Ke Koo o Hawaii, Volume I, Number 2, 29 August 1883 — Page 5
"E KUU HAKU—O ka manawa mua loa o ko'u makaikai ana i keia hale, oia hoi ke ahiahi o ka wehe mua ia ana o ua hana o keia makahiki 1793. Ua hele aku au ilaila me kekahi hoa'loha o'u, he kanaka no ke kulana kiekie a naauao hoi o keia aina. He mau hoa'loha nona na Haku Garetena, Lenegarisa a me ka Haku Parela. Oiai, o ko maua wahi e noho ana iloko o ka Hale Ahaolelo, ua kokoke loa maua ma kekahi aoao kiekie o mua o ke keena e kokoke ana i ke alanui e komo mai ai o waena. I ka wa e komo mai ai o na Keiki Alii me na Alihikaua, e hai pakahi mai ana ko'u hoa'loha ia'u i ko lakou mau inoa a me na kulana. Aia i ka wa i akoakoa mai ai o na mea a pau, aia hoi iloko o ia mau sekona pokole, ua komo mai la ka Ela o Welemolena me kona kapa piha, a ku ae la ke anaina holookoa iluna, oiai oia e helemalie ana ma ke alanui o waena, ua hai mai la ko'u hoa'loha ia'u, o keia ka Alihikaua Nui o na puali kaua o Irelani nei. Nana pololei aku la au i ke ano o keia kanaka, a oiai oia e pii aku ana ma kahi e ku ana o kona noho, aia hoi, ike hou aku la au i kekahi keiki opio, nona ke kulana o ka wiwo ole, nona hoi na ouli o ke koa maluna o kona mau helehelena, ku pololei iho la ia ma kekahi aoao o ka Alihikaua nui, ua kahiko oia iaia iho me ke kapa o ke kulana Kapena, me na pilali gula nunui e kau ana ma kona mau poohiwi. No ko'u ano malihini i kona mau helehelena, a me ke ano e loa o kona nanaina kulana, ua ninau koke aku la au i ko'u hoa'loha i keia mau olelo:
"Owai hoi kela keiki opiopio i noho iho la ilalo ma ka aoao o ka Alihikaua Nui?" wahi a'u i pane aku ai. O ko'u hoa'loha, huli koke mai la ia'u a pane mai la me ka leo hawanawana:
"O kela keiki opiopio," wahi ana i pane mai ai, "O Kapena Welesele kela, ke kaikaina o ka Haku Morinetona, he Ukali no ka Haku Lutanela o Irelani nei, ka Ela o Welemolena."
Nana pololei hou aku la au i ua keiki opiopio la, a ma kahi ana i nana mua ai imua o ka hale, aia malaila mau kona mau maka i na wa a pau, aole oia i luli ae ma o a maanei, a aole oia i kamailio iki aku me kekahi mea. No kona ano kuoo loa ma kona kulana kapa koa, ua pane hou aku la au i ko'u hoa'loha me keia mau olelo:
"Ua manao au," wahi a'u i pane aku ai, "Aole paha he kamailio o kela kanaka opio."
"Ua kuhihewa loa oe,'' wahi a ko'u hoa'loha i pane mai ai. "E manaoio mai oe i'a, ina oia e kamailio ana maluna o kekahi kumumanao, aia maluna o ia kahua kona mau iini ana ole a a hiki i ka manawa e hooko ia ai."
O keia leta, ua hoouna pololei ia aku la ia i ke kuhina Nui ma Enelani, a i ka hala ana o na hora 3 o keia halawai ana, ua hookuu ia na hana me ka holopono.
E kikoi hou no kakou ma keia wahi no kekahi mau wahi aku, a mamua hoi o ko kakou hoomaka ana i kana mau kaua kaulana ma ka Anemoku, oia hoi ke kipaku ia ana o na puali kaua Farani mai na aupuni aku o Sepania a me Potugala, e hoike mua aku au ma na mea ano nui i kahi ana i komo mua ai e honi i ka uwahi o ka pauda, a e alo hoi i ka poka, e like me kana kuhikuhi ma ka Rula Ehiku o kana mau haawina kula, oia hoi ke kaua o Holani malalo o na kauoha a ke Duke o Ioka, ka Alihikaua Nui o na puali kaua Beritania ma ke kahua kaua o Osedena.
Na Hoaui Ana.
Heaha ke mele e himeli mau ia ai no ka poe Pakalaki? Eia ka Puali Inuwai e kalokalo ia ai no ua poe la:
"He lokoino ka Hala he wawau ka Lehua,
Hana kupaha ka wai o Kehoi,
E hoi ke kupa o Lihue ua pa i ka neo,
Akahi no ka nele o ka la waiwai."
Pehea hoi oe e olelo ai no ka poe Lawaia paoa? He pono lakou e pule i ka poe Makapaa, ke akua o ka poe Moewaa, penei:
"Powa hewa ka lihi i ke ko'a namu,
Nana kee ka Ia i ka maunu ekaeka,
Hoopa-u ka a ka Lawaia paoa,
Hoanuanu ili o ka hele maunu."
Heaha kau e kaena ai ke ike ka malihini i ke kai o Punaluu? He hiki ia'u ke pule i ka makani o Kona i hulihia o Iwalani.
"Aia i Punaluu ko'u aloha,
I ke kai haohao a ka malihini,
No Kona ka makani he Kulaipau,
Kikii kapakahi o ka Iwalani,
A waho makou o Kailua,
Hiki ana ka makani wili ahiu."
Pehea e hiki mai ai ka wa e hipuu ia ai no ka noho ana maemae? Me ka mahaoi, ma ka makilo maoli ana aku no ma ke noi ana. E like me ka pule umi a kekahi pua Alii:
"A hea la oe neenee mai,
O lalama ka manu i ka nui lehua,
Naele ka manao ke hiki mai."
Heaha ka hana e pono ai ke heihei waapa hou aku kakou ma ka la 16 o Novemapa anei? E pule aku i ka makani i pipii ka ihu o ka huelo boki, a malia o lohe wahi leo wale aku o Mama:
"Auhea wale oe e ka Huelo-boki,
E ae-ku nei la i ka moana,
Hoiho i paa ke kianoa,
I pipii pono ae ka ihu i luna,
A hala pono ae na lae ino,
Ua ino ka moana ua hakukoi,
Koikoi ko leo e ka Huapala,
I ka pane ana iho 'Heaha ka'u?"
Heaha ka la kupanaha au e hoomanao ae ai? Aohe wahi ia apiki e ae e like me ka Muhee ke keu o ka maalea i ka hookani Gita pukiki penei:
"Auhea oe la e ka Muhee la,
Ka Ia holo lua la o ka moana,
Kai no ua ana ko makewai la,
I ke kio wai kapu a Limaloa,
Piikoi aku ana oe ilaila,
I ka lole hinuhinu o Herode."