Ka Lahui Hawaii, Volume I, Number 28, 8 July 1875 — Page 3
Ke ano ili o ka Mahina no ka Malama o Iulai, 1875.
MANAWA NO HONOLULU.
[HOOMAKAUKAUIA E KAPENA D. SMITH.]
2 Mahina hou ..... 6 55.7 PM
9 Hapaha mua ..... 2 5.9 PM
18 Mahina piha ..... 2 54.6 AM
25 Hapaha hope ..... 10 7.8 AM
Ka puka me ka napoo ana o ka La.
1 Puka la...5 25.5 AM. ..... Napoo la...6 47.6 PM
8 Puka la...5 27.7 AM ..... Napoo la...6 41.7 PM
15 Puka la...5 30.6 AM ..... Napoo la...6 40.6 PM
22 Puka la...5 34. AM ..... Napoo la...6 38. PM
29 Puka la...5 36. AM ..... Napoo la...6 36. PM
31 Puka la...5 37. AM ..... Napoo la...6 35. PM
Ka Latitu me ka Lonitu o Honolulu.
Ma ka hale bele pauahi, Hale Kaawai Helu 2, a i ole ma ka Hale Kilo o Mr. Filtner, penei:
La titu 21° 18' 23" Akau. Lonitu 157° 48' 45" Kom.
No ka piha loa o ka kakou pepa o keia la, ua hookaulua ia he mau manao, a ua hoopokole pu ia ke kaao a keia pule ae.
Ma ke ahiahi Poalua nei, hora 8 P. M., ua hoonanea ae ka poe Puhi Ohe o ka manuwa Pensacola i ke anaina ma ka Hotele Hawaii.
Mailoko mai nei o kela Pule a komo wale i keia pule ka aaki hahana ana o ka wela a ka la, he oi aku keia a ke kau o ka wela nui wale.
E ahonui oukou e na makamaka e hookaa mai i ka auhau o ka kakou wahi pepa, oiai, o kona helu elua keia no kona hapa hope e puka aku nei.
O ke kula ao koa o Geremania ke hui pu ia me ko Bavaria i keia manawa, 31,830 poe alii koa, 1,329,600 kanaka, 315,970 lio, 2,700 kula a me 820 pu kuniahi nunui.
Ma ka noho ana o ke jure i ka Poakahi iho nei no ka ninaninau ana ia Kahalelepo no ke Karaima pepehi kanaka, ua hoopuka lakou i ka lakou olelo hooholo e ahewa ana iaia ua pepehi kanaka oia.
O ko kakou poe Puhi Ohe, ua hoolimalima ia e ka Ahahui Mele e puhi hele i kahi o kela a me keia hoa i kela a me keia po Poaha, a e puhi ana lakou i keia po ma kahi o ka Hon. Henere A. P. Kaaka (Hon. H. A. P. Carter.)
O ke Saba ti iho nei i hala, oia ka la a na puuwai Amerika i kapa ai ka la hanau o ko lakou manu Aeto, oia ka la 4 o Iulai o keia mahina e naue nei; no ke kaa ana i ke Sabati, ua malama ae kekahi poe i ka Poakahi ana ae.
Ma ka auina la Poaono aku nei, ua kii mai ka lima nui menemene ole o ka make ia Ilai Miki (Eli Meek,) kekahi keiki a Kapena Keoni Miki (Capt. John Meek) i make. Ua waiho iho mahope nei he wahine a he ohana nui e u ana nona.
MEA HOU! MEA HOU!!—Ke ao nei kekahi mea i hoonaauao piha ia ma Lahaina luna, i ka oihana lapaau Hawaii, malalo o ke alakai ana a kahi kanaka i like ole kana talena, me ka ua Lahainaluna la. Auwe ka hoolilo ia o ke kamaa i papale!
Ma ke ahiahi Poaono aku nei i hala, ua make emoole o Mr. B. R. Davidson, Luna Nui o ka Hale Pupule ma Kalaepohaku. Ua kau iho ko makou minamina maluna o kana wahine kanemake a me na keiki e u ana me na kanikau.
HOOLAA LUAKINI.—E hoolaa ia ana ka luakini o Koolaupoko ke hiki aku i ka la 29 o keia malama e naue nei, nolaila, ke kono ia aku nei oukou e na hoa paaua pu iloko o ka Haku, a me na makamaka i komohia e ke aloha e naue mai, e huki i ka hae o ka lanakila. J. KEKAHUNA.
