Ka Lahui Hawaii, Volume I, Number 11, 11 March 1875 — Page 4
Na Ekalesia o Kawaiahao a me Kaumakapili.
Halawai kakahiaka, la Sabati .... hora 10½
Halawai po ..... hora 7½
Halawai Apana auina la ..... hora 3½
Kula Sabati ..... hora 9½
NA KULA SABATI.
NA HAAWINA.
Aper. 4.—Hoalaia na Lunakanawai.—Lunakanawai II: 8—16.
8 A make iho la o Iosua, ke keiki a Nuna, ke kauwa a Iehova, hookahi no haneri kona mau makahiki me ka umi keu.
9 A kanu iho la lakou iaia ma ke kihi o kona aina, ma Timenaheresa, ma ka puu o Eperaima, ma ke kukulu akau o ka puu o Gaasa.
10 Hui pu ia'e la ia hanauna a pau me ko lakou poe makua, a ala mai la kekahi hanauna hou, mahope mai o lakou, aole lakou i ike ia Iehova, aole hoi i na hana ana i hana mai ai no ka Iseraela.
11 Hana hewa aku la ka mamo a Iseraela imua o Iehova a malama lakou ia Baala.
12 Haalele lakou ia Iehova, i ke Akua o ko lakou poe makua, i ka mea i lawe mai ai ia lakou mai ka aina i Aigupita mai, A hahai lakou mamuli o na'kua e, i na'kua o ka poe kanaka e noho poai ana ia lakou, a hoonaukiuki aku la ia Iehova.
13 Haalele lakou ia Iehova a malama iho la ia Baala a me Asetarota.
14 Wela iho la ka huhu o Iehova i ka Iseraela, a haawi ae la ia lakou i ka lima o ka poe hao, a hao ae la ia poe i ka lakou, a hoolilo aku oia ia lakou i ka lima o ko lakou poe enemi, e noho poai ana ia lakou, aole hiki ia lakou ke ku hou imua o ko lakou poe enemi.
15 Ma na wahi a pau a lakou i hele aku ai, ku e no ka lima o Iehova ia lakou i mea e hewa'i, e like me ka Iehova i hoohiki mai ai ia lakou, a pilikia loa iho la lakou.
16 Hoala mai no nae o Iehova i na lunakanawai, a hoola ae la lakou i ka Iseraela mailoko ae o ka lima o ka poe i hao i ka lakou.
——:o:——
Na mea nui iloko o keia mokuna. I. Ke kauoha a ke Akua ia Iseraela ma o ka anela, pauku 1—3. II. Ke ano o ka lahui i ka wa e noho aupuni ana na Lunakanawai.
Pauku 8 a hiki i ka 16 ka haawina no keia la. Pauku 8 me 9, make o Iosua a kanu ia me ka hanohano. Ua manao kekahi poe ua kau ia he hoailona o ka la maluna o kona hale kupapau. Pauku 10, make kela hanauna, a ala mai he hanauna hou. Pauku 11—13, haalele lakou i ke Akua a hele auwana. Baala a me Asetarota, he mau inoa no na akua kiekie loa o na lahui hoomanakii o Poinekia a me Kanaana. He akua kane o Baala, a he wahine o Asetarota ma ka lakou olelo. Pauku 14 a me 15, hoike ia ka huhu o Iehova. Pauku 16, hoike pu ia ka lokomaikai piha o ke Akua, ma kona haawi ana mai i poe lunakanawai. O na lunakanawai ka poe nana i hooponopono ka lahui mai ka wa o Mose a hiki i ka wa o Saula. He poe alakai lakou i ke kaua, a he poe hoopakele i ka lahui i na wa pilikia nui. Na ke Akua i hoonoho i kahi poe o lakou ma ka oihana, a na ka lahui i koho kahi poe. Ua noho kahi poe o lakou ma ka oihana a pau ke ola, a ua noho kahi poe no ka manawa wale no. Aole hiki ia lakou ke koho i na hope a hooilina ma ka oihana: aole hiki ke auhau aku i ka lahui. Aole hoailona o ko lakou oihana, aole poe ukali, aole hanohano. He poe lakou i kohoia e kokua a e alakai i ka lahui.
Ka Moolelo o ka Aha Euanelio o Hawaii Komohana.
