Ka Lahui Hawaii, Volume I, Number 20, 13 May 1875 — Page 2
KA NUPEPA KA LAHUI HAWAII
HONOLULU, MEI 13, 1875.
MA ke kakahiaka o ka la Sabati i hala, ua huli hoi mai la ka Moi mai ka huakai i ka moku o Keawe. I ka haalele ana iho o ka huakai alii ia Honolulu nei iloko o kela mau pule aku nei, ua lohe wale ia e liuliu iki ana ka nalo ana aku, aka, ma ke kakahiaka o ka la i hai ia ae la, ua hoike mai la ka hae kalaunu ma ke kia hope o Kilauea no ka huli hoi ana mai o na Moi. E like me ka mea mau, ua lehulehu ae na makaainana ma Ainahou, a ua haawi ia mai na pu aloha o na manuwa i panai ia e ko Puowaina, ma ka lele ana mai o ka Moi i uka nei.
ILOKO o ka pule okoa i kunewa aku la, ua ala mai kekaki kumu nune nui mawaena o kekahi poe, a oiai makou e hoomanao ana ia kumu hookahi, aole no makou e hoohala ana i ka manawa no ka waiho ana'ku imua o ko makou mau makamaka heluhelu.
I kekahi la i hala iho nei, ua noi aku kekahi haole nona ka inoa o Ford i ka oluolu o ke Kuhina Kalaiaina e haawi mai iaia i laikini e ae ana e kuai oia i ka rama ma ke ano kukaa, ma Wailuku, Maui. Ua lawe ia mai la ka lono a puni ke kulanakauhale, a hoea loa mai la io makou nei, i panai ia me ka lono alua, "ua oluolu ka i ka noonoo ana o ka Mea Hanohano ke Kuhina Kalaiaina ka ae ana aku i keia noi."
Ua ano hikilele makou i keia lono alua, me ka hiki ole no nae ke hooia iho, oiai, ua ike no makou ua lawa pono na hoike oiaio no na ino e ala mau nei ma ia mokupuni me ka hoolako ole ia'ku o ka waiona malalo o ka laikini, a ua kau nui no hoi makou maluna o ka noonoo akahele ana o ka mea iaia ka mana, a nolaila, ua hoomanawanui makou me ke kali ana no ka lono oiaio, i hiki ai ke waiho pololei aku imua o ka lehulehu, a e hoopau ai hoi i na manao nune mawaena o kahi poe.
I keia la ua makaukau makou e hai aku imua o kela a me keia i ka lono oiaio, me ke kaena ae no ka hooko ia'na o ka manaolana e nalu ana iloko o ka puuwai o ke kanaka aloha lahui a aina. Ma kahi o ka lono e olelo ana, "ua ae aku ke Kuhina Kalaiaina i ke noi e haawi ia na makaainana o Maui me ka laau awahia o ka make," ke waiho aku nei makou i ka lono oiaio, "aole loa, a ua kue paa hoi ke Kuhina Kalaiaina i ka haawi ana'ku i laikini kuai rama no Wailuku."
Ma keia mea, ke hoomaikai aku nei makou ia Maui, no kona pakele mai na apo wela a ka moonihoawa, me ke kaena ae hoi no keia hana maikai a ke aupuni. Aka, oiai makou e kaena ana, e hoomanao pu ana no nae, he wahi kokua mailuilu loa keia a ke aupuni no ke ola o kona lahui imua o ka palahalaha a laula a ka poino e waiho mai nei no kekahi mau makahiki okoa. He oiaio, he hoike maikai loa keia no ke kulana o ke aupuni imua o kona mau makaainana, no ka mea, ma kona hoole ana e kokua aku i ka poino, e hahai ana no ko lakou manao malaila.
