Ka Lama Hawaii, Volume I, Number 12, 2 May 1834 — Page 3
LAMA HAWAII
3. Ua oleloia, he alii mana o Ninu a he lanakila; nana i hooakea ae a hoonani hoi ia Nineva. A lanakila nui ae la oia maluna o ko kela aina ko keia aina, alaila, mare pu oia me Semirami; oia kona muli mai ma ke aupuni. Ua oleloia, oi aku o Semirami mamua o na wahine a pau ma ka maikai o kona maka, a me ka ike, a me ke akamai o kona kaua ana a me ka hoomalu ana i na mea o ke aupuni. Hooakea ae la oia ia Babulona a lilo ia ke kulanakauhale nui o ka honua nei. A make oia, lilo ke aupuni i kana keiki kane ia Ninia.
4. Mai ka manawa o Ninia mai a hiki i ka manawa o Sadanapala oia ke alii i ka wa i hoohioloia'i ke aupuni; he mau haneri makahiki no ia, ia manawa, aole nui na mea i ikeia no ka mooolelo no Asuria a me Babulona.
5. He mea hoowahawaha maoli ka inoa o Sadanapala. Hooino mai oia ia ia iho i ka hookomo i ke kapa wahine, a ma ka hana wahine, noho ino no me ka palupalu o ke kino, a me ka moe kolohe me kana poe wahine i mareia a me kona poe wahine i mare ole ia. A mahope mai, huhu ae la o Arabake kiaaina o Media, a o Belesi ke kahuna pule no Babulona no kona noho alii ole ana, a me kona noho hilahila ana, kipi aku la laua ia ia. A i ke kaua ana, hee ae la o Sadanapala. a i haule ole ia iloko o ko laua lima, puhi iho la oia i kona hale alii i ke ahi, a pau pu oia a me kana poe wahine a me kana waiwai i ka wela.
NO KA NAAU HAAHAA.
POMAIKAI LAKOU KE HAAHAA KA NAAU.
Na Iesu.
O ka naau haahaa ka hua mua no ka pono. Olelo pinepine mai o Iesu, penei. O ka mea e hookiekie ae ia ia iho, oia ke hoohaahaa ia; a o ka mea i hoohaahaa ia ia iho, oia ke hookiekieia'e. O ka pono i aoia'i ma ka olelo a ke Akua, oia ke ao mai nei i ka haahaa oiaio o ka naau. Ina oiaio ka haahaa ana o ko kakou naau, ina ua lilo kakou ma ka manao ana i mea ole imua o Iehova hanohano.
Makemake no ke kanaka haipule e hoomoe ia ia iho imua o ke alo o ka mea nana i hana, no ka mea, malaila i loaa ai ia ia ka manao ku pono me kona ano hewa, a he manao mahalo aku no hoi i ka hemolele a me ke aloha i kona mea e ola'i, a ua lana hoi kona manao i kona lokomaikai.
I kona manao, ua like na kanaka a pau, no ka mea, papapau pu lakou ma ka hewa, ma ke kipi aku ia Iehova, a me ka paumaele o ka naau. Hilahila loa iho la ke manao oia ma kona pono iho, no ka mea, he mea ole kona pono, ua emi mau mai oia, aole i hana e like me ka ke Akua. Auhea hoi kona mea e haaheo ai? No ke aha la e hookano ai ia ia iho ke kanaka i hoohewaia imua o ke alo o kona alii hoopono? Aneane no e make ka mea manao hookiekie ia ia wale iho no, aole i manao ia hai aole i hoomanao i ka ke Akua.
O ka haaheo ka mea e hoopaakiki ai i ka naau, a o ko Iesu pono wale no ka mea e hoopalupalu ai, a e hoola mai ai no hoi.
HE PAPA MOKU.
