Ka Lama Hawaii, Volume I, Number 21, 27 September 1834 — Page 1

KA
LAMA HAWAII.
HE MEA IA E HOOLAHA IKE, A HE MEA HOI E PONO AI KE KULANUI.
"I naaupo ka uhane, aole ia he maikai.".......NA SOLOMONA.
Makahiki 1. MAUI, LAHAINALUNA, SEPATEMABA 27, 1834. Helu 21.

LEOPADI
 
NO KA LEOPADI.

            Ua like kekahi ano o ka Leopadi me ko ka popoki.
            Ua like kona kiekie me ko ke keiki o na makahiki elua, a ua like kona loa me ka noho loihi, kahi noho ai o na keiki eha, a elima paha. Elua kapuai a me ka hapa ona kiekie, a eha kapuai a me ka hapa kona loa.
            Ua like kona mau helehelena me ko ke Tiga a me ko ka popoki. Ua uuku kona poo, a ua pokole kona pepeiao, ua loihi ke kino, ua pokole kona mau wawae, a ua ahinahina olenalena kona ai, ua kikokiko ma ke kua, a ma ke poo, a ma ka maka, a malalo o ka ai, ua ahinahina keokeo; a ma ka umauma ua keokeo ahinahina. Ua kikokiko kona kino a pau, he eleele na kiko.
            Ina noho ka Leopadi ma kona wahi moe, aole mea kokoke ia ia, alaila he oluolu, a kolohe ole, e like no me ka popoki. Aka i kona wa e ai ai i ka ai, ina hele aku kekahi a kokoke ia ia, a hahau paha ia ia i ke kaula, alaila, hae mai no ia me ka hoike i kona mau niho, a hihiu loa no a huhu no hoi.
            O ke Tiga paha ka mea huhu loa o laua, a oia hoi ka i hana ino loa. He lokomaikai iki ka Leopadi i kona kahu, he ole loa ke Tiga. A i kekahi manawa e hiki no ke pa aku ka lima ia ia, aole ia e nahu mai.
            Ina paa i ka wa uuku a hana maikai ia hiki no ia ke hoolakaia. Ua hoolakaia ke kahu, a ua hele pu no me ke kahu, e like me ka ilio, a ina i hamo aku ka lima i kona poo alaila noho oia e like me ka popoki. He ilio huhu no nae, no ka mea i kekahi manawa, nahu no ia i ka lima i hanai ia ia a pepehi aku no i kona kahu.
            Ma Aferika kahi i loaa nui ai ua holoholona nei.
            Ua loaa iki no hoi ma Kina, a ma Asia.
            O ka io kana ai, ka io o na holoholona i loaa ia ia ma ka ululaau. A i loaa ole malaila, hele no ia ma kahi kauhale, e imi hipa a i kao hoi. A i loaa ia ia ka pahipa, pau loa na hipa i ka make i ka po hookahi.
            Ua kapaia kekahi Leopadi hahai, no ka mea, e hahai no ia i na holoholona e, a paa no kona kahu. Ua uuku iho ia Leopadi. Lawe no kona kahu ia ia, iloko o ka ululaau, e paa ana no iloko o ka hale pahu. A i na ike aku ke kahu i dia, a i mea e paha, kuhikuhi aku ia.
            Alaila, kolo malu aku la keia ilio maalea, e like me ka popoki, a hiki i kahi kokoke, alaila lele aku la ia a paa no ia ia, a hiki mai kekahi.
            He mea maikai loa ka ili Leopadi, ke nana aku. Oia ka ili maikai ma ka nuku o kekahi noho lio, a ua hana ia i wahi no na pu panapana. Ma Aferika, ua ai ia ka io o ka Leopadi, e na Negero.
 

No ka Lama Hawaii. Helu 2

            "He nui no kuu kaumaha a me ka ehaeha mau ma kuu naau. No kuu poe hoahanau, na hanauna o'u ma ke kino.
            Manao au e hooikaika ia oukou e na haumana o ke kulanui, e aloha nui i na hanauna o oukou ma ke kino, a e hana ma ka molowa ole, i na mea e pono ai keia aupuni.
            Ke ike nei au, he nui na mea e poino ai ko oukou noho ana ma keia pae aina. Ua nui ka pouli a me ka naaupo i koe mai kela kihi o ka aina a keia kihi. Aole manao nui paha na 'lii a me kanaka i ke kulanui o Lahainaluna. I ko oukou lilo ana i poe naauao, a me ke akamai i ka hana, aole paha e lilo ai oukou i poe waiwai malaila e like me na haumana ma na aina e. I lilo kekahi i poe akamai i ke ao ana i ka poe naaupo, aole paha e hoolimalima mai na kanaka ia oukou e ao aku i ka lakou poe keiki. I ao oukou i ka hooholo mokupuni la ihea ka moku a oukou i hooholo ai? I lilo oukou i poe kahuna lapaau, nawai e haawi mai na oukou i na kala i lapaau aku oukou i ka poe mai. I lilo oukou i poe kahuna pule, nawai e malama i ka oukou wahine a me na keiki i ko oukou hele ana a puni ka aina, e hai aku i ka olelo maikai a Iesu? Aole paha. I ko oukou lilo ana i poe makaukau e hana i kela hana, a i keia hana; a i ka oukou hana maikai ana i kela la i keia la, e hana ino ia mai paha e oukou.
            He mea nui anei keia? Pehea Iesu Kristo i kana hana maikai ana i kanaka? Heaha ka uku a lakou i haawi aku ai ia ia? o ka lei kakalaioa a me ka laau hahau, a me ke kea! Pehea o Paulo? No kona aloha i na kanaka, hooikaika oia, a hiki i ka wa o kona make ana, i kona imi ana i na mea e