Ka Lahui Hawaii, Volume I, Number 19, 6 May 1875 — Page 1
KA LAHUI HAWAII.
"Ua mau ke Ea o ka Aina i ka Pono."
HOL Y BIBLE
BUKE I.} HONOLULU, POAHA, MEI 6, 1875. {HELU 19.
KA NUPEPA KA LAHUI HAWAII.
He pepa i hoopukaia i kela me keia he bedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
HOOKAHI DALA ka uku no ka pepa no ka makahiki hookahi. Hapa makahiki, Hapalua.
E hoouna mai i na le ta no KA LAHUI HAWAII ia H. H. Paleka, Honolulu, Oahu.
[No KA LAHUI HAWAII.]
Jesus My Savior All in All.
Royal Diadem, p. 27.
1. Ie su kuu waiwai no a pau,
Nona mai no ka nani mau;
Nona ke aloha i ke ao,
Nona na pono kamahao.
C ho.—Kulou no au imua ou,
Ie su kuu waiwai no a pau,
Ie su ke Lii ka Haku mau,
Ie su kuu waiwai no a pau.
2. Ie su kuu waiwai no a pau,
Holo no au iloko ou;
Nau e kai ae i kuu luuluu,
Nau e hoomaha kuu naau.
Cho.—Kulou no au &c.
3. Iesu kuu waiwai no a pau,
Nau e hoopau na hewa o'u,
A hooauhee i kuu makau,
Me na kaumaha o'u a pau.
Cho.—Kulou no au & c.
4. Iesu kuu waiwai no a pau,
A ma ona la ola au,
Ola a oli kuu manao,
Ola a lanakila mau.
Cho.—Kulou no au & c.
5. Ie su kuu waiwai no a pau,
Oe kuu kahu oia mau,
Kahu maikai o na pokii,
Nou no makou a mau loa'e.
Cho.—Kulou uo au &c.
HAWAII.
HE MOOLELO KAAO
NO KE
KEIKI ALII IULESIA
NO KA LAHUI KAULANA O NA AU I HALA
MA HELEN—ME KANA MAU KAAPUNI ANA I NA AINA MA KA HIKINA.
MOKUNA VIII—HELU 21.
ME KEIA mau hana hoalohaloha a Iulesia, aole no i komo aku ka manao hooia iloko o kana keiki no kona makua, a pane mai la, "Ua hiki ole ia'u ke lawe mai i kau mau huaolelo ano a hooiaio iho, oiai, ua ike no au, aole i haawi ia mai ka mana i kekahi kanaka o ko ke ao nei e hiki ai ke hoano e i kona mau helehelena e like me ka mea a'u i ike iho nei nou, oiai, ano iho nei he aoo oe, a ua hoike mai kou kino holookoa i ke kahiko ilihune, a i keia manawa koke no, he kii kou e like me ka na kupua i haawi mai nei. Nolaila, e like me ka nui o ko'u aloha i ko'u makua, pela no au e hahai ai i kana mau hana, oia hoi, e hooia au ia'u iho no kou ano, a me na mea kupanaha i hoike ia mai ia'u."
"E makaikai oe ia'u, e ka lei aloha o kuu puuwai," wahi a Iulesia, "a mai wiwo, no ka mea, e hoomaopopo mai oe, owau holookoa no keia o kou makua, ka mea hoi a na welina aloha oloko e hoolauwili nei nou a me kou makuahine, a i hoopunini ia hoi e na popilikia he nui no ka aina a kuu makuahine i eha'i no'u. E kuu keiki, ke hoike aku nei ke aloha i ka oiaio o ka'u mau mea e hai aku nei ia oe, a ke hanaino nei i ko'u puuwai, e like me ka mea mau i ka makua no kana lei he keiki. Aole Iu lesia hou aku e hoea mai ana i kou home nei, owau no o Iulesia, ka mea mahope iho o na makahiki loihi he iwakalua i loohia mau ia e ka ehaeha a me na popilikia he nui, ua ae hou ia mai e hehi i ka honua a e honi hou aku hoi i na ea onaona o ka home ponoi. O ke kino aoo au i ike iho nei ma ko'u kulana, mamuli no ia o ka mana o ke kupua Mineva. He hiki iaia ke hana e like me kona makemake i kela a me keia, mamuli o ka mana i loaa mai iaia mai na lani mai. Na na kupua e hookiekie i ke kanaka, a na lakou no hoi e hoohaaha hou."
