Ka Lama Hawaii, Volume I, Number 2, 21 February 1834 — Page 4
LAMA HAWAII.
He mele no ka hookumu ana i ka honua.
Pa, ke Akua i ka lewa!
Hohola ka mana, hohola.
Lele hoolahalahai ka Uhane;
He Uhane, he aka no ka mea maikai,
He akakalani no ka Uhane Hemolele.
A po mai ka mana i ka nahele, i paa,
I paa ka nakaka, o lewa wale no.
I paa i ka mana i ka manao,
Hookino ai ka honua,
Ua ea pu, ea ka moku;
Olohelohe ka aina,
Alaneo ka honua,
He lepo wale no,
He lepo ke kanaka,
Na ke Akua i hana;
Nana no i hana i na mea a pau.
Hooulu mai la i na mea uliuli,
Kahiko ka honua i ka mea maikai;
Hoonani mai i ka pua o ka laau,
I nani ka honua,
Na ke Akua ia.
Na ke Akua i hana ka lani nui nei,
I hana i ka lani i mamao liuliu,
I hoopaa i ka lani i wahi noho,
Noho hookahi Iehova, oia wale no,
O ka Uhane ka lua.
O ka mana kona mea i lehulehu ai,
Lehu, a kini, a nalowale,
A piha ka lani, piha no ka honua,
Piha i ka pono, i ka mana, i ka maikai,
I ka nani, i ka hemolele i ke ahonui,
He mea nui wale no nana.
Na ke Akua lokomaikai,
I nui wale ai hoi ha ka lani.
He nui ka lani me ka honua,
He nui ka mauna me ke kai,
He mea hana wale no na ka Akua;
Na kona mana wale no.
O ko ka la wahi no i kau ai;
O ka moku nae ke huli ana, huli ka moku,
Palamimo, palanehe ole, pala ole,
Aole kakou e ike i kana oihana akamai,
O ke Akua ke kookoo nui e paa ai ka honua.
No kekahi hewa a me ka pono.
I ka wa kahiko loa, a hiki mai i ka'u wa i ike ai i na mea pono a me na mea hewa; eia ke kanaka pono i ka'u lohe ana, a me ka'u ike ana. Ina o ke kanaka i manao e loaa kona waiwai i ke alii, o ka aina, o ka hale papaa, o ka puuku o kela mea o keia mea, ke loaa mai ia ia; penei ka loaa ana o keia mau waiwai ia ia. O ka hoolohe pono, o ka ae aku i ka ke alii olelo, o ka hooponopono i na mea liilii a ke alii i waiho mai ia ia. A koe loa, a waiho loihi, a ninau mai ke alii e koe ana, manao ae la ke alii; he kanaka pono keia, alaila, haawi mai la ke alii i na waiwai a ua kanaka la i manao ai, e loaa mai ia ia. Pela ka loaa ana o ka waiwai ia ia.
Eia ke kanaka pono ole. I ka wa kahiko, ina e hoouna ke alii i kekahi kanaka e holo i ka aina i ai, a me ka waiwai a pau, alaila holo aku la ua kanaka la, a loaa mai la na mea ana i hele aku ai, a pau i ka haawiia e ua kanaka la, a ninau aku la ke alii, auhea hoi kau mea i hele aku nei? I mai la ua kanaka la, ua pau i ka haawiia e au. Huhu iho la ke alii. A pela aku no e hana'i ua kanaka la, a pela aku no; alaila manao ae la ke alii, he kanaka pono ole ia; aole e waiho ka waiwai a ke alii, no kona hewa a me kona pono ole.
Ua like ia me ke kanaka eku e aku i ke aupuni o ke Akua, i keia manawa.
He wahi olelo hooikaika.
Auhe oukou e na haumana a pau loa o ke Kulanui o Hawaii nei. E imi kakou i ka pono; e haalele ae i na mea ku ole i ke kanawai o ke alii, a me ko ke Akua kanawai. Eia na mea ino. O ka hoopunipuni, o ka wahahee aku i kekahi i kekahi; o ka hoohalahala i ka wa e kuai ai a lilo; a ae kahi a me kekahi, hoohalahala hou mai mahope; o ka aihue, o na mea ino no a pau loa; he mea ia e poino ai ka kakou hana ana i na oihana a ke Akua e haawi mai nei ia kakou. E hooikaika loa kakou i ka peno, mai molowa.
KA OLELO
No ka poe kumu ao i ke kula o na kuaaina a pau, mai Hawaii a Kauai.
Auhea oukou e ka poe kumu; E hooikaika oukou i ke ao i na kanaka mai o ao: e alakai ae ia lakou ma ke ala e pomaikai. O Iesu Kristo ke ala, a me ke ola. Aole ola e ae, aole ala e ae, oia wale no.
Ke hai mai nei ka Haku o Iesu i kana olelo e lilo na kanaka a pau i ohua nona. Nolaila, e hoomanawanui kakou, i pakele kakou i ka make e hiki mai ana. E ao me ka pono a me ka oiaio, me ke alakai ole ma na mea ino e ku pono ole ana i ke kanawai o ke Akua.
E ao me ka lokomaikai aku i na haumana, me ka hooponopono loa i ka hana ana o ke kula.
Mai ao aku me ka huhu, a me ka hookiekie. Eia ka mea e huhu aku ai, o na mea lealea a pau loa, o ke kake, o na hana i pono ole ai ke aupuni o ke alii a me ka noho ana o na kanaka, a me na keiki, a me na elemakule.
E hoopaa loa i ka pono a ke Akua nui o ka lani i haawi mai nei ia kakou, o ka pono o ke kino a me ka pono nui o ka uhane.
Auhea hoi oukou e na haumana a pau loa mai Hawaii a Kauai; E hoolohe oukou i ke ao aku a na kumu; mai molowa i ka lakou ao ana aku, e hele mau no i ke kula me ke ao aku i ka na kumu.
Mai helehewa hou, mai paani ma ke kae o ke ahi mau a me ka make.
Mai lilo i ka lealea, i kela hana hewa i keia hana hewa, no ka mea, he pokole wale no ka lealea ana, aole e liuliu a hiki mai ka make.
Eia ka mea loihi, o ka ke Akua mea i haawi mai nei, o ka hana aku i kona makemake, a me kana pono, a e pau ua mau mea la i ka hoohioloia'ku.