Ke Koo o Hawaii, Volume I, Number 5, 10 October 1883 — Page 6

la, e hoi hou mai ana oia i hope iloko o ka punohu lehu lepo me ka mama nui, a he makani puahiohio pakaawili hoi ka mea nona ka halulu ano e a lakou nei i lohe ai, a e puhi ia ana hoi na lehu lepo a pau iluna o ka lewa, a e hele mai ana hoi ua makani la me ka malie he 15 mile mahope o kona lio.
                He mea e ka pihoihoi nui o ka huakai makaikai a Ponedeseta ma e ku nei iluna o ke ahua, i ka ike ana aku i ka uwila e oaka mai ana iloko o ka pouli lehu lepo, a hoomanao ae la lakou iloko paha auanei o keia hora e pau ai lakou nei i ka make mamuli o ka lepo e pii nei i lewa a uhi pu iho i ka honua, ku ae la he mau puu nui aole i kana mai. O kona halulu, ua like ia me na haneri poka pukuniahi e lele makawalu ana i ka wa hookahi, a e ku pololei mai ana ka hele a ua makani puahiohio nei i kahi a lakou nei e ku ana.
                He hapalua hora a oi keia ike ana a lakou ia Le'Olevela e holo mai ana iloko o ka pouli lehu lepo, a i kona kaohi iki ana iho i ka holo a kona lio, aia hoi, ike pono loa aku lakou iaia he hapalua mile a oi ke kaawale mai a lakou aku, ua puni oia i ka lehu lepo mailuna a lalo, a e hanu iho ana hoi kona lio me ka wela nui, wehe ae la oia i kona papale kaleponi mai kona poo ae, a peahi mai la oia ia Ponedeseta ma, e holo ae lakou ma kahi ana e ku ana maluna o kekahi kiekiena.
                I ko lakou hiki ana aku imua ona,  pane mai la oia ia Ponedeseta i keia mau olelo;
                "No ko'u ike ana aku nei i kekahi ino nui mamua o ko'u alahele," wahi a Le'Olevela, "Nolaila, ua huli hoi mai nei au me ka awiwi nui. He mea mau i kekahi mau mahina ino o ka makahiki no keia kula, ke kipa ana mai a ka makani puahiohio lawe lehu lepo i ka lewa a uhi iho i ka aina ma kahi ana e haule ai, a oia kela makani puahiohio a oukou e ike nei. E wehe i ko oukou mau lio, a e kukulu ae i ko oukou mau halelole, a e komo na mea ola a pau iloko, a e kakia kui ia hoi kona mau aoao a pau i ka honua, a pela wale no kakou e ola ai i keia lehu lepo e hele mai nei no ka manawa uuku wale no a hala aku oia ma kona alahele.
[E HOOMAUIA AKU ANA.]

                I keia wa ua like ole na manao o ka poe huli honua a pau a me ka poe kilo lani. I ka imi ana o kekahi poe i ka iho a me loko o ka poepoe o ka honua nei, ua manao ia he paakiki. Ua hooiaio mai o Prof W. Hopkins i keia mea ma kana hoike iloko o ka makahiki 1839. "O ka iho waena o ka honua a me ko loko ona, he mea kino paakiki." A ua hoike hou ae oia ma ka 1847, "O ka iho waena konu o ka honua ua hoopaakiki ia mamuli o na kaomi ia ana." He oiaio paha keia, no ka mea, ke eli iho ka poe eli lua wai aniani, he i mai lakou, "ua like o loko o ka honua me ka hao,"

Ka Huakai Au-Moana Kamahao!
MAI KAPALAKIKO A AUSETERALIA MALUNA O KA WAAPA.
Ehiku Tausani Mile ma ka Ilikai
[HOOMAUIA MAI KELA HELU MAI.]

                Poalima, Dek. 15.—I keia la he maikai no na mea a pau; a ua malie ke kai; a no ia kumu ua hue au i ko'u mau aahu a pau, a ua kaulai; a i ko'u huli ana i ko'u mau pono, ua ike au ua uuku loa ka ailamahu, a ua noonoo au he mea pono e akahele i ko'u ho-a ana i ke ahi no ka'u mau mea ai, a pela aku.
                Pela au i hoomanawanui ai i keia mau hoailono o ka pilikia a hiki i ka hora 3 o ke ahiahi, ia manawa, ua lohe aku la au i kekahi hookui ana malalo pono ae o ko'u wahi halelana; a ia wa ua hoomaopopo aku la au he I-a nui, me kekahi mea nui mamua pono o kona ihu; i like me ka pahikaua. Ua puka mai la olalo pono o kuu wahi waapa, a ke komo mai la ke kai me ka hele uluulu. Ia wa ua hoomaka au e lelepauki, a ua hooikaika e ka i ka liu. Aole no nae i liuliu, ua aneane pau ka liu, a ia wa ua hoomaka au e papani i ka puka me kekahi apana o ko'u huluhulu. A paa ka puka, alaila hoomaka au me ka pauma i wahi e pau ai ka liu; a aole no i hala loa ka manawa, ua pau ka liu, a ua malohaha hou kuu wahi halelana.
                Poaono, Dek. 16—Hiamoe loa ia au, mamuli o ka luhi i ka nui o ka hana i ka la mamua ae. I ko'u puoho ana ae ua kiekie ka la, a ua loaa ia'u na mea a pau me ka maikai, e pa pono ana ka makani mahope pono, me ke ano malino o ke kai. I ke awakea o ia la ua nana au i ka manawa a me ka latitu, latitu hema    ° 5', lonitu hikina 117° 11'. O ka loa o kahi i holo ia iloko o ka pule i hala ae, he 360 mile, a o ko'u ihu i hookele ai—Komohana hapa Komohana. Ia po hora 12, ua ikaika ka pa ana a ka makani, a nolaila ua lele pauki au.
                Poaono, Dek. 23—Ua hala hope aku la kela pule, me ka malie maikai o ka moana; koe wale no hookahi la, ua haule mai he mau kulu paka ua. Ma keia la, ua hoea mai la he mano nui ma ka aoao o kuu wahi waapa, me ka hapaiua o kona kino iwaho o ke kai, a me he la e nana pono mai ana ia'u. Ua hili ia e a'u kona poo me ke a'u o ka hoe, a nalowale aku la ia, aole i hoi hou mai.
                Sabati, Dek. 24—Hora 9 a. m. ua ike au i ka mokupuni o Fearn, he ehiku mile ma ko'u komohana. Hora 11, aia ka mokupuni ma ko'u hema, a ke kaalo nei au ma ka aoao akau. O ko'u mamao mai Auseteralia mai he 1,200 mile. O ka'u mea ai i koe he 12 paona ia iloko o ke tini, hapa galani alakohola, 15 galani wai. Ua pau loa kuu berena inehinei. Ke hopohopo nei au aole paha e loaa hou ana ia'u he moku. O ka'u i manao ai e hoomau aku no au ma ia latitu hookahi, oia hoi, latitu 22° 20' Hema, me ka manao malia o loaa ia'u he moku, alaila loaa mai