Ma ka auina la Sabati iho nei, ia makou i maalo ae ai mawaho o ka puka o ka pa Alii, oiai ka puka e wehe hamama ana, komo aku la kekahi haole kamaaina, a he ike ana aku ka makou i ka lele o ke kuka i kahi e, unuunu mai ana na lima e hakaka me kekahi keonimana, e ku mai ana, a hoomaka iho la laua e kuikui; aole laua i menemene i ka laahia o ke Sabati a me ka maluhia o ka Moi; a oiai hoi e ku lomaloma ana ke koa kiai me ka lawe ole i ka mana i haawi ia iaia e malama i ka maluhia o ka pa Alii a me ke ola o ka Moi, ua ku wale aku no ia a nana; he mana kona e hoomalu i na haunaele o keia ano a me na ano like e ae i kona wa e ku kiai ana no ka manawa, aka, aole oia i lawe i kona ano he koa a hooko aku i kana oihana; e pono i mea wiwo ole a makaala ke malama i ka maluhia o ka Moi. Ua menemene makou i ka laahia o ke Sabati a me ke ola o ka Moi.
Ua hoea mai ka la 4 o Iulai, a ua malamaia na lealea ana e like me ka mea mau. Ua malama ia he anaina nui ma kahi noho o ke Kuhina noho Pierce o Amerika, a i ka hiki ana i ka hora 12 P. M., ua haawi ia na pa aloha mai ka manuwa Adimarala Pensacola, i pakuiia mai e ko Puowaina. Ua hoohanohanoia ka la ma ka puka ana'e o ka puali koa "Leleiohoku," malalo o ke alakai ponoi ana a ke Kapena Moi Kalakaua. Ua pii aku lakou ma Puowaina kahi i kipu poka ai, a ua nani a maikai maoli no ko lakou kulana ma ia la. Ua nui ka hololio mawaena o na Hawaii. He hulahula Europa kekahi i malama ia ma ka Hotele Hawaii ma ia po ana iho.
PAUMA MAHU.—Ma ka Poaono i hala aku nei, ua hoomaka ia ka pauma ana o ke kai o loko o ka moku pauahi Emerald me ka pauma mahu, i loaa mamuli o ka noonoo o Capt. Smith, (mea hana hau o Ainahou.) I ka naua aku i keia pauma, aole no o kana mai ua nui o ke kai ke luai mai ka waha; a pela mai no i ka Poakahi a po ia la o ka pauma ana, me ka haki pu no nae o na ohe hao e holo aku ai ka mahu mai ke kumu mai o ka mahu, oia hoi kahi enekini huki ukana, a ina aole ia mau haki liilii o ka la mua a me ko ka lua, ina no ua pau koke ke kai o loko o ka moku i ka la hookahi. I ka nana aku, kohu kahawai maoli ke kahe ana o ke kai, a o ka mua no hoi keia o ka pauma i ike ia maanei e hana ia'na, nolaila, e haawi ia ka mahalo i ka mea noonoo. Iloko o ka wa a na lehulehu e ku makaikai ana i keia mea hou, moku ae la kekahi ohewai, o ka puiwa ae la no ia o kekahi mau lio kauo kaa a me na kaa e ae, a hakihaki ka huila o ke kaa o Mr. G. Waller (kuai bipi.)
He Nane.
Mai ko'u 1—5, he mea ma ke ea malie ma ka ili o ka honua, i hookipa ia e na mea anuanu a pau loa e noho ana ma ka ili-honua.
Mai ko'u 3—5, ke kapa o kekahi alii wahine. A o ko'u 4, 6, pili i ke kanaka. A ina o ko'u 7, 8, e hookiekie ia i ka papa elua; alaila, he inoa no kekahi manu.
He moakaka wale no au. Aole au e kipa wale mai, ke ole e pau ke anu o kona ili (honua.) Ua kui lima pu ia e a'u na lau lipolipo o ka uka; ua hooipo ia hoi e a'u na pua nani o ka aina. A ua hoomaeele ia hoi e a'u na mea ola uhane a hanu pa hoi. Owai la au? KAHEHUNA.
HE MOOLELO KAAO
NO KE
KEIKI ALII NIEDA!
KA PUUWAI LIONA O KE AUPUNI O KONA
MAKUAKANE
KE ALII KA MOI LABODA!
A ME KE PIO ANA O KE
KUPUA GOGONA LAUOHO NAHESA!
He Nanea no na Au i Hala.—Helu 2.
