Ke Koo o Hawaii, Volume I, Number 3, 12 September 1883 — Page 11

Ka Huakai Au-Moana Kamahao!
MAI KAPALAKIKO A AUSETERALIA MALUNA O KA WAAPA.
Ehiku Tausani Mile ma ka Ilikai

                O Bernard Gilboy, (Benada Giliboe) he kanaka Amerika oia, a o kana hana makemake loa, oia no ka holoholo ana maluna o ka waapa ma na aekai o kona one hanau. Mamuli o kona heluhelu ana i ka moolelo o ka huakai kaulana a Kapena Johnson ma ka moana, i kekahi makahiki mamua loa aku nei, no kona holo ana mai kahi aoao a kekahi aoao o ka moana ino nui o ka Atelanika, maluna o kekahi wahi waapa nona ka nui he 15 kapuai ka loa o ke kila, 5 1/2 kapoai ke akea, a he 12 iniha ka hohonu; no ia kumu, ua noonoo oia, a ua hooholo nona iho, e holo oia mai Kapalakiko, Kaleponi, a hoea i Auseteralia maluna o kekahi waapa, e kaalo hoi i ka loa a me ka laula o ka moana nui o ka Pakipika, a e alo i na kikiao makani ino a me na ale lua milo he mau tausani mile ka mamao mai kekahi lihi aina aku.
                Nolaila, ua hoomaka oia e haawi i na kuhikuhi ana no ka hana ana i wahi waapa nona, no ka hooko ana i keia huakai weliweli. O ka loa o ua wahi waapa nei, he 18 kaupai; ke akea 6 kapuai; ka hohonu 2 kapuai me 6 iniha—he 1 1/3 tona ka huina pau o kona kino holookoa. Ua kukulu ia ma ke ano kuna, he elua kia, he pea ihu, pea waena a me ka pea hope. O ke keena moe a me ke keena waiho ukana ua hanaia ilalo e like me na kuna nunui. Ua hoolawaia me na mea a pau no ka holo ana ma keia huakai.
                Ma ka Poalima, Augate 18, 1882, ua makaukau ua wahi waapa nei. Eia na mea a ua Giliboe nei i kau ai maluna o kona home au moana, no kona pono iho ma ka huakai. He 14 kaki wai, 10 galani pakahi; 160 paon barena; elua kakini kini pipi roke; elua kakini kini moa i hoomo'a ia; elua kakini kini kamano mo'a; elua kakini kuekue puaa; 12 kakini wahi kukaepele; hapa galani alakaholo; 10 galani aila hua kukui; 5 galani aila mahu; 3 paona kope; 2 paona ti; 1 auka kopa palu; 3 paona kui; 1 pauma laau; 12 kapuai iliwai; 1 hamale, 1 koilipi; 1 kapuahi ailamahu liilii; 1 kapuahi alakaholo hiki ke hoo iloko o ka pakeke lolewawae; 2 kukui; 1 paona ihoiho; 2 panana; 1 barometa me ka mea nana la; 1 mea ana holomoku; 1 pu wahalua, 1 pu panapana, a me na lako pauda me poka, kukaepele, etc.; 1 uwati; he mau wahi pa, pola, pahi, o, puna; buke hooholo moku, palapala aina o ka Pakipika Hema; 1 hae Amerika; 2 paona aila palai; 1 paa hoe 12 kapuai ka loa; a me kahi mau mea liilii e ae; me na aahu kupono e lawa ai no ka huakai; a me hookahi mamalu.
                I ka pau ana o keia mau mea a pau iluna o ua wahi waapa nei, ua ano komo, a ua haiki kahi e hiamoe iho ai; aka, ua maopopo no ia Giliboe ina e mau ka ono o kana ai, alaila, e pau ana keia mau mea ai i ka ai ia, a e akea aku ana kona keena.
                I ka hora 1 o ka auwina la o ua Poalima nei, Augate 18, 1882, ua hoomaka keia kanaka maka'u ole i ka au moana e huki i na wahi pea o kona wahi moku, me kona hoike ole i kana huakai i kekahi mea, koe wale no kona mau hoa'loha ponoi loa. Aka, i ka wa i hoomaka ia ai e huki na pea, ua piha mai la ka uwapo i na kanaka, no ka mea, ua kahaha ia ke ano o keia hoopiha ana i ka waapa me na mea ai lehulehu e lawa ai no kekahi huakai loihi. (A ma keia wahi, ke pai nei makou i ka moolelo a ua Giliboe nei i kakau ponoi ai mai ka mua a ka hope o kana huakai, penei:
                Ia'u e hoomakaukau ana e holo, ua ninau mai la kahi poe ia'u oiai ka lehulehu e makaikai mai ana. "E holo ana oe ihea?" "I Auseteralia," wahi a ka'u pane." E holo hookahi ana no oe?" Ae." "Ahea oe holo?" "Ano aku, ua makaukau au." "Kahaha he la ino ka Poalima, he piha i na pakalaki." "Ae, wahi a ka olelo ia, aka, oiai ua makaukau au i keia la, nolaila, e holo ana au, ua like wale no na la a pau." A ia wa, hora 1 ponoi, hookuu ka laina, a haalele aku la au ia lakou, hooho mai la lakou ekolu huro no'u, a haule aku la lakou ihope.
                Ia'u i holo ai a hoea mawaho aku o na kiekiena o ka aina, ua ikaika ka makani, a ua auau kai maua me kuu wahi ipo waapa, a kapa iho la au i kona inoa o ka "Pakipika." Hora 5:30 o ia ahiahi, ua hooiho aku la au a hoolulu malalo o na pali o ke kuono i kapa ia ka Lae Lime, a kuu iho la i kahi heleuma o maua me kuu wahi aloha. Pu-a au i na pea a paa, a hooponopono no hoi i na mea e ae a pau, alaila hoomaka iho la au e ho-a i ke ahi o kuu wahi kapuahi ailamahu. A mo'a kahi mea ai me ona pola ti, paina iho la au no kam anawa mua loa, maluna o ka oneki o kuu wahi ipo, me ko'u kaukau iho ina he hiki iaia ke paina pu me a'u ina la ua pono loa—aohe hoi e hihi, he wahine auaukai ia, nolaila, o ko'u aloha nona kana e lawe aku. Paina iho la au a maona, hoomakaukau aku la i kahi moe, a waiho hiolani aku la no ia po a hoea i ka wehe kaiao ana.
                I kekahi la ae, Poaono, Augate 19, hora 6:30 kakahiaka, ua paina wahi kope au. Ano hakukoi ka makani, a nolaila, ua manao au e kakali a auwinala; aka, ua ike aku au he mau waapa liilii lehulehu e holoholo ae ana, he auwaapa lawaia, a nolaila, ua hoomaka au e hoomakaukau. Hoomaka au e haalele ia wahi i ka hora 8. He hoopiipii ka ihu i ka makani. Hora 3 auwina la, kaupoko au iwaho o ka aina, a kaalo ae la he ekolu mau mokuahi me kekahi i mau moku kiapa lehulehu e holo ana no ko lakou mau awa iho.
                (Ma keia wahi, e hoakaka aku au, ua hoomau aku o Giliboe i ke kakau ana iloko o kana buke hoomanao i na mea a pau e pili ana i kana huakai i kela me keia la.)
                Hookahi pule mai ka la ana i haalele aku ai ia Kapalakiko, oia hoi, hora 1 auwina la o ka Poaono, Sept. 24, ua kakau oia i kana hoomanao penei: