Ke Koo o Hawaii, Volume I, Number 5, 10 October 1883 — Page 14

Na Hana Keena o ka Aha Kiekie.
KA WAIWAI O KEELIKOLANI.
EIA KA OLELO KAUOHA HOPE LOA A KA MEA KIEKIE KE ALIIWAHINE RUTH KEELIKOLANI I MAKE, I KOPE IA E MAKOU MAI KA AHA HOOKO KAUOHA MAI I MEA NA KO MAKOU POE HELUHELU E IKE AI.

                Owau o Ruth Keelikolani e noho nei me ka manao pono a no ko'u makemake, oiai ke Akua ua kokua mai ia'u i ka manao maopopo; a no ko'u makemake hoi e kauoha aku i ke ano o ka hooponopono ana i ko'u waiwai mahope aku o ko'u make ana. Nolaila, ke hana nei au, a ke hoolaha, a ke hoakaka nei hoi au i keia palapala kauoha hooilina hope loa a'u.
                Ke kauoha aku nei au e hookaa ia ko'u mau aie pono a pau, e ko'u mau hooko kauoha i hoike ia malalo nei, mai loko ae o ko'u waiwai i ka wa kupono ia lakou, mahope iho o ko'u make ana.
                Ke haawi, a ke hoolilo loa aku nei au no kuu kaikaina i aloha nui ia, ia Bernice Pauahi Bishop, i ko'u mau waiwai a pau loa, na waiwai paa, a me na waiwai lewa mai Hawaii a Kauai, nona ia mau waiwai a pau loa.
                Ke haawi aku nei au ia Pukui (k) i ka ahupuaa o Honokane ma Kohala Hawaii, no kona wa ola.
                Ke haawi aku nei au ia Kaaea, (w.) i ka ahupuaa o Pahoa, ma Lahaina Maui, no kona wa ola.
                Ke haawi aku nei au ia Kapule, (w.) i kela hapa o ka Ili o Wailuakio, ma Palama, ana e noho nei i keia wa, no kona wa ola.
                Ke haawi aku nei au ia Kahaunaele, (w.) i ka Ili aina o Paeaki, ma Palama, Oahu, no kona wa ola, a ke kauoha nei no hoi au, e uku ia oia i kona wa ola, i Kanalima dala, ($50.00) i kela a me keia mahina, a ke haawi nei au iaia i hookahi kaa hale a me hookahi Lio, oia o "Kalalii."
                Ke haawi aku nei au ia Kapoli Kamakau, (w.) i ko'u pahale ma ke alanui Moiwahine, oia hoi ka pa i olelo ia no Namauu ia Kekuanaoa, a me kela apana aina i kapaia o Kaala, kokoke i kahi o Keo Kaaka, nona ia no kona wa ola.
                Ke haawi aku nei au ia Palekaluhi, (k.) a me kana wahine, i kela mau apana aina elua i ana ia no laua ma Kauluwela, pahale 1 1/2 eka, a me eono loi 1 5/8 eka no ko laua wa ola.
                Ke haawi aku nei au ia Keaka Kaholoaumoi, i hookahi kaa ukana a me na Lio elua "Wailele" a me "Lio Ulaula."
                O keia mau aina, a apana aina a pau i haawi ia maluna nei no kekahi mau mea no ka manawa, oiai lakou e ola ana, e hoi hou no ke make lakou, a o kekahi paha o lakou, i kuu kaikaina i aloha nui ia, ia Bernice Pauahi Bishop, e like me ka'u kauoha mua maluna iho nei.
                Ke koho aku nei au ia Charles R. Bishop a me Rudolph W. Meyer, i mau mea hooko o keia palapala kauoha hope loa a'u.  R. KEELIKOLANI.
Alexander Mackintosh,
Thomas Brown.  Na Hoike. 

Na Keiki Hawaii Imi Naauao.

                O Kamauoha opio, Matthew Makalua a me Piianaia i hoouna ia ai ma Ladana no ka imi naauao, ua loaa mai he mau lono hauoli e haaheo ai o Hawaii a pau.
                Ua eo ia M. Makalua he eono makana ma ke kula nui o Chad; a ua nui a holomua kona ike ma na mea hoonaauao lehulehu i ao ia iaia. Akamai loa ma ke ao ana i na olelo Farani me Kelemaia.
                O Piianaia, he holo loa ma ka olelo Latina me Farani a me na mea e ae i ao ia iaia.
                Ua holo loa o J. A. Kamauoha ma na mea pili hoomana; na olelo kahiko a pela aku. Ma keia mau hoike, ua hui pu ia mai ka mahalo o na kumu i ka eleu a me ka miki o na haumana Hawaii, me ka maikai o na helehelena i piha i na hiona hoihoi no ka imi naauao. Nui ka olioli no keia mau lono.

Na Haina Ninau Wati.

                Eia ka'u haina: No ka hora 1 no. Penei e maopopo ai: ua hoomaka ia ka helu ana o ka hora o ka wati ma na sekona a i na minute, nolaila, i ka hui ana o na mana,ana a i elua i ka hora 12, he hoike ana mai ia ua hiki pono i ka hora 12, aka, i ka manamana kuhi minute i nee ae ai, no hookahi paha minute, alaila, he hoike ana mai ia i ka oiaio; ua pau ka hora 12, no ka mea, aia a piha he 60 minute, alala lilo i hora, nolaila o keia mau minute a ka manamana kuhi minute e nee aku nei, e nee aku ana oia e hoopiha i ke 60 minute i piha ai i ka hora a lilo i hora 1. Pela no ke Dala, ua hoomaka ia kona helu ana mai na keneta aku, a piha hookahi haneri keneta alaila lilo i Dala.  S. K. KAIHUMUA.
                Haina:—No ka hora XII kela kowa ma kekahi ano, a no ka hora I kela kowa ma kekahi ano; oiai ua kuleana hoi ka hora xii no kela kowa ma kekahi kulana, a ina aole e loaa ke kuleana no ka hora xii alaila no ka hora 1 kela kowa. A ina makamake oe i na wewehe, alaila e hoike ia aku no mahope aku.
                GEO. W. KALOHAI.
                Haina:—No ka hora 1 no ia mau minute elima i hala, aole no ka hora 12. Oiai ua kane ka hora 12, e hoike mai ana ua pau kona kuleana, oiai no hoi, ua poai ia e ka manamana kuhi minute he 60 minute i a oia ka piha ana o ka hora okoa. Aloha nui.
                J. W. H. ISAAC KIHE.
                Haina:—No ka hora 12 ia kowa. Loaa no na wehewehe o ko ninau mai ka halekula o Kawaiahao mai ka hora 9 A. M. a ka hora 2 P. M., o na la a pau, (koe na Sabati me na Poaono,) ke holo mai oe i ka piele i Honolulu nei. Kipa wale ae no hoi.
                S. W. KANIU-LALAHU.

                Ma ka leta a ko makou makamaka Jas. H. K. Kaiwi o Kauai, ua hai mai oia i ka holomua o ke kula olelo Enelani a Y. Burr, Esq, he 80 keiki a oi na haumana o kana  kula. O ka makou e kalokalo ae nei, e holomua kana kula no ka hoonaauao ana i na keiki Hawaii.