I ka lohe ana o Telemakusa i keia mau huaolelo a kona makuakane, ua hiki ole iaia ke paa mai i ka wela ikiiki o kona aloha, a haule iho la ia maluna o kona mau kuli, haliu ae la kona mau maka mohaha uliuli i na ao o ka lewa, a puana ae la me na waimaka o ka hauoli e hanini ana mao a maanei o kona mau papalina. "E ka makua, ke kiai a me ka puuhonua o ko ke ao nei, he oiaio ua hoopomaikaiia mai au, aka, mamua o ko'u hauoli ana no ia pomaikai, ke hoohaahaa aku nei kau kauwa imua ou, ka mea iaia ko ke ao nei holookoa. E ke kahuhipa, ka lamaku oiaio, e ola na lahuikanaka, a e hoomaikaiia ka inoa kamahao." Ku ae la ia a honi aku la i kona makua, a hoopulu aku la i kona mau papalina me na waimaka aloha hauoli. Kukuli iho la laua, a pule hoomaikai ae la o Iulesia i na lani no kona hoopomaikaiia ana.
I ka pau ana o ko laua hui aloha ana, ninau aku la o Iulesia i kana keiki, i ka pane ana aku, "E Telemakusa, kuu keiki aloha, e hai mai oe ia'u, owai la keia poe e hoohaunaele nei i ka maluhia o ka pa alii, ehia ko lakou heluna, a pehea hoi ka manao o kou makuahine moiwahine?"
"Ke hoomanawanui nei oia ia lakou, me ka manaolana no kou huli hoi aku," wahi a ke keiki alii, "ua ae oia e mare me kekahi o lakou, a ke kali nei lakou no ka hiki mai o ia manawa, aole nae oia i hooholo iki he mau makahiki loihi, a ke noho nei no lakou me ke kali mau. Ua ae aku ka moiwahine i keia me ka paa o kona manao—o ka make ka lua o kana kane, a i kumu no hoi no lakou e enemi ole ai a pepehi mai ia maua, me ka luku aku i kou mau makaainana. Mai ka la apo no kekahi mau makahiki i hala, aole oia i ike iki he wahi manawa hauoli, aka, he kanikau me ka hoomanao mau nou, a iloko nae o na hauoli hoohenehene a keia poe, e uhauha mau ana me ke kaena i kou make.
Pii ae la ka ula ma na papalina o Iulesia, nahu iho la i kona lehelehe, a kuku mai la na lihilihi o kona mau maka, a me kona lima maluna o kana pahikaua, a pane mai la, "E houluulu mai i ko lakou mau heluna, a me ko lakou mau pono kaua, i maopopo ai ka mea e hana aku ai, no ka mea, ke koni nei na aakoko ou mau kupuna i hala, a puni kuu kino, a ke hoomaka nei ka wela hahana o kuu maka kila, e hoea ana kaua ilaila, ina no aohe kokookolu, a o Iulesia me kana keiki hiwahiwa ko lakou mau hoa paio."
"E kuu makuakane aloha," wahi a kaha keiki, "ua lohe laulaha wau a puni ka aina no kau mau hana akamai a noeau ma na hoouka kaua, a he moolelo i paanaau a i makia ia iloko o na makaainana no ke kupaa o kou puuwai a me ka ikaika o kou mau lima maluna o na enemi, aka, mamuli o ko'u hoomaopopo ana i ke ano o na mea au i kamailio mai nei, he pii e mai nei ka lia okakala a puni kuu kino holookoa, a ke hoomaka mai nei ke anu maeele iloko o'u no ka hopohopo, oiai, he mea hiki ole paha malalo iho o ka la, i kekahi mau kanaka elua ke kaua aku me kekahi puali i oi aku ka heluna, a me ka lako i na mea kaua. Mai ka aina mai o Dulisuma he kanalima a oi, me ko lakou mau ohua; he palua umikumamalua me ko lakou mau kauwa no Samosa; no Zasiutus he palua umi me na kauwa; a he umikumamalua o na 'lii o Itaka nei, e ake nui ana e lilo ka moiwahine Penelope malalo o ko lakou mana, a no lakou ka hae kalaunu o ka aina; a o keia poe a pau ua akoakoa nae malalo o ka malu o ka hale alii—he oiaio, e kuu makua, he huina lehulehu a ikaika keia mamua o kaua! E pono paha ia kaua ke kali a hoomaopopo, i loaa ai o na mau kokua, mamua o kou inu ana i ke kiaha o ka inaina, a hooko aku i na koni ana a kou puuwai."