Hookahi nae hoike oi loa'ku o ka pomaikai, ke hooko pono ia. Oia hoi ka hoopau ana o ka poe i noho ma na kulana o ke aupuni i ka inu ana i na waiona, me ka hoike okoa ana imua o na makaainana. He mea makehewa loa i ke aupuni ke hoao e hoomaemae ia waho me ka waiho popopulu ana ia loko; aole loa e pau ana ka hoomahui o na makaainana i ka inu ana i na waiona ina pela e hana'i. E hoomaka mai ke kumu, a e pau auanei na lala.
Hoike o ke Kulanui ma Lahainaluna.
Ua hoike ia keia kula ma ka la 4—6 o Mei. Ua hoonaniia na keena moe o na keiki, ke keena hoike a me ka hale e ai ai i na launahele lipolipo o ka uka. Ua hiki mai ke Kiaaina J. M. Kapena, ke Kahukula Nui H. R. Hitchcock, ka Makua Rev. W. P. Alekanedero, ke "Kakauolelo o ka Papa Hawaii," kekahi mau kahu ekalesia o ka mokupuni o Maui a me ka poe makaikai e ae. He anaina nui ka i naue mai e ike ma ka la mua; aka, ma ka lua a me ke kolu o na la, he poe uuku ka i hiki mai. A penei ka hoonohonoho ana o na hana:
Papa. Buke. Kumu.
4 Arimatika - - - J. B. Hanaike.
3 Moolelo Beritania - - S. E. Bihopa.
Himeni—"We' ve a Home over there."
4 Hoikehonua Baib & Moolelo - Hanaike
1 Ana-aina & Hooholomoku, - Bihopa.
3 Anatomia - - - - Bihopa.
4 Olelo Beritania - - - Baluina.
Puhi Ohe.
PAINA MA KEKAHI KEENA NUI.
1 & 2 Kalaiaina - - - - Baluina.
4 Moolelo Hui - - - Hanaike.
1 & 2 Moolelo Ekalesia - - - Bihopa.
Himeni—" Call John."
Ma ka Poakolu, Mei 5.
3 Hoailonahelu - - - Hanaike
3 Malama Buke Waiwai - - Baluina.
Himeni—" Singing Always."
2 Moleanahonua - - - Bihopa.
4 Hoikehonua - - - - Baluina.
1 & 2 Akeakamai - - - - Bihopa.
Puhi ohe.
HOOMAHA A PAINA.
3 Kumukanawai - - - Bihopa.
1 & 2 Olelo Beritania - - - Baluina.
4 Moolelo Hawaii - - - Hanaike.
Himeni—"Alma Mater."
Poaha, Mei 6—Haiolelo na ka Papa 1, e puka ana, ma Wainee. Hoomaka i ka hora 9½ A. M.
Puhi ohe—"Mele Lahui."
Pule ia e ka Rev. J. F. Pogue.
Himeni—" Sweet by and by."
Haiolelo—Ka nani pau ole. David P. Laahiwa, Waimanu, Hawaiii.
Haiolelo—I paa ke kaula gula o ka mare. John K. Kini, no Ewa, Oahu.
Haiolelo—Ma ke alelo ke ola a me ka make. Joseph Nauele, no Wailupe, Oahu.
Himeni haku na ka Papa Eha.—"Aloha na hiki mua."
Haiolelo—E kaohi ke kanaka iaia iho. Mose Pake, Waihee, Maui.
Haiolelo—E ki a paa. D. W. Opunui Lukai, no Ewa, Oahu.
Haiolelo—Hoi hou ka paakai i Waimea. John Kaanaana, Ewa, Oahu.
Himeni—"E vening Bells."
Haiolelo—Na ki e loaa'i ka waiwai. Z. S. Kalua Paaluhi, no Kalihi, Oahu.
Haiolelo—Hoohanohano ka pono i ka Lahui. Z. P. Kalokuokamaile, Kealakekua, Kona Hema, Hawaii.
Haiolelo—Ka halepaaho o ke Diabolo, heaha la ia? Wm. K. Makakoa, no Waiehu, Maui.
