Ka Lahui Hawaii, Volume I, Number 40, 30 September 1875 — Page 4
Na Ekalesia o Kawaiahao a me Kaumakapili.
Halawai kakahiaka, la Sabati .... hora 10½
Halawai po ..... hora 7½
Halawai Apana auina la ..... hora 3½
Kula Sabati ..... hora 9½
NA KULA SABATI.
NA HAAWINA.
O ct. 17—Na wahi noho he nui loa—IoaneXIV : 1—7.
1 Mai hookaumahaia ko oukou naau : e manaoio oukou i ke Akua, e manaoio mai hoi ia'u.
2 Ma ka hale o ko'u Makua he nui loa na wahi e noho ai : ina aole pela, ina ua hai aku au ia oukou. Ke hele aku nei au e hoomakaukau i wahi no oukou.
3 Ina e hele au a hoomakaukau i wahi no oukou, e hoi hou mai no wau, a e lawe ia oukou io'u la, i noho ai oukou kekahi ma ko'u wahi e noho ai.
4 Ua ike oukou i ko'u wahi e hele ai, ua ike hoi oukou i ke ala.
5 Olelo aku la o Toma ia ia, E ka Haku, aole o makou ike i kou wahi e hele ai ; a pehea la e hiki ai ia makou ke ike i ke ala?
6 Olelo mai la o Iesu ia ia, Owau no ke ala, a me ka oiaio, a me ke ola : aole kekahi e hiki i ka Makua, ke hele ole ia ma o'u nei.
7 Ina ua ike oukou ia'u, ina ua ike no hoi oukou i ko'u Makua : a mai keia wa aku e ike oukou ia ia, a e nana oukou ia ia.
———:o:———
P. 1. Mahea Iesu me ona mau haumana ma keia kamailio ana? Ua haalele anei lakou i ke keena ahaaina? Ma ka ahaaina ana ua hoopuka Iesu i kekahi mau huaolelo hookaumaha i ka naau o na haumana, heaha ia mau olelo? Mokuna 13:21, 33, 37, 38. No ia kaumaha, ua hoopuka Iesu i kekahi mau huaolelo hooluolu ia lakou, heaha ia mau olelo? Mahope iho hoi kekahi mau olelo like, p. 15—19, 23, 26, 27. E manaoio i ke Akua, a ia wai? Heaha ke ano? E paulele, e hilinai maluna o ka Makua, a maluna hoi o'u, e kau i na kaumaha maluna o maua, a na maua e lawe aku a hoomaha mai. Ke Akua, Iesu, ua like anei laua.
P. 2. Heaha kekahi mau olelo hooluolu? Ka hale o ka Makua, mahea ia? 2 Kor. 5:1. Ka lani ehia keia? Heaha malaila? Na wahi noho he nui loa, heaha ke ano? Ua like ka lani me kekahi hale nui nona na keena, na rumi liilii he nui wale, a piha i na lako kupono a pau. Na hoku anei kekahi o ia mau wahi noho? Ua like pu anei ka nani o kela me keia wahi noho? Malama ua like ole. Nani loa paha na keena no ka papa I o ka poe pono, a emi iho ka nani o na keena no ka papa II, III, IV. Ane olohelohe na keena no ka papa IV, oia ka poe hana uuku, lalau pinepine, pakele mahunehune i ka make, ano komo ole i ka lani, e like paha me ka nui o na hoahanau Hawaii. Ane pili ko lakou mau keena i ka lua'hi, ola no nae ma ka uwao ana o Iesu.
P. 3. E hele e ana Iesu i hea? e aha? Hoohalike Iesu iaia iho me ke kane mare i hele e e hoomakaukau i wahi noho, a paa a maikai, alaila kii a hoihoi i ka wahine mare ilaila. Ua hemahema a lako ole anei ka lani mamua? Aole paha, Mat. 25:34. He olelo hoohalike wale no; aka nae, he mau hana ka Iesu e hana e ana i hiki i na haumana ke komo iloko o ka lani, heaha ia mau hana? Ko Iesu hoi hou ana mai e kii a lawe i na haumana i kona wahi ma ka lani, heaha ia? E kii kino mai anei oia? Ahea hoi? No ka wa make paha ia, a na ka uhane o Iesu, a na kona mau anela paha ke kii mai i na uhane o ka poe pono e lawe aku i ka lani.
