Ka Lama Hawaii, Volume I, Number 17, 8 August 1834 — Page 3
LAMA HAWAII.
nui loa e nana. Na Binamu i olelo aku ia lakou ma ka ke Akua olelo. I mai la na kanaka i kauiai, "Ua hewa maua, ua pono ke alii." Pela io no. O ka hooko i ke kanawai, he pono no ia. Oia kekahi mea e pono ai ka noho ana o na kanaka. Ina aole e hookoia ke kanawai, ua lilo ua kanawai la i mea hoopunipuni; nolaila ulu nui mai ka hewa. Ina oiaio ke kanawai, makau na kanaka i ka hewa.
NA SOLOMONA.
MOKUNA 3.
E kuu keiki, mai haalele oe i ko'u kanawai,
E waiho hoi i ka'u mau kauoha ma kou naau.
2. No ka mea, oia ka nui ai na la a me na makahiki o kou ola ana,
A o ka malu hoi e haawiia ia oe.
3. I ole e haalele ia oe ka lokomaikai a me ke aloha,
E hawele ma kou ai,
E kakau hoi ma ka papa o kou naau.
4 E imi i ka lokomaikai a me ka ike oiaio,
Imua o Iehova a me kanaka.
5 E paulele ia Iehova me kou naau a pau,
Mai hilinai hoi ma kou naauao ana.
6 Ma kou aoao a pau e ike oe ia ia,
A nana no e hoopololei i kou hele ana.
7 Mai hooakamai oe ma kou manao iho,
E Makau ia Iehova a e haalele i ka hewa.
8 Oia ke ola no kou mau olona,
A me ka lolo no kou mau iwi.
9 E hoonani ia Iehova ma kau waiwai,
E me na hua mua o kau mea i loaa'i a pau.
10 A e hoopihaia kou wahi waihona a hu,
E hu ae kau mau mea kaomi i ka waina hou
11 E kuu keiki, mai hoole oe i ke aoia mai e Iehova,
Mai hopohopo oe i kona hooponopono
12 No ka mea, o ka mea i alohaia e Iehova, nana ia e paipai aku,
E hoeha hoi i ke keiki ana i makemake ai.
13 Pomaikai ke kanaka ke loaa ia ia ke akamai,
A o ke kanaka hoi i makaukau i ka ike.
14 No ka mea, ua oi aku ka maikai o ia mamua o ka maikai o ke kula,
A o ke kuai ana hoi mamua o ke gula.
15 Ua maikai oia mamua o ke akoakoa,
Aole i likeia kou makemake apau me ia.
16 Aia ma kona lima akau ka loihi o na la, me ka hanohano.
A ma kona lima hema hoi ka waiwai a me ka hanohano.
17 O kona mau aoao, he mau aoao malumalu no,
Ua pau hoi kona mau alanui i ka maluhia.
18 Oia ka laau o ke ola no ka poe e hoopaa ana ia ia,
Pomaikai hoi ka mea e apo ana ia ia.
19 Hookumu iho la o Iehova i ka honua i ke akamai,
Kau paa hoi oia i ka lani ma ka ike.
20 Ma kona ike hoi ua wawahiia na wahi hohonu,
A ninini mai no na ao i ka ua
21 E kuu keiki, mai huli e aku kou mau maka,
E hoopaa i ka naauao a me ka ike.
23 He ola no ia no kou uhane,
He hanohano no ia i kou ai;
23 Alaila, e hele makau ole oe ma kou ala,
A o kou wawae hoi aole ia e palaha.
24 E moe iho no oe, aole oe e makau,
E moe iho no oe a e oluolu kou hiamoe ana.
25 Aole oe e hopohopo i ka mea makau ke emoole mai,
Aole hoi i ka luku ana i ka poe hewa ke hiki mai
26 No ka mea, o Iehova no kau mea e paulele ai,
E malama no oia i kou wawae aole ia e heiia mai.
27 Mai hoopaa oe i ka maikai o ka mea nana ia,
Ina e hiki i kou lima ke haawi aku.
28 Mai olelo oe i kou hoa noho,
O hele oe a hoi mai, apopo e haawi aku au,
Ke waiho wale ia mea nau.
29 Mai imi hala oe i kou hoa noho a hihia,
No ka mea, noho malie no oia me oe.
30 Mai hoopaapaa oe me kanaka hala ole,
Ina aole oia i hana hewa aku ia oe.
