Ka Lama Hawaii, Volume I, Number 4, 7 March 1834 — Page 4
LAMA HAWAII.
He hooikaika hoahanau
OIHANA 20—27.
"No ka mea, aole i hoohala ko'u hoike ana aku ia oukou i ka olelo a pau a ke Akua."
Eia ko'u manao hooikaika aku i oukou, e na hoahanau a pau, a me ka poe ana i koho mai ai me ka leo nui; ina kakou he poe hele io na la, e hele kakou a pau me ka ae aku a me ka hooko pono e kapaia mai he poe nona ma ka manaoio, o ka poe haipule a pau loa, a ma ka hookahi hoi iloko o ka mea nana kakou i koho mai. I na kakou iloko ona, hookahi, a o keia hookahi hoi, aole ia e heluia he kane a me na wahine, he hookahi ponoi no ia iloko o ka mea nona ka hookahi. Ina kakou iloko ona, a oia hoi iloko o ka Makua, o kakou pu hoi kekahi me i ilaila. No ka mea, i mai la Paulo, ma ke aoia mai penei. “Aole no e hoohewaia mai ka poe iloko o Kristo Iesu, ke hele ole mamuli o ke kino, mamuli no o ka Uhane." I mai la ia ma kekahi wahi. "E aahu iho oukou i ke kanaka hou, i paumaele ole."
Aole anei kakou e manao e? Ua akaka na mea elua; o ke komo na a maloko ona, oia ke ola; o ka noho mawaho, oia ka mea e loohia mai ai ke kino i ka ino, no ka mea, mawaho o ka hale ka wela a me ke anu, maloko hoi ka mehana a me ka malumalu.
I mai la hoi Iesu penei; "E komo ae oukou ma ka ipuka pilikia, no ka mea, he akea ka ipuka, he palahalaha hoi ke ala e hiki aku ai i ka make; nui wale ka poe e komo ilaila. A he pilikia ka ipuka, he ololi no hoi ke ala e hiki aku ai i ke ola, kakaikahi wale ka poe e komo malaila."
I ko Iseraela laweia ae, mai Aigupita mai, aia no lakou iloko ona; nolaila, ua lanakila lakou maluna o ko lakou poe enemi. I ko lakou noho ana iloko ona, aole ko ke ao nei i lanakila mai; pau ae la ia lakou na aina he nui loa ma Kanaana, no ka mea, aia no ia mau mea iloko o ka lima o ka mea nana i hana.
A i ko lakou puka ana iwaho ona, loaa iho la ia lakou ka make ma ke kino; pau ae la lakou i na mooahilele, a poino iho la lakou imua o ko lakou mau enemi, makau ae la lakou ia mea, a o na mea a lakou i makau aku ai, nana lakou i moni aku, a pau lakou i ka make. I ka Mose pule ana aku i ke Akua, haawi mai la ia i kekahi mookeleawe ma ka lima akau o Mose, a o na mea i nana aku, ua oluolu ko lakou eha. A ma ia hope mai, kokua mai no ia ia lakou, a lanakila ae la, no ka mea, aia no lakou iloko o kona lima. I mai la Davida penei; Halelu 3—23
"Aka, o oe e Iehova ka paku no'u, O kou nani ka mea nana kuu poo e hapai ai."
No keia mea, e lana ko kakou manao. Mai haawi aku ia kakou ma ka palaka, aole hoi ma ka palaualelo; aole ma ke ku e a me ka mokuahana, aole ma ka olioli o ka poe lealea a me ka makemake o ke kino, ka inaina, ke aki aku a me ka hoopaapaa, ka hakuepa a me ka hoopunipuni, a me na mea e hana like ana; o keia mau mea, ka poe ana i hoowahawaha mai ai. No ia mea, he pono i kuu manao mai hoopa aku i kekahi o ko kakou manamanalima iki i ole hoi e hauna ko kakou maiao; he mea pono ia kakou e hoohalike i ko kakou lima akau me ko ka lima hema ano, a ma keia mau mea a pau kakou e make ai.
I mai la Paulo ma Roma 5—5 "A o ua manaolana la, aole ia e hoohilahila mai; no ka mea, ua nininiia mai ke aloha o ke Akua iloko o ko kakou naau e ka Uhane Hemolele, i haawiia mai ia kakou.'' I ko kakou kohoia mai, he pono no ia kakou e hoohalike me ia. Mai kanalua, mai kuihe, mai emi a hoi hope aku; e hoomakaukau i ko kakou pahi kaua, no ka mea, o ko kakou hoapaio, aole ia i loihi aku; eia no ia iloko o ko kakou kino make. I mai la Paulo, "O ka mea hiki mai, e hiki mai no ia." O keia hoi kana i paipai mai ai no kakou penei. Timoteo 6—12. "E paio aku i ka paio maikai o ka manaoio, e paa aku i ke ola mau loa, i kou mea i kohoia mai ai, a i hooiaio aku ai i ka hooiaio maikai imua o ke alo o na mea hoike he lehulehu."
Nolaila, he poe pio io kakou na ka hewa, e ai ana i ka io a me ka iwi. No ka hewa, ua ikea na mea i hunaia iloko o ka ili; e kue ana kekahi i kona iho a me kela mea keia mea. He mea kaumaha no ko kakou naau e hoohilahila ana ia kakou iho he poe lawehala.
I mai la Iesu, "E lawe i ka'u auamo iluna iho o oukou, a e aoia e a'u, no ka mea, he akahai ko'u he naau haahaa, a e loaa ia oukou ka maha no ko oukou uhane.'' No keia mea, e hooikaika ia kakou ma ka hana maikai a pau, e hoomau aku i ko kakou manao ma na kapuai o ka monaoio o Aberahama. O ka poe hele ma keia mau mea, ua kaawale ko lakou wahi e ku nei. Heaha ko kakou manao ia Noa, a me Enoka, a me Lota, a me Daniela, a me ka poe hoike he nui loa? He pono ia kakou e hoohalike me ka lakou hana ana. No ka mea, o ka Uhane o ke Akua, ua like ia me ka manu e imi ana i kahi mehameha, a i loaa, malaila ia e noho ai: pela hoi, ke imi nei oia i kahi mehameha nona iho, a i loaa ia ia, malaila ia e noho ai. Aka, ina ia kakou ke kaeo me ka ae aku, ua lehulehu ae la ko kakou naau, nolaila, aole no ia e noho mai me kakou. No ka mea, he poe ike kakou i kana hana, a i kakoo ole kakou i ko kakou puhaka iho me ka hoomakaukau ole, na kakou no ia i holo okoa aku i ka make.
Nolaila, Ke hele nei kakou i hea? Ahea la kakou e hoomakaukau ai? No ka mea, he poe hele kakou, a he ola ko kakou, ua lualua i pahonoia, a i hemahema kekahi o ka mea pili i ko ke kino, o ka lilo no ia ua ola la.