Himeni haku na ka Papa Ekolu—"Aloha i ka home."
Haiolelo—O ka oihana mahiai kekahi koo nui o ka Hooulu Lahui ana. Samuela M. Kekoanui, no Hana, Maui.
Haiolelo—Na mea e mau ai ka waiwai o ke aupuni. John Uwalo Makahio, Kaupo, Maui Hikina.
Himeni—" Fairy moon light."
Haiolelo—He leo aloha e hea mai nei. Samesona M. Kaiwa, Kohala A., Hawaii.
Haiolelo—Na poino o ke kiaha. Wm. Maikaaloa Kekoa, no Kahana, Oahu.
Himeni na ka Papa Alua—"Aloha ino oukou."
Haiolelo—I hookahi manao e na opio i hoonaauaoia. Henry M. Kahanaumaikai, Honolulu.
Haawiia na palapala hookuu.
Himeni haku a ka Papa 1—"Kuluwaimaka."
Na olelo paipai—o ke Kahukula Nui a me Rev. A. Pali—e hoolana ana i ka manao o ka poe e puka ana, e hana pono; a me ka poe i koe iho, e hoomanawanui hou.
PUle hookuu—na Rev. W. P. Alekanedero.
A pau keia mau mea, ua hoi mai la ke anaina ma kahi o ke Kiaaina J. M. Kapena, no kekahi paina ana i hoomakaukau ai no na keiki kula. Ua ai a lawa i kona lokomaikai piha, ua inu hoi a kena i kona oluolu. He mau olelo paipai kekahi ana, mai loko ae o kana mau olelo hoalohaloha no kona mau pokii ma ke ano hoonaauaoia, ua hiki ole i ka maka ke aua iho i na waimaka; a mai kana mau olelo no hoi e kuhikuhi ana i na keiki i kahi e hiki ai ma ke kulana, ua hiki no i ka hupo ke hooia koke. O ke ano nui o kona manao, aia kona maka maluna o lakou (na haumana), a o ka mea hana pono, oia kana e nana pono ai. He wahi luana iki mahope iho o ka pau ana o ka paina, a hookuu ia me ka maikai.
JAMES H. MAKAIKAI.
Huakai ma Kaleponi.
HELU 11.
O kekahi o na mea au, a ke kanaka Hawaii e kahaha ai me ka mahalo nui ia oe e kau aku ai i ke one o Kaleponi, oia na kaa halihali ohua ma na alanui o ke kulanakauhale. No ka nui o ke kulanakauhale, a no ka nui loa o kanaka e hele ana ma na alanui, mamuli o ka lakou mau hana, ua ike ia he mea makepono ke hana ia i mau kaa halihali i ka poe hele; aka, o ka hapanui o na kanaka e hele wawae ana no. He okoa na kaa lealea, a me na kaa halihali ukana. Ua kapa ia keia mau kaa hali ohua, he poe "Kaa Alanui." He poe hui na ona o ia mau kaa; A ne huina kaa okoa ko kela a me keia alanui; a ua kapa ia ka inoa o na kaa mamuli o ka inoa o ke alanui kahi e holo ai, penei e maopopo ai: o na kaa a pau e holo ana ma ke alanui Kaleponi, ua kapa ia "na kaa o ke alanui Kaleponi." Ua kau ia ka inoa maluna o ke kaa. Nolaila, ina i kau holoholo ana a hiki aku oe i kekahi alanui au i ike ole ai i ka inoa, e nana aku i na kaa e holo ana, ina kau mai ka inoa "na kaa o ke alanui Kaleponi," e ike no oe oia ka inoa o ia alanui, a pela aku. He mau kaa nui keia, a ua paku ia na aoao a paa, he aniani ma na aoao, a e ike wale ana oe i na mea mawaho; ua hana ia o loko a maikai, ua paa na noho i na pela, a e lawa pono ana ke kanakolu kanaka iloko o ke kaa hookahi. He haahaa loa na huila o na poe kaa nei, e hele ana no oe a kau koke no iluna me he anuu hookahi la o ke alapii. Mahope e kau aku ai, ma kahi i hana ia me he lanai la, alaila komo aku iloko o ka puka a noho iho no oe ma kahi kaawale au i makemake ai. Elua lio nana e kauo, aole holo nui he holo malie loa. Ina ke holo mai nei ke kaa ma ke alanui a he makemake kou e kau aku iluna, eia wale no kau e hana ai, e kau aku i ka lima, o ka hoailona ia, a ike ka mea e hookele ana i ke kaa, o kona paa koke mai no ia i na lio a kau aku oe—o kahi poe, aole haawi i ka hoailona, he holo wale aku no a kau, pela no me ka lele ana ilalo. He elima keneta wale no ka uku maluna o keia poe kaa. Iloko nae o ia uku haahaa loa, he nui ka loaa o ka poe nona ia mau hana.