31 Mai hoomahui oe i ke kanaka hana hewa,
Mai koho hoi oe i kona mau aoao.
32 No ka mea, he hoopailua ia Iehova ka aia,
O ka poe pololei oia kona anaina.
33 O ka hooino o Iehova aia ma ka hale o ka mea hewa,
Ua pomaikaiia hoi kahi noho ai ka poe pono.
34 E hoowahawaha mai oia i ka poe hoowahawaha aku,
E haawi mai oia i ka lokomaikai i ka poe haahaa.
35 E hooilina lakou i ka hanohano a me ke akamai,
O ke kiekie ana o ka poe hewa he mea ole ia.
HE KANIKAU NO KAAHUMANU.
Mihalanaau i kuakahiki ka newa'na,
Ke kaha'na ka leina aku nei liuliu,
Liua paia aku nei i kuanalia,
I analipo i analio.
Lilo aku la i ka paiakuakane,
I ke ala muku maawe ula Kanaloa,
Keehi kulani aku la ka hele ana,
E Malolokihakahakuleiohua.
Ke 'lii i kuluhiolani aui newa aku nei,
I lele aku na i ke kohi ana o ka pawa,
I ke anohia kohikohi an'o ka po,
Ka lilo ane', ia,
Oia hoi, he uwe, he aloha ia oe, aiala, o—i—e.
A aloha liua lio paiauma ka manawa,
Pakoni hui ke aloha loku i ke ake,
Wehe wahi ka pilipaa o ka houpo,
Naha ka paa, ka pea kua o ke kanaka,
Helelei, hiolo ka pua o ka waimaka,
Lele leio, lio loko i ka mihi,
Mihi o ke alohi o kuu haku maoli,
A kaawale okoa ia'loha ana,
Aloha aku o ke aloha hoahanau,
Aole he hoahanau ponoi no'u,
He hanauna ku okoa iloi ka Haku,
I hanauia o ka Uhane Hemolele,
E ka Makua hookahi o makou,
I pilikana ilaila e wena aku ai,
Ilina inoa kaikuwahine no'u,
Auwe no hoi kuu kaikuwahine,
Kuu hoa hooikaika ka luhi leo e, ia, iala, o—i—e.
Oia no o oe ke aloha, ka u aloko a,
A, aloha oe ka hakukau o ka manao,
Ke kookoo 'ka leo e ili aku ai,
E imi pu ai o ka waiwai ka pono e, ia, iala, o—i—e.
O ka wahine alo ua wahila o Kona,
Nihi makani alo ua, kukalahale.
Noho anea kula wela la o Pahua,
Wahine holo ua hoao nuanu e, ia,
Holo a nele i ka pono, ua paoa,
Ua hihi aku hihi mai, ke aloha ole,
Aole pono, he enemi noho pu e, ia.
Aha, aia'ku la i he lani,
Ka Uhane a ke kino wailua,
Kinoakalau pahaohao,
Oiwi haona hiona e,
Hailiaka, kino ano lani,
Hoa anel'o ka lani ma,
Ke luana wale la i ka lani,
Ua luakaha ka noho ana,
Ke halelu ia la ilaila,
Iloko o ka paredaiso nani,
I ke ao mau loa o ka Haku e, ia.
O ko kahou mau Haku no ia
O ka Haku mau no ia, oia no.
O ka manao ia loko e ake nei,
E ake aku nei e, e.
MEI 22, 1834. LAHAINALUNA.
DAVIDA MALO.
HE UI NO KA HELU 16.
No ka Dia.
He holoholona e ae anei i like me ka Dia?
Pehea kona mau wawae a me ke kino?
Pehea na pepeiaohao a me kona poo?
Pehea kona kiekie a me ka loa?
Ehia niho? Pau pu ehia?
Mahea kahi i loaa'i ka Dia?
Pehea ke ano o kona manao?
E hiki anei ke hoolakaia mai?
He mea paa mau anei kona pepeiaohao?
Pehea la e ikeia ai kona makahiki?
Pehea ia i ka wa i haule ai ka pepeiaohao?
Ehia makahiki ona?
He mea waiwai anei ka Dia?
Mahea ka like o ka Dia me ka Eleka?
Mahea ka like ole;
Na Solomona.
Heaha ke ano nui o kana olelo?
No Helene.
He aina aha o Helene i ka wa kahiko?
Hookahi anei lahuikanaka nui paha?
He poe akamai anei, he hawawa paha?