Ua halawai keia Aha ma Maunalele, Kapalilua, Kona Hema, Hawaii i ka la 17 me 18 o Feberuari. Ua wehe ia na hana me ka haiolelo a Rev. S. W. Papaula, poolelo ma Kekahuna 9:10. Koho ia o S. Makaike i Luna Hoomalu a o S. W. Papaula i Kakauolelo.
Eia na ekalesia i ike ia ma o ko lakou mau kahu me na elele: Kekaha, Rev. G. P. Kaonohimaka, Paina ka elele; Kailua, Rev. J. Waiamau; Helani, Rev. J. Waiamau, Kauwale ka elele; Kona-Waena, S. Makaike (haiolelo,) Mainoino ka elele; Kealakekua, Rev. S. W. Papaula, W. Kaholoaa ka elele; Pukaana, P. Palea (haiolelo,) J. Waiau ka elele; Kapalilua, J. Maele ka elele; Waiohinu, Rev. J. K. Kahuila, Kalaikoa ka elele. A o Rev. J. D. Parisa ka lala mau.
Koho ia o J. Waiamau, G. P. Kaonohimaka a me Waiau i Komite imi hana. Hoike mai ke Komite i na Kumuhana he 17. 1. Hapalua hora haipule i kela la keia la; 2. Na hoike kihapai; 3. Na palapala hoopii; 4. Heluhelu haawina; 5. No ka hooponopono ekalesia; 6. No ka ona me ka noho huikau; 7. Ka hoomalu ana i na anaina hoomana a me ka home o na kahu; 8. Ke kula kahunapule; 9. Ke ola kahu; 10. Ka nupepa LAHUI HAWAII; 11. Na keiki a ka Aha; 12. No ke koho ana a me ka hookohu ana i na luna ekalesia; 13. No ka hookomo ana i na hoahanau; 14. Na elele i ka Ahahui ma Honolulu; 15. Na dala mahina hou, a me ke ola o na kahu a me na elele; 16. Na misiona i ko na aina e; 17. Ka manawa a me kahi e halawai hou ai keia Aha. Apono ia ka hoike a ke Komite.
Hooholo ia, aia a hookuu ia keia Aha, e halawai hou ma Kailua i ka Poakolu elua o Sepatemaba, 1875, i ka hora 10 A. M.
Hapai ia na hoike kihapai. Hoike o J. K. Kahuila, no Waiohinu; hoike o Palea, no Pukaana; hoike o S. W. Papaula, no Kealakekua; hoike o S. Makaike, no Kona Waena; hoike e J. Waiamau, no Helani; hoike o G. P. Kaonohimaka, no Kekaha.
Heluhelu ia he palapala mai ka Aha Lunakahiko mai o na mokupuni o Maui. Koho ia o S. W. Papaula i komite e pane aku i ua Aha la.
Hapai ia na Kumuhana 5, 6. Ua kuka nui ka Aha, a ua koho ia o J. D. Paris i komite nana e hoike.
Hapai ia ke Kumuhana 7. A ua koho ia o J. D. Paris i Komite e hoike mai i ka la apopo. Hoike mai ke komite no ke Kumuhana 5. No ka mea, ua ike lea makou me ke aloha minamina, kaumaha, ehaeha, ua mahuahua loa ka inu ana i na mea e ona ai. Ua lehulehu wale ka poe noho ona a me ka poe noho huikau wale ma ke ano manuahi. He oiaio no, ua puni keia paemoku i ka noho ana o keia ano. Ua hana ia keia mea imua o na maka o ke kanawai me he mea la aole mana kanawai i keia wa, a ua kokua pu oia ma ia mau hana. A ua ike ia no he mea hiki ole ke hoole ia, ua maopopo lea ka ulu ana o keia mau mea ino haumia iwaena o na lala o kekahi mau ekalesia. Ua kaena wale kekahi poe lala ekalesia koikoi, oiai, e noho ana lakou iloko o keia mau kiolepo ino e hoopau ana i ke koko ola o ka lahui a me ka nani o ka ekalesia o Iesu Kristo, a e kinai ana i ka uhane hemolele.