O kekahi mea kamahao a'u i ike ai, o na nupepa a me na hale pai. He nui loa na nupepa o kela ano keia ano, na pepa puka la a me na pepa puka hebedoma a ma ka mahina kekahi. (Aole i pau.)
Na Leta a na Makamaka.
—Eia me makou ka J. K. Kealohaaea, i kakau ia ma Kaakopua, Honolulu. E mahalo mai ana i ka nani hanohano o ka hale aupuni Aliiolani. He oiaio kau e ka makamaka, ua ike ia e ka lehulehu.
—Ua loaa mai ka F. W. Kauaikaawaloa, e kue ana i ka hoololiloli ia o kana mau huaolelo ma kona manao i pai ia ma ke Kuokoa nona ke poo "Loaa aku e moe ana." He mea mahalo ole ia no ia e ka makamaka, a ua pono no kou kue ana.
—O ka K. H. Kahoomana, o Puuhonua, Hilo, eia me makou. E hai mai ana i na lono no ka huliamahi o na makaainana o Hilo i ka hookipa hoohanohano ana aku i ke 'Lii ka Moi, a me ka nui o na mea i hoomakaukau ia. E hai pu mai ana no hoi no ka haiolelo ana o ka Moi malaila no na mea e pili ana i ka huakai ma Amerika.
—Ua hoea mai ka "Kauahaao," nona na poo, "He kulumu Paha ea?" a me "Ka ino o ka Noho Huikau." Ua hala ke au no keia helu, e i aku no nae ua puka ana, aohe e pau.
—Eia ka S. P. K. Nawaa, o Honolulu, nona ke poo, "He mea Nui ka Inoa Maikai i na Aupuni Naauao." No ka piha loa, ke hookaulua ia nei, a he manawa okoa aku.
—Eia ka S. M. Kaiwa, o Kohala Ak., nona ke poo, "He leo Aloha e Hea mai nei," a ua heluhelu no makou. He oiaio no kau e ka makamaka, a ke minamina nei no makou i ka piha e o kahi elele a kakou.
—Eia ka Kualenalena a me Hopoole me makou, nona na poo "Ua Lalau ka Aama pii pali no ka Nele i ka mea ole e Waha kani ai!" a me "E ao o Wi ka niho o ka iole," e pili ana no na hoinoino a ke Kuokoa i ke kahu Ekalesia o Kawaiahao. Pela io no e na makamaka, aka, "ma kahi o ke ino e hoonou ia mai la, he maikai ke haawi aku, a e haawi aku i ke aloha ma kahi o ka huhu."
—Eia kau e "Kawaiahao," nona ke poo "E ao o puali ka haunui i ka hauiki," ua heluhelu makou i na hoakaka ana a ke mahalo nei makou. Ina he mea hiki e hoakaka ia aku no ma keia helu aku.