P. 4. Heaha ka Ie su haina no na haumana? Ma ke aha ko lakou ike ana i ko Iesu wahi e hele aku ana, a me ke ala e hiki aku ai ilaila? Ma kona ao ana, kuhikuhi ana. Ua olelo lakou mamua, o Iesu
no ka Mesia. Ua lohe hoi ma ka waha o Iesu, oia ke ala hou ana, &c.
P. 5. Heaha ka na haumana i hoole ai? Malama o Toma wale no ka i ike ole.
P. 6. Hai paanaau mai i keia pauku. Heaha Iesu? Heaha ka i hooleia? Ina e manao kekahi e hele i ka Makua, e hele hoi i ka lani ma ka mea e, aole ma o Iesu la, hiki anei? Aole loa. O Iesu wale no ka mea uwao.
P. 7. Ka haina o Iesu ma keia pauku, heaha? Ua akaka, Iesu, ka Makua, ua like laua. Pohihihi keia i na haumana mamua, e pau ana nae ia pohihihi mahope iho.
1 Na manao pili.—Ina e kaumaha na haipule, e kau i na kaumaha maluna o Iesu a nana e lawe aku.
2. Aia maluna na home paa o ka poe pono? E lana mau ka manao, e iini, e hooikaika a e kanu ia mau home. E makau o loaa ole no ka palaka a hana ole.
3. Hookahi wale no ala oiaio e hiki aku ai i ke ola mau loa, oia hoi o Iesu, o ka hoopili mau, malama mau iaia. Hoolalau na ala e ae a pau, a alakai aku i ka make mau loa.
Ka Moolelo o ka Ahahui Euanelio o Hawaii Komohana.
Halawai ka Ahahui Euanelio o Hawaii Komohana ma Mokuaikaua, Kailua, Kona Akau i ka la 8, 9 a me 10 o Sepatemaba, 1875. Haiolelo ka Lunahoomalu mua o S. W. Makaike ma Hosea 10:12.
Na lala o na Ekalesia, na Kahu a me na Elele . Kekaha o Rev. G. P. Kaonohimaka, Poheepali elele; Kailua a me Helani, Rev. J. Waiamau, Meemii me Kaawale na elele ; Konawaena, Makaike haiolelo, Hoomainoia elele ; Kealakekua, Rev. S. W. Papaula, W. Kaholoaa elele ; Pukaana, S. Palea haiolelo, Keomau elele ; Kapalilua, J. Waiau, J. W. Kuaimoku elele ; Waiohinu aohe kahu a me elele.
Kohoia o Rev. G. P. Kaonohimaka i Lunahoomalu, a o S. W. Papaula i Kakauolelo.
Kohoia na komite.—Komite Imihana, J. F. Pogue, J. Waiamau, J. Waiau.
Komite Imihaawina—Waiamau, Papaula, Poheepali.
Komi te o na Hoalala—Kuaimoku, Kaholoaa, Meemii. Noiia mai e hoomaha ka aha i hookahi hora, aponoia. Pule o Kauwale.
Hoomaha a pau, hoike mai ke Komite Imihana i keia mau Kumuhana.
1. Hapalua hora haipule i kela la i keia la. 2. Kula Kaikamahine. 3. Na lala o keia Aha mahea lakou? 4. Kinai ana i ka ona. 5. Hoike Kihapai. 6. Ka nupepa Ka Lahui Hawaii . 7. Na Ekalesia kahu ole. 8. Na palapala hoopii. 9. Na Oihana Misionari Kuloko. 10. Kula Kahunapule, aponoia ka hoike a ke Komite.
Hapaiia ke Kumumanao 2. A na J. F. Pogue i heluhelu mai i ka hoike a ka Puuku no na dala loaa mai na Ekalesia mai o na Ahahui 3 a me ka poe e ae i kokua mai no keia Kula, ua hiki aku ma kahi o na tausani eha a oi aku, a heluhelu ia mai no hoi ka moolelo oia kula mai ka hookumu ana. A he mea i koe no na dala 500 ia C. Bona no na loina a me na rula. A kohoia i komite, o Manase, Waiamau, Waiau.
Hapaiia ke Kumumanao 3. Kamailio ka aha a kohoia i komite Waiamau, Meemii, Kauwale.