Nolaila, ke paipai aku nei keia Aha i na Kahu na Haiolelo a me na luna o keia mau ekalesia ma Hawaii komohana. E makaala, e kiai, e hooikaika i kela a me keia manawa, e hooponopono i na ekalesia, e kapae aku a e kiola iwaho i na mea hu kahiko la. Mai paupauaho, a mai kanalua hoi, ua hooko ia ka olelo a ke Akua i kakau ia ma I. Timoteo 4: 1—2. Ke olelo paka mai nei ka uhane hemolele a i ka manawa mahope e haalele kekahi poe i ka manaoio, e malama i na uhane hoopunipuni a me na daimonio, hoolohe ole ai lakou i ka olelo kono e wahahee ana me ka hookamani, a e hoa ia ko lakou naau me ka hao wela. He oiaio hoi ke kupaa mau nei ke kumu mai ke Akua mai me keia hoailona ona. Ua ike mai no ka Haku i kona poe ponoi, a o ka mea i hoohiki i ka inoa o Kristo, e haalele loa aku ia i ka hewa.
Nolaila hoi i mea e kokua ai i na Kahu Ekalesia.
1. Hooholo ia.—Ma ka manao o keia Aha, he mea pono i na Kahu me na Aha ekalesia a pau, e kahea koke i na inoa o na lala pakahi o ko lakou mau ekalesia, a ninau ia lakou i akaka ke ano o ka noho ana.
2. E hoailona, a e hookolokolo hoi i ka poe e hele huikau ana, aole mamuli o ka haawina i kauoha ia aku e ka Haku a me na Lunaolelo.
3. A mahope o ke ao aloha ana ia lakou e like me ka ka Haku kauoha, e kapae a e oki loa aku paha ka poe hoolohe ole.
4. I na he kumu hiki kekahi Kahu Ekalesia ke hana aku, alaila, pono ke noi aku i kekahi Kahu Ekalesia e ae o keia Aha, e hele mai a e kokua i keia hoomaemae ekalesia ana.
5. Ma ka manao o keia Aha, o ke Kahu noho wale a hooponopono ole i na hoahanau ano hihia no ka makau paha, ua hemahema no oia, aole no kupono oia ke malama i ka ekalesia o ke Akua.
6. E hookaawale i ka Poalima mua o Maraki i la haipule me ka hookeai, me ka hoohaa imua o ke Akua i mea e hiki ai ke hana aku e like me ke alakai o ka Uhane Hemolele. J. D. Paris Komite.
Aponoia ka hoike.
Hapai ia ka noonoo no ke kula kaikamahine. A ua kauoha ia na Kahu me na Haiolelo e paipai koke i na koena dala no ua kula la.
Hapai ia ke Kumuhana 8. Ua kuka no me ka manao ikaika.
LA HANA ELUA.
Na J. Waiamau i hoike no Kailua. Na J. W. Maele i hoike no Kapalilua.
Hooholo ia.—I ka manao o keia Aha, he mea pono i na ekalesia malalo iho ona ke hooikaika nui ma na mea a pau e holo ai ke kula kaikamahine ma Kohala. Nolaila, ke paipai ikaika ia aku nei na ekalesia malalo o keia Aha, e hoopau koke i ko lakou koena a me na haawina hoomau, a e hoouna aku hoi i na kaikamahine kupono no ke kula.
Hapai ia na heluhelu haawina a pau.
Noi ia e pai ia keia Kumumanao a J. D. Paris ma ka nupepa KA LAHUI HAWAII a me Kuokoa, ua apono ia.
Koho ia o Waiamau, Paris a me Waiau i komite imi haawina.
Hapai ia ke Kumuhana 12, a ua kuka ikaika ka Aha, a hooholo ia e makaala na kahu a pau malalo o keia Aha, e hana lakou ma keia hope aku. Ua apono ia.
Hapai ia ke Kumuhana 13, a ua kuka nui ka Aha no keia mea, a makaala na Aha Ekalesia o keia Aha i ko lakou wa e hookomo ai i na hoahanau iloko o na ekalesia me ka hoolohe pono i na olelo ao a keia Aha.
Hapai ia ke Kumuhana 14, ua koho ia o Hoomainoino a me Waiau.
Hapai ia ke Kumuhana 15. A ua hooholo ia e like me kela makahiki.
Hapai ia ke Kumuhana 16, a kuka ia.
Koho ia o J. Waiamau i komite nana e hoike i na hana o keia Aha imua o ka Aha ma Honolulu.
Hoike mai o Kalaikoa, no ka mai o J. Kahuila. Koho ia o J. Waiamau i komite e hoike mai imua o keia Aha.
