Ka Lanakila, Volume I, Number 1, 1 July 1909 — KE KILO AOULI POOKELA. Oni Imua ko Makou A-i Puupuu ma na Ike Kupanaha. [ARTICLE]

KE KILO AOULI POOKELA.

Oni Imua ko Makou A-i Puupuu ma na Ike Kupanaha.

Oiai ka mmkani e pa ahe malie ana ma keia kakahiaka mai ke kukulu no-no-isi-bai-isi-mai, a o ka manawa like hookahi no hoi ia a na kukuna o ka La i hohola ae ai i kona mau eheu no ka hoopumehana ana i na ea huihui o Hawaii Aina, aia hoi, ua hemo ae la ka laina kikala, ("stern line), alu a le-ko ia mai la ka laina punuku, (bow line), a mohala pu ae la na lau o na pe'a o ke kima heihei KA LANAKILA, me kona mau aliimoku ame na luina maluna ona, ia wa no i ikeia aku ai ma ka mea hoonui ike a ka haole e ko makou a-i--puupuu (Puuku) kekahi mea ma ke aouli ma ke kukuiu komohana o ke ano kuahiwi, a mai keia ao ano kuahiwi mai i pa mai ai he kolonahe makani, a nana hoi i halihali mai he ala, he ala hoi o ke onaona hua mokihana. "Eia, eia la," wahi a ka Ai-puupuu i ke Pailata o KA LANAKILA, "eia ke ike nei au, aia ma kekahi puko'a, he puko'a i uluwehiia me ka lipolipo o ka wao, aia la ua hapai, ua haakokohi, ua oili, ua hanau a puka i ke ao malamalama he kama kupanaha, he kila pao, he kamaeu a he kukini mama no na kai ewalu o ko kakou Aina; a eia au ke lohe maopopo nei he leo, he leo hoi no ka makuakane o ua kama 'la e kahea ana e, "Waialeale, Waialeale." Ae, aole kela he ao kuahiwi e ae, o ke kuahiwi aku la no ia i ka Mokupuni o Manokalanipo i kapaia o Waialeale, a o ka puko'a hoi i waena moana o Kauai Hemolele i ka Malie no ia. O ke kama kupanaha nona kela inoa aole ia he mea e, aka, he ipu aala ia na ka makani; he makamaka, he hoaloha, he hoakukini pu no KA LANAKILA, no ka hoonaauao ana ia Hawaii Lahui. E kuu hoa o ka makapeni, e ka Nupepa "WAIALEALE", ke haawi aku nei KA LANAKILA i kona lima akau o ke Aloha a ke noi nei ia oe e komo ae kaua ma ke keena malu o ka lunamanao, a e haawi aku i ekolu leo hoonani no ka Makua Mau no ka hauoli i loaa ia kaua ma keia la hookahi o ko kaua hanauia ana. Imua, imua, mau-a-mau! ❖ ❖ ♦> Eia no imua o ka Aha Kaapuni e loleloleia mai nei na hihia like ole a ke Aupuni no ke ku'e ana ia Makino, Negoro ame kekahi poe e ae, na alakai hoi o ka Ahahui Hoopii Uku Hana o na mahiko.. Ma ka Poalua nei i hookohu ai o Kiaaina W. F. Prear i kana Kakauolelo David Lloyd Conkling i A-i-puupuu no na iliili hanau o ke Teritori, no ke pani ana i ka hakahaka o ke kulana Puuku ma kahi o A. J. Campbell i waiho mau