Ka Lahui Hawaii, Volume I, Number 21, 20 May 1875 — Page 4

Na Ekalesia o Kawaiahao a me Kaumakapili.

Halawai kakahiaka, la Sabati .... hora 10½
Halawai po ..... hora 7½
Halawai Apana auina la ..... hora 3½
Kula Sabati ..... hora 9½

NA KULA SABATI.
NA HAAWINA.
Iune 13—Makemake ia i alii.—I Samuela VIII: 4—9.

4 Alaila hoakoakoaia'e la na lunakahiko a pau o ka Iseraela, a hele mai io Samuela la ma Rama.
5 I mai la iaia, Aia hoi, ua elemakule oe, aole i hele kau mau keiki ma kuu aoao: ano e hoonoho oe i alii no makou, nana makou e hooponopono e like me na lahuikanaka a pau.
6 Ua hewa ia mea i ka manao o Samuela, i ka lakou i olelo mai ai, E haawi oe i alii no makou, nana makou e hooponopono. A pule aku la o Samuela ia Iehova.
7 I mai la o Iehova ia Samuela, E hoolohe oe i ka leo o na kanaka i na mea a pau a lakou e olelo mai ai ia oe: no ka mea, aole lakou i hoowahawaha ia oe, aka, ua hoowahawaha mai lakou ia'u, i alii ole ai au maluna o lakou.
8 E like me na hana a pau a lakou i hana'i, mai ka manawa a'u i lawe mai ai ia lakou mai Aigupita mai, a hiki i keia manawa, ia lakou i haalele ai ia'u, a malama aku i na akua e; pela lakou e hana nei ia oe.
9 Ano hoi, e hoolohe oe i ko lakou leo; aka, e olelo ikaika aku oe ia lakou, a e hoike aku hoi i ke ano o ke alii e alii ai maluna o lakou.
——:o:——
Ma keia mokuna e ike ai kakou i ko Samuela nawaliwali ana; ka hele hewa ana o kana mau keiki, a me ka hoonioni ana o ka lahui e imi i alii. Oia ka haawina no keia la—1. Noi lakou ia Samuela i alii, p. 4, 5. 2. Ninau o Samuela ia Iehov, p. 6.—3. Hoike ke Akua ia Samuela i kana mea e hana'i, me kona hoahewa aku ia lakou. p. 7. 8.—4. Hai aku ke Akua i ke ano o ke alii e alii ana maluna o lakou, p. 9—18. Ma keia haawina e ike lakou: I. Ka hoopii a ka lahui i ko lakou poo. Ua pouo ia mamua o ke kipi ana. Mahea o Samuela? II. Kaumaha o Samuela no ia mea, no ka mea, he hoino ia i ke Akua, ka mea e noho alii ana maluna o lakou. Nolaila pule oia. O ka hana pono ia ke kaumaha, a pilikia ka noonoo ana, e like me ko Samuela hana ana. E kokua ia no ka poe noi. III. Ao mai ke Akua ia Samuela. Aole e nele kona ao mai i ka poe imi iaia. Loaa ko lakou alii, ko ka makemake, aka, ua pilikia lakou iaia. Ua hookaumaha ia, pela no ka poe hookuli, a pale aku i ke Akua. E hana ana lakou i mea e poino ai no lakou iho. O ke Akua wale no ke alakai kupono. O Kristo ka hookele o na uhane e pono ai, aole ke kanaka.

Moolelo o ka Ahahui Ekalesia o Kauai.