"E manao ana anei oe," wahi a kona makuakane, "e ke keiki alii o kuu puhaka aku, he mea hiki ole ke hookahuli ia ko lakou ikaika mamuli o ka mana kupua o Mineva a me ko ka Moi o ke ao lewa, a lilo lakou i mea ole? A na ko'u inaina, ka wela o ko'u mau aakoko e paila nei, a me keia kino manaolana e hooko aku i ua mau mana nei, ua makemake no anei oe i mau kokua hou aku no kaua? Owau kou makua, a ua maopopo no ia'u, aia na ano a pau o kou makua maluna o kou kino, a mamuli o ka oni o ka io o ko'u kino, ke lana nei ko'u manao e hehi lanakila hou ana no o Iulesia maluna o na papahele o ka hale alii o kona aupuni, a nolaila, imua e kuu alii opio, imua me ke kupaa wiwo ole a welo hou ka hae kamahao o ko kaua mau kupuna maluna o ka aina, a lanakila hou na makaainana, a hoi hou mai ke kulana o na au i hala e. No ke ea o ka aina, ke ola o na makaainana, a no ka lanakila hoi o kou makuahine, ke noi aku nei au e kupaa, a o oe ko'u kokoolua, oiai ua eha oe no na hanaino ia o kou makuahine, a ua wela hoi au no ko'u koolua o keia ao."
"Oia mau mana au i hai mai nei," wahi a ke keiki alii, "he oiaio, he mau kokua ikaika, a mamuli o kau mau moolelo hoolana manao, ke hoohiki ae nei au, e uhai no au i na meheu o kou mau wawae, a e hooko pono i kau mau kauoha, a o ka make wale no ka mea nana e kaupale."
"E hoolohe mai oe, a e malama pono a mai hoopalaka i keia mau kuhikuhi ana a'u," wahi a Iulesia. "E hoi oe a i ka hale alii, a e noho no oe e like me ke ano mau. Mai hoike aku oe i kou ano pihoihoi, a mai hai iki oe i keia hui ana o kaua i kekahi mea hookahi, aole i ko'u mau hoa'loha ponoi, a aole loa no hoi i kou makuahine. E noho oe me ka hoomakaukau ia oe iho, i kau pahikaua a me na pono e ae. A ina wau e hoea aku, e ike mai oe ia'u ma ke ano elemakule ilihune au i ike mua iho nei, a mai noho oe a hoike iki i kou ano aloha no'u. E hana ino ia'na wau, e kulakulai ia'na wau, e hoohenehene ia mai ana, a e hana mai ana lakou i na ino a pau ia'u, mai noho nae oe a hoike iki i kou ano lili a huhu paha no ka lakou mau hana, aka, e hana no oe e like me ka mea mau, e hauoli pu no oe, e komo pu no oe ma ka lakou mau kamailio, a hiki i ka wa a ke kupua Mineva e hoike mai ai i kona mana, alaila, e haawi aku no au i ka hoailona, a o ko lakou wa ia e pau ai malalo o ka mana o ka Moi nona ke aupuni. A mamua o kou haalele ana mai ia'u, ke kau leo hou aku nei no au ia oe, e kupaa, e lawe ae i ke kulana o ke koa Helene, a ke puana ae nei au, i keia la ke hauoli 'la lakou me na waiula o ka waina, a hiki mai ia la, e auau ana lakou iloko o ka wai ula o ke koko, mamuli o ka hooko ia ana o ka inaina o kou makuakane. He mea na'u i hoino a kue loa ke kaua, aka ke ike nei au ua oi ka ikaika o ko'u manao paa i hookahuaia maluna o ka wela inaina mamuli o na hana a keia poe, ma ka lawe pakaha wale ana i ka maluhia o kuu aupuni i makana ia mai e ko'u mau kupuna, a a'u hoi i waiho laulaha iho ai i o'u mau makaainana. Ke moni nei au i na owili pauda o ka wela maalili ole, a me he la, ua lilo ko'u puuwai i poka pah-u, a ua makaukau e lele aku a haule iwaena o lakou, a hoomokaki ae a kau liilii ma o a maanei me ke koe ahailono ole, aka, aole no i nalo loa ko'u mau noonoo kanaka, e hoi oe, a mahope aku nei au, e kali kaua no ia la, oiai hoi, na ke au o ka manawa e hai mai na mea i ike ole ia."
