ia kakou hookanaka,
O kipa hewa ke aloha i ka Ilio.
Ua kuu ia kona mau kolamu nou ,
No na hoolaha a me na mea ano nui,
E hoouna mai no nei wahi pepa hou,
A o oukou kona Koo ma kona alanui.
He elua wale no mau wahi paiai
No ka makahiki, oia kahi kaki ,
Ke hiu e ia ke koo mua e ia poai,
Ma ka lima o ka luna o Kamaki.
T. AFFY.
Ua oleloia, i ka wa i haalele aku ai ka mokuahi Mariposa ia Kapalakiko ma kana huakai mua loa mai nei, ua pili iho la ka Ona Miliona Spreckels me kekahi haole, he $50,000. A penei ka pili ana. Olelo kekahi haole, aole e ku ka Mariposa i Honolulu nei maloko o eono la, a olelo hoi ka Ona Miliona e ku ana maloko o eono la. I ka holo ana mai ua eo ka pili i ka Mariposa, no ka mea, he 5 la me 21 hora wale no ka manawa, he ekolu hora i koe piha ka eona la. A ua lohe hou ia , ua aa hou ua Ona Miliona nei e pili, e make ana keia manawa holo o ka Mariposa i ka lua o kona mokuahi, oia ka Alameda, ma kana huakai mua loa ke holo mai—he $100,000 ka pili, aole nae he mea i aa mai e pili. Ea; ina io pela, ehuehu no ke keiki i noho ia e ka opihi.
MOOLELO O NA KAUA
A KE
DUKE O WELINETONA
KA MEA I KAPAIA E IA AU, KE
Duke Hao o Enelani!
HE
KANAKA POOKAPU I KE KOKO!
KE KAUA ANA O NA PUALI KAUA BERITANIA,—A ME KO ENELANI MAU PAPU POHAKU.
KONA MAU LA OPIO.
O na makahiki he 24 o ke Duke o Welinetona , ua lawa ia no kona ano kanaka makua, a me ka makaukau ma ka oihana kaua aina. O kana mau buke kula ka mea nui iaia, a o ka moolelo kaua o na kanaka koa e hoouka ana i kekahi kaua he mau tausani o na koa, o kana mea makemake loa iho la ia. O kahi ana e heluhelu ai a hiki i kahi a na Kenela e hoike ai i ke akamai piha ma ka lawe maoli ana i na koa iloko o ke ahi enaena o ke kaua, oia kahi ana e heluhelu palua a pakolu ai i kekahi manawa, me kona hoopaanaau ana i ke ano o ke alakai a ua poe Kenela i na puali ma ke kahua kaua.
O kana hana mua loa ana i hoomakaukau ai ma ke kula no kahi manawa kaawale ona, oia kona kakau ana i keia mau Rula, ana i manao ai he mau mea ao kupono loa no na kanaka opio e like me ia e hoopaa ai i kekahi manawa kaawale ma ke kula, a oia keia malalo iho nei:
Rula Ekahi—O ka imi Naauao, oia ka Papale Gula Hanohano o ke kanaka; o ke Akamai a me