Halawai ka Ahahui Ekalesia o Kauai maloko o ka luakini ma Anahola ma ka la 7 a me ka la 8 o Apr. 1875.
Koho ia o Rev. G. Puuloa i Luna Hoomalu, a o S. R. Hapuku i kokua Kakauolelo. Pule ka Lunahoomalu.
Eia na Lala i hiki mai:
KIHAPAI.   KAHU.  ELELE.
Waioli   Rev. A. Pali  A. Kahananui
Anahola   G. M. Keone, Haiolelo--G. B. Meheula
Lihue   Rev. G. Puuloa  S. R. Hapuku
Koloa   ——  E. W. Hailama
Waimea   ——  H. W. Kaluahi
Lala mau—Rev. J. W. Smith.
Na keiki o ka Aha—Z. Seta a me S. R. Hapuku.
Apo aku ka Aha, ia Rev. J. F. Pogue, J. Kauai a me Holi i mau Hoa Kuka no keia halawai.
Koho ia o Rev. J. F. Pogue, G. B. Meheula a me Kahananui i Komite Imihana; a o Rev. J. W. Smith, S. R. Hapuku a me G. M. Keone i Komite Imihana Haawina no ka halawai mahope aku.
Hoike mai ke Komite Imihana.
1 Hapalua hora haipule.
2 Hoike Kihapai.
3 Ke koho ana i Komite Kihapai, a me ke Komite Hoike Ahahui i ka Aha Nui ma Honolulu.
4 Na Palapala Hoopii.
5 Na Ekale sia Kahu ole.
6 Na mea e hala ae ai o na Ekalesia.
7 Heluhelu i na Haawina.
Malama ia ka hapalua hora haipule. Hoike Kihapai.
Heluhelu mai o Rev. A. Pali i ka hoike no ke kihapai o Waioli.
Heluhelu mai o Rev. G. Puuloa i kana palapala hoike no Lihue.
Heluhelu mai ke kokua kakauolelo i ka palapala hoike kihapai no Koloa, a me kekahi palapala aloha na ke kahu Ekalesia o Koloa, oiai aole oia i hiki mai no ka nawaliwali mai o ke kino.
Hooholo ia.—E mau aku no ke komite hoike mua o na kihapai o Kauai, a na ia komike no e hoike aku i ka Ahahui Nui ma Honolulu.
Koho ia o Rev. G. Puuloa i komite e hoike i na hana o keia Ahahui i ka Ahahui ma Honolulu.
Koho ia o S. R. Hapuku, H. W. Kaluahi a me A. Kahananui i mau Elele e hele i ka Ahahui Nui ma Honolulu—A o G. B. Meheula, A. W. Maioho a me H. Kahele na hope.
Hoopanee ia ka Aha a hoomaha 1 hora. Pule o Rev. A. Pali.
Hora 2 P. M.—Akoakoa hou mai ka Aha. Pule o A. Kahananui.
Na palapala hoopii ka hana i hapai ia.
Waiho mai o Rev. A. Pali imua o ka Aha i ka palapala a ka Ekalesia o Lahaina, Maui, e kahea ana iaia i kahu no lakou. Kamailio ko ka hale no ia mea, alaila, hooholo, e hookuu ia Rev. A. Pali mai keia Aha a e komo i ka Aha Lunakahiko o Maui, a na ke Kakauolelo mau o keia Aha e haawi aku i ka palapala hookuu.
Heluhelu ia ka palapala hoopii a na hoahanau o ka Ekalesia o Waimea. A kamailio loihi ka Aha, alaila, hoomoe ia ka palapala noi.
Ua koho ia o Rev. J. W. Smith, Rev. J. F. Pogue a me Rev. A. Pali i komite e ninaninau ia G. M. Keone no kona makaukau e lawelawe i ka oihana haiolelo. Hoopanee ia keia hana a ka la apopo.
Na Ekalesia kahu ole.
Kamailio loihi ka Aha no keia kumuhana e pili ana i ka Ekalesia o Waimea, alaila, hooholo ka Aha i keia olelo hooholo. Ke hoapono nei keia Aha i ka noho ana o J. Kauai i luna kiai no ka Ekalesia o Waimea a hiki i ka manawa e loaa ai ke kahu noho mau.
A no ka Ekalesia o Waioli, na na luna a me na hoahanau e malama a hiki i ka manawa e loaa ai ke kahu hou.
Hoopanee ia ka Aha a i ka la apopo hora 8½ A. M. Pule o H. W. Kaluahi.
Aperila 8, 1875.—Halawai hou ka Aha i ka hora i olelo ia. Malama ia ka hapalua hora haipule.
Heluhelu ia ka moolelo o ka la i hala. Apono ia.
Heluhelu mai o G. M. Keone i kana hoike no ke kihapai o Anahola a me Koolau; kokua mai ka elele.
Heluhelu mai o Kaluahi i kana hoike no ke kihapai o Waimea.
Ninaninau ia o G. M. Keone e ke komite, a ua apono ia. A ua ae ia ka haawi i ka paiapala ae haiolelo no na makahiki elua ma ka Ekalesia o Anahola a me Koolau.
Heluhelu ia na haawina.
Heluhelu mai o Rev. A. Pali i kona haawina. "Pehea e ulu hou ai na Ekalesia o ka Haku ma Kauai nei?"
Heluhelu mai o Seta i kona haawina. "Heaha la na pilikia e puka mai ana mawaena o na Ekalesia kahu ole?"
Heluhelu mai o G. M. Keone i kona haawina. "Heaha la na hua e akaka ai ua hanau hou ia ke kanaka?"
Heluhelu mai o S. R. Hapuku i kona haawina. "Heaha na pilikia o ka aie!"
Heluhelu mai o J. W. Smith i kona haawina. "Pehea la e malama pono ia ai na ohana o keia lahui a loaa ole ka mai pake?"
Heluhelu mai ka hope kakauolelo i ko Rev. J. H. Mahoe haawina. "Heaha na hana kupono e ao aku ai i na kaikamahine ma na kula kaikamahine?"
Kuka ka Aha no ka palapala hookuu o Rev. G. Puuloa mai ka Aha Lunakahiko o Maui mai a i ka Aha Ekalesia o Kauai. A ua apono ia.
Hoike mai ke komite imi haawina no ka halawai hou. A apono ia penei:
1 Heaha na hana kupono a na wahine iloko o ka Ekalesia? Rev. J. H. Mahoe.
2 Heaha na kumu e ulu ai ka makemake iloko o ka naau o na kanaka no ka pono i ke Akua? S. R. Hapuku.
3 E wehewehe ia I Ioane 5: 11. Rev. G. Puuloa.
4 He kuleana anei ko ke kahu Ekalesia iwaena o ka poe mai? G. M. Keone.
5 Heaha ka hewa o ka hula? Z. Seta.
6 Pehea e ike ai ke kanaka i ke Akua? Ioane 1: 18. Rev. J. W. Smith.
E mau aku no ko A. W. Maioho a me ko S. Kahookui mau haawina mua.
Hooholo ia e hoopanee i keia halawai a i ka malama o Okatoba 1875,—E halawai hou ma Koloa.
Koho ia o Rev. G. Puuloa i haiolelo no ia halawai, a o Rev. J. W. Smith kona hope.
Heluhelu ia ka moolelo. A apono ia.
Hoopanee ia ka halawai me ka pule a Rev. J. F. Pogue.  S. R. HAPUKU,
Kokua Kakauolelo.