I KA lohe ana o ke keiki alii Nieda i ke kauoha a ka Moi Poletese, ua hele koke aku la oia a hiki i kona hale alii, a pane aku la, "E ke 'lii ka Moi, ua makaukau au e hooko i kou makemake ke hiki," a kulou aku la ia me ka hoohaahaa.
"E ka opio maikai," wahi a ka Moi maalea, "ua hiki kou kulana i keia manawa i ko ke kanaka makua, ua loaa ia oe ka piha ike, ka ikaika o na lala a me ka manao koa; ua hoomaopopo paha oe i ka nui o ka'u mau hana 'loha i kau aku maluna ou a me kou makuahine, a me na pomaikai i loaa ia olua mai ko'u hoahanau lawaia, a me na makaainana o ko'u aupuni nei?"
"Ua iawa na hoike ana no ke aloha ou e ka Moi a me kou lahui, a no ia mea ke ku nei au he kanaka i aie nui i ko oukou mau lokomaikai piha," wahi a ka opio Nieda.
"Mamuli o kou noonoo maikai ana e kuu makamaka aloha, aole no paha oe e hoole ana i ka'u noi ano, oiai, ua ake nui oe e hoihoi mai i na hana aloha a ko'u lahui kanaka ia oe?" wahi a ka Moi.
"Mamua o ko'u lawe ana i ke noi e ka Moi," wahi a Nieda, "he mea pono paha ia'u ke noi haahaa'ku i kou oluolu e lohe mua'u i kou makemake, oiai, he mea hiki ole i ke kanaka ke hooko i ka mea maluna'e o kona kulana. Me ka hooia aku no nae, aole mana malalo iho o ka la e kaupale mai ia'u ina he mea hiki ke hooko ia kou makemake."
"Ano e hoolohe mai, a e lohe oei ka makemake o kou hoa'loha, a ua ike no au aohe mea e ae maloko mai o na poai o ko'u aupuni, o oe wale no e ke kanaka ui e ku hiehie mai nei imua o'u." Me ka mino aka henehene ka Moi i pane mai ai i keia, a i ko Nieda hookokoke ana mai, hoomau mai la oia i kana mau olelo me ka maaela nui, i ke apo ana mai o kona mau lima i ko Nieda a-i, nana hoa'loha'loha aku la, a me ke ano haalulu o ka leo, pane hou aku la, "he wahi huakai ka'u i manao ai e noi aku ia oe, a ua ike no oe, aole kumu e ae o kou wae ia ana'e mailoko mai o ka lehulehu o ko'u lahui ponoi nei, no ka mewa wale no, ua piha ko'u mau pepeiao me na lono nou, a ke hoike mai nei kou kulana imua o'u no ka oiaio o ia mau lono. E ike aua nei oe e kuu makamaka, mahope iho o ke kamilio a me ke kukakuka pu ana ua hooholo iho a me ko'u alo alii e male au i ke kaikamahine alii Hipodamia, a elike hoi me ke ano mau ma ko'u aupuni nei, e haawi makama ia oia me kekahi mea kaulana i lawe ia mai kekahi wahi mamao loa mai. Ua noonoo nui au ia makana i kupono no kekahi kaikamahine alii kiekie o kona kulana, a ua loaa ia'u ka mea kupono loa, a ua hooholo iho au oia ka'u makana e haawi aku ai i ke kaikamahine alii."
"He mea hiki anei ia'u ke kokua'ku ia oe e ke 'lii ma ka imi ana ia mea?" wahi a Nieda.
"He hiki no, ina ua like kou wiwo ole me na hoike'na a kou kulana," wahi a ka Moi. "O ka makana a'u i manao ai, oia no ke poo o ke kupua Gogona Medusa, me kona lauoho nahesa; a ke kau nui aku nei au mamuli ou, a ke noi pu aku nei no hoi i kou hooko koke ana, i hiki ai ia'u ke haawi koke aku imua o ke kaikamahine alii Hipodamia."
(Aole i pau.)
KUAI A KA LUNA HOOPONOPONO WAIWAI.