Hapaiia ke Kumumanao 4. A ua wehe akea ia ka hale e kamailio ma keia Kumu, a ua nui ke kamailio ana, a ua lohe pono ka aha i ko S. K. Kaai haalele oiaio ana i ka inu ana i ka rama a me na mea ona e ae : a hoike ia mai he olelo hooholo penei :
Hooholoia—no ka mea., ua maopopo lea he mea e poino ai keia lahui ka inu ana i na mea ona, nolaila, ke hooholo nei keia aha penei:
1. Ke mahalo aku nei keia Aha i ko ka Moi kue ana i na mea ona.
2. Ke nonoi haahaa aku nei keia Aha i ka Moi e kapae ae mai ka oihana luna aupuni i na mea a pau, nona ka inu ana i na mea ona a ona.
3. Ke paipai aku nei keia Aha i na hoa hui pale i na waiona, na Hoahanau, na Luna a me na Kahu Ekalesia, e makaala a e imi ikaika i na mea e hoopio ai i keia enemi o keia lahui Hawaii a kakou i aloha nui ai, aponoia ka olelo hooholo. Hoopaneeia. Pule o S. W. Papaula.
LA HANA 2—POAHA 9.
Halawai hou ka Aha i ka hora 2 P. M. Noi mai o J. F. Pogue e hookuu aku keia Aha iaia a i ka Ahahui Lunakahiko o na Mokupuni o Maui, kamailio iki ka aha. Noiia mai e waiho ma ka papa a hiki i ka manawa kupono.
Hoike a ke komite no ke Kula Kaikamahine o ka Mokupuni o Hawaii ma Kohala.
Ua noonoo akahele ko oukou komite i ka hoike a ke poo o ke kula no na mea e pili ana i na dala loaa a me na lilo. A ua ike pu hoi i ka manao o ke poo a me ke kumu o ke kula e waiho aku i ka malama ana i ke kula, nolaila ma ka manao o keia Aha i hooholoia penei :
1. E hoomau ia'ku ka noho poo ana o Rev. E. Bona a me Miss E. Laiana i kumu no ke kula me ka manao ole i na keakea me ka oiaio ole.
2. Ke mahalo aku nei keia Aha i ke poo o ke kula no kona malama pololei ana i kana oihana. MANASE,
WAIAMAU, Komite .
WAIAU.
Aponoia ka hoike a ke komite, hapaiia na palapala hoopii. Heluhelu mai ke Kakauolelo he mau palapala eha. 1. No Pukaana. 2. No Kealakekua. 3. Konawaena. 4. Kailua me Helani.
Kohoia i mau komite no keia mau palapala, oia ka palapala o Pukaana, Konawaena, Kailua me Helani, a o Kealakekua na ka Aha e noonoo, ua aponoia. A penei ka olelo hooholo no ka palapala o Kealakekua.
Ua nana ka Aha i ka palapala kahea o ka Ekalesia o Kealakekua ia Rev. S. W. Papaula a ua manao lakou he mea ole ia palapala kahea no keia kumu.
1. Aole lakou i hoolohe i ka olelo hooholo a keia Aha e pili ana i na palapala kahea. Hooholoia . Nolaila, ke ao aku nei keia Aha i ka Ekalesia o Kealakekua, e noho lakou malalo o ka palapala kahea mua, a e kokua hooluolu a hoolohe i ko lakou kahu iloko o ka Haku.
Hapaiia na hoike kihapai a pau, a heluheluia ka hoike a ke komite no na palapala hoopii.
Akahi . No ka palapala mai ka Ekalesia mai o Pukaana e kahea ana ia Rev. S. C. Luhiau i kahu no lakou. I ka ike ana o ko oukou komite, aole he palapala keia i pili i ka aha, aka, e kahea pololei ana ia S. C. Luhiau i kahu no lakou. Nolaila, ke hoike nei ko oukou komite, he pono e hoouna pololei ia keia palapala ia Rev. S. C. Luhiau.
Alua . No ka palapala hoopii mai ka Ekalesia o Konawaena, ma ka manao o ke komite, aole pololei keia palapala, no ka mea, aole i hanaia malalo o ka rula i hoike ia, oia hoi, aole i hooiaio ia e kekahi Kahu Ekalesia.