Na Leta a na Makamaka.

          —Eia ma ko makou keena kan e Waiohinu, nona ke poo "Kulanui o Lahainaluna" a me "Na Lunakanawai Apana." He oiaio kau he kia hoomanao ia kula no ka poe i hoonaauao ia malaila, a he hana pono ole i na Lunakanawai Apana o kakou ka inu wai ona a me ka noho manuahi, oiai, ua hoonoho ia lakou i poe nana e hoopio i na hana hewa, a aole o ka hui pu ana ma ka hana i ka hewa. Ua pono oe e i mai la e hoopau ia na Lunakanawai oia ano. No ka piha loa o ka kakou pepa, ua hoomoe ia kau.
          —Ua loaa mai kau e J. B. Kahoohuli nona ke poo "Lili maoli." He hana ino io no ka lili, a he mea hooulu opu ino. Ke lana nei ko makou manao e nalo ana ia mea ma ka noho'na o na makamaka. Ua komo kahi waa, a haule kau i keia hana ana.
          —Ua heluhelu makou i kau e J. Pueikeanu, e pili ana i ke kii makana o ke Kuokoa. Ua pololei no oe, aole io no kanaka Hawaii i aloha i kona makua alii e ae ana e kapa ia na helehelena o kela kii o kona. No ka ike mua ia o ka huhu o ka mea nana ke kii, ke minamina nei makou o lilo mai no auanei oe he ino, nolaila, e hookaulua ae makou i kau.
          —Eia kau e Alpha Kekulaihaole me ke poo "Alia oe e Pulale ae!" no na mea e pili ana i ka ninau helu a J. E. Hart a me ka olelo pane a R. S, me ka haina a me na wehewehe ana. Ua mahalo ia kou noonoo paupauaho ole, aka, ua minamina makou, no ka mea, ua hala ka manawa, ua piha e ka pepa.
          Me ka mahalo piha i ka lokomaikai o keia mau makamaka, no ka hoomanao mai.

Na Haina o na Nane.

Ko ke ono—"Kawakawa a he Aku."
Ko ka hiku—"Kauhiokalani." A maloko o keia mau haina, e loaa no na mea e ae.  R. S.

HAINA O KA NANE EWALU.

Ewalu o'u mau hua—E hai mai e na pokii, owai la wau? Haina—O na hua ewalu, oia no na hua palapala o ka inoa kaulana o ko kakou Lani Moi KALAKAUA, he ewalu Ona mau hua. A o na hua helu malalo iho e loaa no mai keia inoa mai.
MA RIN.

Haina Nane, Ewalu.

Ewalu o'u mau hua. KALAKAUA. Oiaio no! Panai, e hai mai o Oahu.
Ewalu ona mau hua.
Kona 5 8 he mea e pono ai ka moku.
Kona 7 4 he mea e pono ai ka aina.
Kona 3 6 he mea e pono ai ka aina
Kona 4 7 he mea e pono ai ka moana.
Kona 6 2 he inoa manu, a makani.
Kona 1 7 he helu la.
Kona 8 3 6 he mea nemonemo.
Kona 4 2 2 lokomaikai, heahea.
Kona 1 7 4 he oka i mamaia.
Kona 6 8 5 4 he hoailona huhu.
Kona 5 8 3 6 he inoa no kekahi manu.
Kona 3 6 5 2 pau ke ahiu.
Kona 7 4 7 6 he maikai; aohe maikai.
Kona 4 2 3 8 he mea i makemake ia.
Kona 8 6 3 6 kekahi Apana o Honolulu.
Kona 7 8 3 4 he hua, a lau, he mea ai.
Kona 2 4 7 2 wahine.
Kona 3 8 3 4 7 ho-a-a ana.
Kona 3 6 8 7 2 4 3 6 he laau aala.
He kalae wale no Kalani. Owai la?
J.