Eia ka hoike: "Me ka naau kaumaha a me ka walohia kuhohonu, i ka ike ana aku ua loohia kekahi lala o keia Aha i na hoailona weliweli o ka mai lepera a he mea hoi ia e poino ai oia, kona ohana, kona hoa a me ka lehulehu a pau, ke noho o ia me ka noonoo ole, a me ke aloha ole. E like me ia i ike ia aku nei. Nolaila, ua hooholo ia.
1. Ke uwe aku nei keia Aha me ka minamina nui ia Rev. J. K. Kahuila no kona loohia ana i kela mau hoailona o ka mai hiki ole ke hoolaia. A ke uwe aku nei me ke aloha nui ka ekalesia o Kristo ma Waiohinu, no keia pilikia i kau mai maluna o ko lakou kahu maikai ikaika a makaala no ka hana a ka Haku.
2. He mea pono ia Rev. J. K. Kahuila e waiho i kana hana ma ke kihapai o Waiohinu a e hookaawale loa iaia mai waena ae o na kanaka, no ka pono o me ka pomaikai o ka lehulehu a hiki i wa e halawai hou ai ka Aha." Ua apono ia.
Koho ia o G. W. Papaula i komite e malama i ka ekalesia o Kapalilua a me Waiohinu, ma na ahaaina a ka Haku.
Hooholo ia ke Kakauolelo e haawi aku ia J. Waiau i palapala haiolelo, a nana e malama aku i ka ekalesia o Kapalilua, a hiki i ka halawai hou ana o keia Aha.
Hooholo ia.—Ke haawi aku nei keia Aha i ko lakou mahalo i ka ekalesia o Kapalilua no ko lakou kokua ana mai i na mea e pono ai ke kino.
Noi ia mai e hoopanee loa ia ka Aha me ka pule a Rev. J. Paris.
G . W. PAPAULA,
Kakauolelo.
WIL DER & CO.,
(WAILA MA.)
AIA MA KE KIHI O
ALANUI PAPU ME MOIWAHINE!
Ua hoolako mau ia me ke kuai ana aku i na
Papa me na Lako Kukulu Hale
O NA ANO A PAU.
NA PANI PUKA!
PUKAANIANI,
OLEPELEPE,
LAKA,
AMI-LIILII,
AMI-LOLOA.
PENA o na ano a pau,
AILA PENA,
VANIKI, &c.
Na Balaki Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna ae e kuai makepono loa ia aku no ke DALA KUIKE. 7-1y
Laau Ola, Laau Ola.
AIA MA KAHI O
DILLINGHAM & CO.
KA LAAU KAULANA A
BISHOP SOULE!
HE LAAU HAMO MAIKAI KEIA!
a ua kaulana iwaena o ka poe nana i hoao; he mea e ola'i
Ka Hui, Lumakeke, Kikala-hanee, Mau-i, O
a me na mai o ia mau ano.
UA HOAO IA KEIA LAAU A UA MAHALO nui ia. "He umikumamalua makahiki o ka oopa ana o kekahi mea, a i keia laau ua ola koke." Wahi hoi a kekahi, "He laau waiwai loa keia no ka hikiwawe o kona hoola ana." Wahi hoi a kekahi, "Ua pau ko'u hoomaloka, ua hoao au i na laau e ae a pau, aole i ola ku LUMAKEKE, he nui na makahiki o kuu kaa ana i ka eha, a i nei laau ua ola au, ola loa." Eia hou ka kekahi, "He nui na makahiki o ka waiho ana o kuu wahine ma kahi moe me ka mai, ua lapaau ia aole ola, a i ko maua lohe ana i keia laau kaulana, ua hoao ia, a ua ola koke ia iloko o na pule eono." E hoao ka poe mai i keia laau kaulana. Aia ma ka Halekuai o DILLINGHAM & Co., oia hoi ka hale o Kaimana.
Laau Kaulana
A KAUKA SUCH!
He laau e ola'i ke KUNU, ka eha o ka PUU, me ka HANO me na eha a pau e pili ana i ke AKEMAMA. Aia ma kahi o Dillingham & Co., ma ka Halekuai o Kaimana.
7-1 y
G. WEST!
HALE HANA KAA HOLO LEALEA ME na kaa hali ukana. E hana hou ia no hoi na kaa nahaha no ka uku oluolu. E kapiliia na kapuai lio, no ka uku kupono. Ma ka hale hana mua o Mr. Benfield, ma ke Alanui Alii. 7-1y