Ka Lama Hawaii, Volume I, Number 14, 16 May 1834 — Page 4

LAMA HAWAII

No ke kauoha a ke Akua, a me na makua.

            Kauoha mai la ke Akua, penei E malama oe i ko makuakane a me ko makuwahine, i loihi ai kou ola ana maluna o ka aina a Iehova a kou Akua i haawi mai ai ia oe. Pela o Mose i hai mai ai ma keia olelo e malama aku ke keiki i kona makuakane a me kona makuwahine. I mai la Iesu, o ka mea e malama i ka makemake o ko'u makua iloko o ka lani, oia ko'u hoahanau a me ko'u kaikuwahine. Eia, me keia mau kanaka ko'u makemake; ina paha, pela ko kakou makamake e imi nui aku kakou i ko kakou Akua nui o ka lani. Auhea oukou a pau loa, e na haumana o ke Kulanui; ke imi nei kakou i ka ike a me ka naauao. Aole ka imi i ka huaolelo ino, aole i na huakamalii, aole keia mau mea e pili i ka naauao. Auhea oukou e ka poe e nana nei ma keia palapala a kakou e nana nei, a e nana kakou me ka noonoo a me ke akahai, a me ka malama; aole hookiekie, aole hoakamai. I mai la ka olelo a Paulo penei. "I ko lakou hoakamai ana aku, lilo ae la lakou i naaupo." Roma 1, 22.
            A pela no hoi na makua: i kauoha mai ai; o na mea a lakou i kauoha mai ai, o ka lawaia; a me ka mahia ai, oia no ka na makua mea i kauoha mai. A i keia manawa, ua kauoha mai lakou i ka pono o ke Akua, ua loaa mai ia'u kekahi palapala na ko'u makuwahine mai; I mai la ia peneia, e noho pono mai oe, e noho pu kaua ma ka maikai.
            Pela mai ke kauoha ana mai o ka leo o ko'u makuwahine, pela no ko'u manao, ke ae aku nei au i kana kauoha, ke olioli nei ko'u naau i ko'u ike ana i kona manao, ke ae aku nei au ma keia palapala au e ike nei, a ma keia kauoha.
            Nolaila ke manao nei au, o ke Akua pu kekahi me ia, a pela no hoi au, o ke Akua pu kekahi me au, i kela la i keia la; O ka la Sabati, oia ke kauoha nui loa a ke Akua o ka hiku ia o na la a pau loa. Mai hana kakou ma ka mea ku e aku i ke Akua, a ka hoahanau, i mai la o Mose. "Mai hohiki ino oe i ka inoa o Iehova o kou Akua, aole loa e pono ia Iehova ka mea nana e hoohiki ino i kona inoa." Kanawai. 3. Peneia, ko'u manao i kela olelo. Aole loa e hoohiki ino ke keiki i kona makua, a me ka makua i ke keiki; a me ka hoahanau i ka hoahanau; a me ke kane i ka wahine a me ka wahine i ke kane; pela no keia mau kanaka a pau. Ina paha e heluhelu kakou i keia palapala a ike ma ka Lama Hawaii; alaila hoike mai no ia palapala, he mea hoolahaike keia mea, no na aina naauao mai, ua ike kakou, he mea hoike aku i ke ano o kona makemake ana i keia hana. Ua aloha au i ka pono, o ko kakou Akua nui o ka lani, e malama aku kakou i ke ola i haawi ia mai no ko kakou mau uhane. Oia no ka mea nana i hoike mai keia hana a kakou e hana nei e nana aku kakou a ike i ka hewa e kinai aku i ka hewa e pio. Ke ike nei kakou i ke ano o ka pono. Ua lohe kakou, a ua ike maka kakou i ka manao o na'lii moku haole no ka pono o ko lakou noho ana, a me na kanaka, manao no lakou e kinai i ka inurama, kela mea hewa, keia mea hewa.
            O keia mau mea a pau o ke Akua wale no ka mea nana e hookaawale e pau ai. I mai la lakou ia kakou, Auhea oukou a pau loa, o ke Kulanui o Lahainaluna ua i mai lakou e imi pu aku kakou i ka hope o keia huaolelo ua ao kakou mahope o ka naauao, nolaila ua pono keia hana ana a lakou ua hai mai lakou i ka pono o ka hiki ana mai o na malihini ma keia pae aina, a ma keia hana e naauao ai ke kanaka; alaila lilo kakou a pau i poe kinai aku i ka hewa, a hoomahui i ka pono no ka maikai, a mai hoemi iki i ka pono no ka howa, e hoomahuahua i ka pono a me ka maikai, ua ike kakou i ka imi ana o ka poe naauao, kahea aku la lakou i ke Akua e hoopau i na hana ino o keia pae aina. Ke makemake nei ka naau i ka hoike ana mai o ke kumu i na wahi a pau loa. I mai la ke kumu ma ka la Sabati, "E auhulihia ka poe hewa ilalo i ka po a me na lahuikanaka a pau i hoopoina i ke Akua." Hai mai la no ia i ke ano o keia olelo, na ke Akua e hookaawale mai ka poe hewa, a me ka poe pono, pela oia i hoike mai aia keia olelo ma ka Halelu, 9, 17. Auhea oukou e na hoahaumana o ua kula nei? E nana mai kakou i keia huaolelo, aole na kanaka e hookalawe. I mai la ka olelo ma ka Marako, 10; 6—12. A pela no hoi kakou e noho pono ai me na wahine, aole ka hana ma ka mea ino, aole ka hoino aku i ka wahine, a pela hoi ka wahine i ke kane, e noho pono no e like me ka ke Akua kauoha ma ka like a ma ka pono, a me ke ola o ka uhane. A ma Lahainaluna i ku ai ka hale kulanui o keia pae aina mai Hawaii a Kauai. A ma keia kula e loaa ai ka naauao, a maanei no hoi i ikea'i na kanaka akamai, a pehea la kakou e loaa ai ka pono a kakou. O na waha o kakou ka i olelo pela ma ka poalima, aka, o ka makemake a kakou i olelo ai aole ia i hoomaopopo ia. Auhea oukou e ka poe haumana hale o uka nei, ke ninau aku nei au ia oukou, heaha la ka hewa o ka pule o uka nei a oukou i haalele ai? He hana okoa anei ko uka nei? He hana ino paha, keia hale pule a oukou, i haalele wale ai i keia hale pule. He oihana okoa anei ko kai hale pule? a he ano okoa paha ko ia hale pule a oukou i makemake ai i kai. O ko'u manao mai hookaawale iki kakou i ko kakou hale pule i ka mea a kakou i olelo ai peneia; i na paha i uka nei no hoi ka hale pule, i na paha ua pono no hoi, aole e make i ka wela nui o ka la, a no keia ohumu ana, a haawi mai ke Akua i ke aloha iloko o kana poe kauwa a haawi mai no hoi ia i hana hou no ka la Sabati.
 

            He mea pono ia kakou e hooikaika me ka palapala. E ao ikaika i loaa pono ia kakou kana olelo, e hooikaika kakou, e na kanaka, a me na kamalii, a me na wahine.
NA KAUIKEAOULI.