I KULIKE ai me ka olelo kauoha a ka Hon. C. C. Harris ke kokua Lunakanawai mua o ka Aha Kiekie, i hoopukaia ma ka la 27 o Mei, A. D. 1875, e haawi mai ana i ka mana ia'u J. K. Unauna, ka Lunahooponopono o ka waiwai o W. H. Kaauwai i make ma Honolulu, e kuai ma ke kudala i kekahi mau aina o ka mea make, nolaila, owau o ka mea nona ka inoa malalo iho, e kuai kudala aku no au ma ke akea, ma
Ka la 7 o Aug., 1875, ma ka hora 12
Ma ka Hale Kuai
o Mossman ma ke kulanakauhale o Wailuku i Maui, i na pono, ke kuleana a me na pomaikai o ka ma i make iloko o ka Ili aina nona ka inoa Papohaku, e waiho ia ma Wailuku, Maui, nona na apana eha malalo iho:
1 APANA. 2 kaulahaoa a me 4 anana kuea
2 " 1 eka a me 1 kaulahao kuea
3 " 1½ eka.
4 " 14 eka, 8 kaulahao a me 100 anana kuea.
A pela no hoi iloko o na aina e waiho la ma Halaula, Wailuku, Maui, i haiia maluna, oia he 15 apana.
APANA 1 he 31 Roda kuea.
" 2 he 30 " ".
" 3 he 24 " ".
" 4 he 1 eka a me 15 Roda kuea.
" 5 he 1 Ruda a me 31 ".
" 6 he 5 ".
" 7 he 1 Ruda
" 8 he 3 eka 1 Ruda 38 Roda.
" 9 he 3 Ruda 36 roda.
" 11 he 2 ruda 6 roda
" 12 he 1 ruda 35 roda
" 13 he 29 roda
" 14 he 3 ruda 32 roda
" 15 he 3 eka 1 ruda 9 roda.
A ME kekahi aina e waiho la ma Paiki, Maui. O ka apana 1 he 5 26—100 ka eka nui, a o ka apana 2, he 15 1—25 eka.
A ME ka pono, ke kuleana a me na pomaikai o ka mea i make iloko o na apana aina i hoakakaia na palena ma ka Palapala Sila Nui helu 2629, oia na apana aina i hooliloia i ka mea i make, e George K. Kaauwai, kona kaikaina, e na hooilina o Naleipuleho ma kekahi palapala, a ua hookomo ia ma ka buke 41 o ke aupuni a ma na aoao 453 a me 454, o ka apana mua, he 1 18—100 eka, aia ma Halaula i Wailuku i olelo mua ia, o ka apana alua, he 3 36—100 eka, aia i Puako, Wailuku, a o ke kolu, he 23—100 eka, ke waiho la ma ia wahi hookahi no, a o ka ha, 1/10 eka.
A ME na pono a pau, ke kuleana a me na pomaikai o ka mea i make i loaa mai a A. Pepe a me Kaumi mai, kana wahine, iloko o ka aina i kuhikuhiia ma ka Palapala a na Komisina Hoona Kuleana Aina, helu 515 nona ka 35—100 o ka eka, maloko o ke kulanakauhale o Wailuku.
O na aina a pau kekahi e waiho la ma Maalaea, Kula, Maui, i hoakaka ia ma ka palapala hooko kuleana a na Komisina hooko kuleana aina, helu 2383, he 6 3—100 eka ka nui, ia Z. Kaauwai, a me kekahi aina pu e waiho la ma Waiakoa, Kula, Maui, i hoakaka ia ma ka palapala hooko kuleana a na Komisina hooko kuleana aina, helu 2383, he 1½ eka ka nui.
A E kuai hou aku no au ma ke kudala, ma ka Hale Hookolokolo ma ke kulanakauhale o Lahaina ma ka
Poaono la 3 o Iulai hora 12 awakea,
i na pono a me na pomaikai o ka mea i make, i na apana alua e waiho la iloko o ke Ahupuaa o PAEOHI, a me PUUNOA ma Lahaina, Maui; o ka apana mua, 1 eka me37 roda kuea; o ka apana 2, ka Ili o Walie, nona ka ili he 2 eka 2 ruda 13 roda; ka apana akolu, he 1 ruda a me 20 roda; ka apana aha, he 2 ruda a me 34 roda.
A ME KEKAHI mau loi me ka aina kula maloko o ke Ahupuaa o Paeohi ma Lahaina, nona ka ili, he 2 eka 1 ruda a me 4 roda.
A ME ka pono, ke kuleana a me na pomaikai o ka mea make iloko o na Ili o Kamani a me Kaluaaha ma ke Ahupuaa o Olowalu e kokoke la i Lahaina; o ka mua he 2 eka 3 ruda a me 36 roda; a o ka lua, he 3 eka 1 ruda 22 roda.