Haawi mai la kana keiki i ke aloha no kona makuakane, a huli hoi aku la no ka hale alii, a o Iulesia hoi, ua hoi hou ae la kona ano e like me mamua, he kanaka elemakule ilihune me ka aahu pelapela weluwelu, a lilo hou iho la ka Moi wiwo ole o Helene he maklio. (Aole i pau.)
He mea Karistiano io anei ia?
Ka i noa hoi paha he mea Iu daio wale no—oia ke makana aku i ke aupuni o ka Haku i ka manawalea mau "me ka oluolu! Eia nae ka na *** iloko o ka Lahui Hawaii, helu 17.
1. "E haawi me ka minamina ole.
2. Me he mea la, aole i auhauia.
3. Me ka oluolu."
Oia iho la kana mau rula e manawalea aku ai ka poe Karistiano.
Kupono nae ia i ka poe Iudaio wale no i ko'u manao, ea! He kanawai ko lakou nana ia mea i auhau maluna o lakou. mamuli o ka Iehova kauoha. Nolaila, pono io no ko lakou hooko ana me ka oluolu.
Kuhihewa nae paha au, ua noho ke Karistiano ma ka paapu kiekie ae. Aole ia malalo iho o ke kanawai i kona haawi ana i kana no ke aupuni o Iesu—malalo iho no ia o ka mea mana'e—oia hoi ke aloha lani. O ka mea no ia nana i koi ka naau o Paulo ma ka iala hana mau a pakela loa aku no hoi, no kona Haku. A iloko o ia mau hana a pau, a me na pohihihi a pau, nolaila ae, i kau maluna ona, penei kana: "ke hauoli nei au iloko o keia mea."
A ma 2 Kor. 9:7, ke i ia mai nei penei, "ke aloha mai nei ke Akua i ka mea haawi olioli aku." O kela hua oluolu ma ka Hawaii, he hua palupalu no ia. Aole i piha pono ka olelo Helene ia mea.
A oia ka'u i hoohalahala ai—me he poe Iudaio la i auhau maoli ia mamuli o ke kanawai, kakou ka poe Karistiano, i hoohalike ia mai ai,oiai ia lakou, aole i kahe kela koko makamae, aole hoi i koi ikaika mai ka mana o ia aloha lua ole o Iesu! E na Karistiano! Ua hoomaopopo anei oukou i ke ano o ia mau hua, "Aole o oukou no oukou iho. Ua kuai ia oukou me ke kumukuai. No Kristo oukou," pau loa—kino, uhane, waiwai a me na lako a pau, mai ka wa hanau a i ka wa e make ai. A o kakou hoi ka poe i hoola panaiia, a pela i hoopakele ia'i i ke ahi o ka make mau, ua poina anei ia kakou ka lokomaikai o ka mea nana ia i hana—me ke aloha palena ole a me ka aie, nolaila mai, i kau a paa maluna o kakou?
"Me ka oluolu" wale no ka, kakou e haawi nei i na makana aloha i na makamaka kino e noho nei? Ka i noa paha me ka olioli! a ua pono io no ia.
A, i ka Haku hoi, "me ka oluolu" wale no kakou e waiho ai ma kona mau kapuai, i ka hua o ko kakou aloha? Ano e ka maalili o ia hua! Me ka olioli kakou e haawi aku ai nana a ua pono io no la ea!
HOOHALAHALA.