Lahaina Mei 2. 1834
Aperila 28, Ku mai ka moku o kohola, o Amazona ka inoa, o R. Geasy ke alii; no Faira Havena mai, 10 1/2 mau malama ka holo ana, 200 barela aila i loaa.
Aperila 29, Ku mai ka moku. o George & Henry ka inoa, o F. Joy ke alii; no Nanetuketa mai; 17 malama ma ka moana, 1000 barela aila.
'' '' Ku mai ka moku, o Marther ka inoa, o G. W. Riddell ke alii, no Hudesona mai; 7 malama ma ka moana.
Mei 1, Ku mai ka moku, o Orazimbo ka inoa; o—Adams ke alii; no Nu Bedefoda mai. 15 malama ma ka holo ana, 700 barela aila.
NO SOLOMONA
MOKUNA 1.
1. O na olelo nane a Solomona o ke keiki a Davida, ke alii o ka Iseraela.
2. O ka ike i ka noiau a me ke aoia mai, O ka hooakaka i na olelo e naauao ai:
3. O ka looa ana ka ike e akamai ai. O ka pololei a me ka hoopono a me ke ku pono.
4. O ka haawi i ka maalea i ka poe naaupo,
A me ka ike a me ka noonoo i ke kanaka u:
5. E hoolohe ka mea akamai, a mahuahua ka ike:
E loaa no ka mea aoia ai ka ike e naauao ai;
6. O ka ike i ka nane a me kona hoakaka,
O na olelo a ka poe naauao a me ka lakou olelo pohihihi.
7. O ka makou ia Iehova, oia ka mole o ka ike,
Hoowahawaha ka poe lapuwale i ke akamai a me ke aoia mai.
8. E kuu keiki, e hoolohe mai i ke ao ana a kou makuakane,
Mai haalele hoi i ke kanawai o kou makuawahine.
9. No ka mea, he papale nani ia i kou poo
He mau lei hoi no kou ai.
HE UI NO KA HELU 11
No ka Bipi.
Heaha ko ka Bipi?
Ehia niho ma ke aluna a ma ke alalo?
Pehea ka pepeiaohao, a me ka maiuu?
He holoholona maikai anei?
Mahea kona maikai?
Ua maikai ka ilibipi i ke aha?
Ua hanaia kona pepeiaohao i aha?
Pehea ka io a me ka aila?
Aole anei i hana ino iki mai ka Bipi?
Ma na aina hea i holo hihiu na Bipi?
Ua like anei ka nui o na Bipi ma na aina a pau?
Mahea kahi i nui ai ke kino o ka Bipi?
Mahea hoi i uuku ai?
Aole anei i like ka Bipi me ka Bufalo?
No ke aloha o ka lio.
Pehea ka manao o ka lio i kona kahu?
Heaha ka mea i oleloia ma ka lio keokeo a kekahi wahine ma Beritania?
Heaha ko kakou mea i aoia'i malaila?
No ka holo ana o na Misionari ma Nuuhiwa.
Owai ka poe misionari i holo ilaila?
No ke aha la lakou i holo ai?
Pehea kolaila poe kanaka?
Pehea ka olelo i loaa ihonei mailaila mai?
Owai ka poe kokua pu mai ia holo ana?
Ehia dala i haawaiia'i ma Honolulu?
Ehia misionari e pono ke holo ia makahiki aku ia makahiki aku e hoolaha i ka ke Akua olelo?
No ka hiamoe.
Mahea kahi i noho nui ai ka hiamoe?
Pehea kona mau wawae?
Pehea kona hele ana?
No hea kona inoa o Hiamoe?
Heaha kana mea ai?
Pehea kona io i ka hoao?
No ka mooolelo no Aigupita.
Mahea ka like ana o Aigupita me na aina e?
A make kekahi alii, a he kanaka paha pehea iho la?
Owai ka i hookumu i ke aupuni o Aigupita?
Ua ikaika anei ko Aigupita kahiko i ke kaua?
Heaha ke ano o ke alii o Neko??