No na Kii a me na mea i koe o ka aina, e ikeia no ma ke Keena o ke Kakauolelo o ka Aha Kiekie mai keia wa aku a hiki i ka la 12 o Iune, a mahope aku o ia wa, e ikeia no ma ka Hale Kuai o Mossman ma Wailuku; a ma ke Keena o ke Kiaaina ma Lahaina, Maui.
Aia wale no ka lilo o kela mau aina a apono mai ka Aha Kiekie ma ka Hale Hookolokolo ma Honolulu, ke hiki aku i ka la 8 o Iulai A. D. 1875 ma ka hora 10 kakahiaka, oia kahi hoi a ka poe a pau i kuleana e hoike mai ai ia lakou iho.
J. K. UNAUNA.
Luna Hooponopono Waiwai o W. H. Kaauwai i make.
Honolulu, Iune 4, 1875. 705 8ts 712
WIL DER & CO.,
(WAILA MA.)
AIA MA KE KIHI O
ALANUI PAPU ME MOIWAHINE!
Ua hoolako mau ia me ke kuai ana aku i na
Papa me na Lako Kukulu Hale
O NA ANO A PAU.
NA PANI PUKA!
PUKAANIANI,
OLEPELEPE,
LAKA,
AMI-LIILII,
AMI-LOLOA.
PENA o na ano a pau,
AILA PENA,
VANIKI, &c.
Na Balaki Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna ae e kuai makepono loa ia aku no ke DALA KUIKE. 7-1y
LEWE RS & DICKSON
(O LUI MA.)
MEA KUAI PAPA A LAKO KUKULU HALE o na ano a pau.
AIA MA KE
Alanui Papu a me Alanui Moi
E LOAA AI NA
Pani Puka,
Puka Aniani,
Olepelepe,
Laka,
Ami Liilii,
Ami Loloa, & c.
PENA o na ano a pau,
Aila Pena,
Vaniki, &c.
NA BALAKI me PUNA
NA PEPA HALE me na LIPINE HALE.
O na mea a pau maluna ae, e kaui makepono loa
14] ia aku no ke DALA KUIKE. [1y
OLELO HOOLAHA!
OWAU O KA MEA NONA KA INOA MALAlo iho, ke papa loa aku nei au i na kanaka a pau, aole e ki i na manu maluna o kuu mau aina e waiho 'la ma Manoa.
21 4ts FRANK METCALF, (Meka Opio.)
OLELO HOOLAHA!
E IKE AUANEI NA ANO KANAKA A PAU, owau o ka mea nona ka inoa malalo iho nei, ke papa aku nei au i na mea holoholona a pau mai hookuu wale ma kuu aina e waiho la ma Pawaakai ma ke kihi o alanui Moi me Waikiki; o ka puaa, lio, bipi, a me na ano holoholona e ae. O ka poe e kue ana i keia me ka hookuu wale i na holoholona, he mana ko ka Luna a'u i hookohu aku ai e hooku i Hookahi Dala no ka puaa, a i Elima Dala pakahi no ke poo o ke bipi me ka lio. E lilo keia i Kanawai mai kona la e puka ai ma ka LAHUI HAWAII. MARAEA II BROWN.
Honolulu, Iulai 7, 1875. 28 2ts 29
Olelo Hoolaha.
EIA MA KA HALEKUAI O E. O. HALL, KEKAHI Pila Maikai. Ewalu Papawalu. He pila kupono loa keia no ka hale pule, a hale kula paha. He pono o hele ae ka poe makemake pila ilaila e nana ai. He oluolu hoi ke kumukuai.
20-1 ts.
G. WEST!
HALE HANA KAA HOLO LEALEA ME na kaa hali ukana. E hana hou ia no ho na kaa nahaha no ka uku oluolu. E kapiliia n kapuai lio, no ka uku kupono. Ma ka hale hana mua o Mr. Benfield, ma ke Alanui Alii. 7-1y
OLELO HOOLAHA!!
OWAU O KA MEA NONA KA INOA MA LALO iho, ke makemake nei au i mau kanaka ui a ikaika hoi i ka hana a me ka malama ana paha i ka Aina Loi Kalo. Ua makemake ia kela me keia mea e naue mai, a e loaa no au ma kuu Rumi Hana ma kai iho o ka Hale Kauka o Minuteole (Dr. Stangenwald) ma ke Alanui Papu, Helu 31. Oia hoi ka Rumi Loio o ka EUEU O SIDANE. E hoomanao ae ka lehulehu, mai Hawaii a Kauai o ka Makana Mua keia no ke Kuikahi Panailike.
Owau iho no me ka Haahaa.
12-4 ts. FRANK METCALF.