—Ua loaa mai he mau haina no na Nane i hoopuka ia ma ka la 22 o Aperila i hala iho nei. Ua pololei kau e "Kaohulehua o Panaewa" o Hilo, "S. K. Kuluwailehua," o Kakaako, Oahu, a me ka "J. T. Unea" o Koloa, Kauai. Ua pai mua ia no keia mau haina, a nolaila ua manao makou e hookaulua i ka oukou e na hoa, oiai ua ike mua ia no hoi e na makamaka.
—Eia me makou he lehulehu na leta a na makamaka e pili ana i ke kii makana a ke Kuokoa. O ko kakou manao pu no ia, aka, i wahi e kapa ole ia mai ai oukou he kuamuaum, a e aho no ia makou ia inoa, anoai paha o maona iho no hoi. Ua pololei ka oukou e i mai nei "he kii ino pupuka loa keia, a he kanaka ui maikai o Kamehameha I." Aka, he minamina makou i ko oukou hailuku ia mai me na huaolelo awaawa o ka pelapela, a e aho na makou e hoomanawanui ae, oiai, he kauwa no ko oukou mau pono.
—Ke haawi ia aku nei ka mahalo a me ke aloha maikai no i na makamaka hoomanao mai.
Nele i ke Kahua Kalaiolelo.
E KA LAHUI HAWAII;—Aloha oe:
He mea nui ia'u ka nupepa, a ua heluhelu mau au i kela a me keia pule i na nupepa Hawaii elua o keia mau la. He mea kupono no i ko'u noonoo ana, ke kalakalai olelo ana o na nupepa elua ma na mea e pili ana i kekahi ninau, no ka mea, ma ka hoike ia ana o na kulana o kela a me keia aoao, a ma na olelo hoakaka hoi, e hiki ana i ka mea heluhelu ke hoomaopopo iho i ke ano maoli o ke kumu ninau i hoala ia, a malaila oia e haku ai i kona noonoo a hooholo iho.
Nolaila ke manao nei au aole i hewa ke kalakalai ana o ia ano, oiai, o ke kulana ia o keia mea he nupepa, aka, hookahi mae a'u i manao ai he kupono ole, oia hoi ka ike ana o kahi aoao i kona eo, alaila hoomaka e hauhili mao a maanei me ka hapuku wale ana i na wahi opala mele lapuwale, me ka waiho mai imua o ka lehulehu ma ke ano he mau olelo hoakaka iho la ia no ka pono o kona aoao.
I ko ia manao aohe wahi pomaikai iki e loaa mai ana i ka mea heluhelu i na manao o ia ano; ina no e piha ana ka nupepa holookoa i na lalani mele o ia ano, alaila pehea iho la e hiki ai i ka mea heluhelu ke hoomaopopo iho i ka pono a me ka pono ole o kela a me keia ano?
Ua ala mai keia manao mahope iho o ka heluhelu ana i ke Kuokoa o ka pule i hala, oiai, o ka Lunahooponopono o KA LAHUI HAWAII ke kamailio mai ana iaia, aia nae kela i ke kahu Ekalesia o Kawaiahao e peku ai, me ka olelo ae "ua kupono ole iaia ke noho kahu no ia Ekalesia." No keaha la! Ua hewa io anei o Pareka? Ua hiki anei ke Kuokoa ke hooiaio mai i kana mea e hoike mai nei imua o ka lehulehu?
Aole! Ua nele i ke kahua kalaiolelo, ua papau ka noonoo o ua kanaka makua nei, a no ka ike i ke ano haiki i kahi kamalii, nolaila ia e lalama aku la i ke Kahu Ekalesia o Kawaiahao. I nahea nei la ke ku ana mai o Pareka i ka awai a kamailio mai i na mea pono ole, a i nahea nei hoi i hoopuka ai ka Lunahooponopono o KA LAHUI HAWAII ina olelo haumia? Na ka pepa hea la hoi i kapa i na makua Hawaii he holoholona? Ka ua nele i ke kahua ole. H. KANAKA.
Kou, Mei 12, 1875.