Ka Lama Hawaii, Volume I, Number 12, 2 May 1834 — Page 4

LAMA HAWAII

No ka hewa o ka manao nui ma ke kino.

            Eia kekahi mole o ka hewa mai ka wa kahiko mai; a ua hewa lea no hoi i keia manawa. O ka manao nui ana i na mea o ke kino; a uuku ka manao ana i na mea o ke ola ana.
            No ka mea, ua oi aku ke ola mamua o ke kino, ina e hele ke ola mai kino aku, alaila ua pau no ke kino, aka aole loa e pau ke ola ana ma ka uhane, ke ola nei ke kanaka no ka ai ana i ka ai, aole no ka nani o ke kino, ke mehana nei ke kanaka no ke kapa, aole no ke kahiko ana i na mea e nani ai.
            I ka wa kahiko, imi nui na kanaka a me na'lii i na mea e nani ai, a e hanohano ai a e lealea ai ke kino, imi uuku no i na mea e ola ai ke kino, no ia mea; ua nui loa ka hewa mai ka wa kahiko mai a hiki i keia wa.
            Nolaila ke kaua pinepine o ka poe kahiko, a me ka puni aina, ka puni waiwai, ka puni hanohano, ka puni wahine, ka puni aikane, ka puni haaheo, o na mea a pau i hewa ai ka poe kahiko; oia no ka hewa i keia wa.
            Eia kahi hewa hou o keia wa, o ka puni kala, o ka puni lole, o ka puni aie, nolaila ua pii nui na makaainana i ka laauala, ua nui ka poe make ma ka nahelehele, ua pau ka laauala, aole i pau ka aie, a ke imi nei na makaainana i ke kala no ua aie la, ua make kekahi i ka moana Oahu.
            A o Poki kekahi i make no ka aie, a me na kanaka pu me ia, ua olelo mai ke Akua, "O ka manao ana ma ke kino he make ia," ua nui ka auhau ana o ke kala, ua nui ka uku, ua nui ka ohi.
            Aole paha e pau ka aie i ke kala, o ka aina paha ka uku e pau ai. Ina i manao nui ke kanaka i kona kino iho, e paakiki auanei oia, a e hookamani, a e hoopunipuni, a e imi akamai, a e kaalalo, a e hookalakupua, a e alunu a e makee ua nui loa na hewa malaila, nolaila ua hoike mai ke Akua i ka hewa nui ma ko kakou kino.
            No ka hewa ana o ke kino e make ai ka uhane, ke ninau aku nei au i ka poe e lohe mai i keia olelo, ma ka mea hea la e manao nui ai? Ma ke kino paha a ma ke ola paha
            O na mea ai, a me na mea aahu, a me na mea inu, o lakou a pau no ke kino, aka ua oi aku no ke ola mamua o ke kino, no ka mea ina e nana kakou i kekahi kupapau e waiho ana, a he lolo kekaki, e loaa no na mea a pau i ka lolo.
            Aka aole loa e loaa kekahi mea i ke kupapau, no ka mea, aole no ke ola me ia.
            Eia ko'u manao no keia mau mea, e malama kakou i ka ke Akua mau kauoha me ka hookamani ole, o na mea ana i olelo mai ai e hana, ea, e hana kakou me ka hoomanawanui, a o na mea ana i kauoha mai ai e haalele, ea, e haalele loa kakou me ke aloha hoomau loa aku ia ia.
            I ola kakou mai keia ao aku, a ola mau aku no i ke ao pau ole. E na makamaka e, i nui ka ikaika i ke aumeume ana i ke ola, no ka mea ua uuku ke ola ma keia ao, ua nui loa ka make a me ka hewa e hohola mai nei.
 

Ka oihana a ka poe i malama i ka pono a me ka poe malama ole i ka pono.

            Ua nui loa na hoahanau i hele i kekahi mea e, aia no lakou maka nahelehele i keia manawa, ina paha i uluia kekahi kanaka e ka uhane ino, ua kapa iho la kekahi kanaka he uhane maikai maloko o kona naau. Ua nui loa na kanaka i hoolohe ia olelo, a me kekahi poe ekalesia, aia no lakou ma ka nahelehele i keia manawa, ua hoouku ia lakou e ke kanawai o ke Alii., no ka imi apa ana a na kamaaina ia mau mea. Eia kekahi oihana, no ke kino. He pau ko ke kane i keia manawa., ko lakou malo no ia, ua like lakou me na wahine a pau, he mea hilahila loa ia ia lakou ke hele i ka ahakanaka me ka malo, ua waiho wale mai na huluhulu o ke kino.
 

No ka pono o ka ike a me ka hewa.

            Eia ka ike pono, o ka ike i ka mahiai, o ka ike i ka lawaia, o ka ike i ke kalaiwaa, o ka ike i ke kuenehale, a me ke kaupaku, o ka ike i ka hoewaa, o ka ike i ka hoolana, o ka ike i ka makani a me ka malie, o ka ike i ke kilokilo, o ka ike i ke koa, o ka ike i ka hula, o ka ike i ke olioli, o ka ike i ka apiki, o ka ike i kela mea i keia mea. Oia na ike a makou i manao ai he pono, aka, he oiaio no ia manawa, aka i keia manawa, ua lilo kekahi mau ike i mea ole, Eia ka ike hewa, o ka mauele, o ka noho wale, o ka palaualelo, aole he hana, aole he mahiai, he pono na hai mai, nolaila ua ulu ka hewa i keia mau ike, o ka aihue iho la no ia, a hoopii no i kahi alii. Aka aole i ike ia, alaila, pomaikai keia mau la, oia no na ike hewa. Eia ka ike e pono ai, o ka hoolilo i na ike kahiko i ike hou. Like me ka Paulo i olelo mai ai, ma ke Korineto 2 mokuna 5 17. "No ia mea, ina iloko o Kristo kekahi kanaka, he mea hou oia, ua hala aku la na mea kahiko, aia hoi ua ano hou ae la na mea a pau'' Eia ka ike hou e pono ai, o ka ike i ka olelo a ke Akau, a maopopo ka heluhelu ana, a me na kiko, a me na leo, a a me na hopunaolelo, alaila, e aka hele ka heluhelu ana i maopopo ke ano, ke olioli nei ko makou naau i na mea a makou e ike nei, o keia ike, aole no makou wale, aka no kakou no a pau keia ike. A ma ka ike hou kakou e pono ai a ma keia ike hoi e ola'i kakou, ma o Iesu la hoi e ola'i ko kakou uhane, oia ka mea no na ka ike mau loa e pono ai.
 

No ka poe hiamoe a me ka poe molowa.

            Auhea oukou e ka poe hiamoe, ua hoakaka ia mai, iloko o ke ao, he umi ka hora me kumamalua, oia na hora e hana ai ke kanaka, aole pono e hiamoe ia mau hora, iloko hoi o ka po, he umikumamalua hora, oia na hora e hiamoe ai, aole hoi e pono e ala, o ka hiamoe i ka la sabati kekahi hewa nui, no ka molowa no, oia ke kumu o ka hiamoe, nolaila hoi i waiwai ole ai keia pae aina, no ka molowa o na kanaka, a me ka hiamoe.