MA RE.

Mei 1.—Ma keia Kaona, ua hoohui ia o Wm. Haalilio Jarrett jr., me Miss. Emma Stephens. Na Rev. Makua Helemano laua i mare.
Apr. 13.—Ma Kaunakakai, Molokai, mare ia e Rev. E. Kekoa o Maunu me Wahiawa.
Iulai 11, 1874.—Ma Kawela, Molokai, mare ia o John J. k., me Wahinemaikai w. Na Rev. E. Kekoa laua i hoohui.
Ap r. 7.—Ma Kaluaaha, Molokai, mare ia o Mano k., me Neau w. Na Rev. E. Kekoa laua i hoohui.
Au g. 30.--Ma Kaunakakai, M., ma re ia o Lai k. me Luukapu w. Na Rev. E Kekoa laua i hoohui.

HANAU.

Feb. 12, 1875. —Ma kaunakakai, Molokai, hanau o Z. Pali k., na Mr. Pahupu me Piipii.
Feb. 22, 1874. —Ma Kaluakoi, Molokai, hanau o Ema w., na Puhi me Aweka.
Ap r. 21.—Ma Palaau, Molokai, hanau o Puuonioni k., na Kaahiki me Makahuki.
Ap r. 25.—Ma Kawela, Molokai, hanau o Mataio k., na Mrs. Kaaihue.
Sept. 30. —Ma ia wahi no hanau o Mere w., na Lukela me Kino-aloha.

MAKE.

Ap r. 19, 1875.—Ma Ualapue, Molokai, make o Kawelo k.
Apr. 23.—Ma Kapuali, Molokai, make o Nutuna kane.
Apr. 28.—Ma Kaunakakai, M. make o Kualii w.
Ian. 1, 1874.—Ma Kawela, Molokai, make o Kaapuiki w.
Feb. 16. —Ma Kawela, M. make o Kaha w.
Feb. 18. —Ma Kauanakakai, M. make o Kalauli k.
Mei 25.—Ma Kawela, M. make o Pualiiole k.
D ek. 3.—Ma Kaunakakai, M. make o Makaluhiwahine.
Dek. 12. —Ma Kaunakakai, M. make o Wahilani k.

          OWAU O KA MEA NONA KA INOA MALAlo iho, ke papa loa aku nei au i na kanaka a pau, aole e ki i na manu maluna o kuu mau aina e waiho 'la ma Manoa.
21 4ts  FRANK METCALF, (Meka Opio.)

Laau Ola, Laau Ola.
AIA MA KAHI O
DILLINGHAM & CO.
KA LAAU KAULANA A
BISHOP SOULE!
HE LAAU HAMO MAIKAI KEIA!

a ua kaulana iwaena o ka poe nana i hoao; he mea e ola'i
Ka Hui, Lumakeke, Kikala-hanee, Mau-i, O a me na mai o ia mau ano.
UA HOAO IA KEIA LAAU A UA MAHALO nui ia. "He umikumamalua makahiki o ka oopa ana o kekahi mea, a i keia laau ua ola koke." Wahi hoi a kekahi, "He laau waiwai loa keia no ka hikiwawe o kona hoola ana." wahi hoi a kekahi, "Ua pau ko'u hoomaloka, ua hoao au i na laau e ae a pau, aole i ola kuu LUMAKEKE, he nui na makahiki o kuu kaa ana i ka eha, a i nei laau ua ola au, ola loa." Eia hou ka kekahi, "He nui na makahiki o ka waiho ana o kuu wahine ma kahi moe me ka mai, ua lapaau ia aole ola, a i ko maua lohe ana i keia laau kaulana, ua hoao ia, a ua ola koke ia iloko o na pule eono." E hoao ka poe mai i keia laau kaulana. Aia ma ka Halekuai o DILLINGHAM & Co., oia hoi ka hale o Kaimana.
Laau Kaulana
A KAUKA SUCH!
He laau e ola'i ke KUNU, ka eha o ka PUU, me ka HANO me na eha a pau e pili ana i ke AKEMAMA. Aia ma kahi o Dillingham & Co., ma ka Halekuai o Kaimana.
7-1 y