Akolu . No ka palapala hoopii mai ka Ekalesia o Kailua me Helani, e noi ana e hoohuiia i hookahi ekalesia. Ke apono nei ko oukou komite i ke noi malalo o keia mau kumu.
1. Ua ae like na Ekalesia elua e hoohui malalo o kekahi kumu kupono.
2. O keia hana he mea ia e pono loa ai ia mau Ekalesia ma keia hope aku.
Noi mai o J. F. Pogue e hookuu iaia mai keia aha, a i ka Ahahui o Hawaii Hikina, ua aponoia.
Hapaiia na ekalesia Kahu ole o Kapalilua, Pukaana a me Waiohinu.
Hoike mai o J. F. Pogue, e nana i na ekalesia Kahu ole he 14.
Hoike mai o Waiamau, e nana ia Waiohinu, a e hoouna o Pogue i komite e launa aku me Rev. J. Kahuila, a hoike mai ma ka palapala i ka Lunahoomalu, ina ua ola, a na ka Lahui Hawaii e kahea i halawai kuikawa, ua aponoia.
Hoike mai o Waiamau, e kohoia i komite e malama aku i na ekalesia Kahu ole ma na ahaaina a ka Haku. Kohoia o Manase, nana e malama i ka ekalesia o Kapalilua me Waiohinu, o Paris hoi ia Kona waena, ua aponoia. Hoopanee ka hana a ka la apopo.
LAHANA 3—POALIMA 10.
Halawai hou keia Aha i ka hora i hoopanee ia. Hapaiia ke koena o na hoike kihapai.
Na Waiamau i heluhelu mai no ke kihapai o Kailua me Helani. Noi mai o S. Makaike e noonoo hou ia ka hoike a ke komite no na ekalesia elua o Kailua me Helani, ua aponoia. A ua noiia e heluhelu ia ka pauku 3 o ke Kumukanawai, a ua heluhelu ia. A hooholoia, ke apono nei keia aha i ke noi no ka manawa a hiki i ka hui hou ana o keia Aha.
Hapaiia ke Kula Kahunapule, a pau ia, hoike mai o Waiamau o kela keiki mua o Kivini, ua pau kona keiki ana na ka Aha.
Hapaiia ka nupepa Ka Lahui Hawaii , hoike mai ka Lunahoomalu i ka uku o ka nupepa me ka paipai ana i na Kahu e hooikaika ma ko lakou mau kihapai, a he olelo hooholo. Hooholoia .—Ma ka manao o keia Aha, ke apono nei i ka nupepa Ka Lahui Hawaii , e hoomahuahua ae i kona kino e like me ka nupepa Kuokoa , a o na Kahu, na Haiolelo, na Luna Ekalesia, na Luna o keia nupepa, ua aponoia.
Hapai ia ka noonoo ana no J. Waiau, e hoomau ia no kona noho haiolelo ana no kela kihapai no Kapalilua; a hiki i ka halawai hou ana o keia Aha. A ke paipai nei keia Aha i kela Ekalesia e hanai pono i ko lakou Kahu haiolelo i ka mea kupono, a me ko Manase paipai pu ana no keia hana, ua aponoia.
Olelo Hooholo .—Ke haawi aku nei keia Aha i ko lakou mahalo i ka Ekalesia o Kailua, no ko lakou kokua ana ma na mea e pono ai ke kino, ua aponoia.
Noi ia mai e heluhelu ia mai ka Moolelo, a ua heluhelu ia. Apono ia. E hoouna i ka Moolelo e pai ia ma ka nupepa LAHUI HAWAII. Ua Apono ia.
Noi mai o J. Waiamau, aia a hoopanee ia keia halawai, alaila, e halawai ma Pukaana, i ka malama o Maraki, hora 10 o ke kakahiaka, A. D. 1876. Me ka hoike o na Kula Sabati ia manawa. Ua Apono ia.
Hookuu keia Aha me ka Himeni 4, a me ka Pule a J. Waiamau.
G . W. PAPAULA,
Kakauolelo.
Napoopoo, Kona H. H., Sept. 23, 1875.
MA RE.
KAHELEKULA—KEKIPI—Ma Kaalaa, Sept. 2, mareia e H. H. Pareka o Kahelekula k., me Kekipi w.
KEALIIKUHALAHALA—MAKAIWI—Ma Kawaiahao, Sept. 7, mareia e H. H. Pareka o Kealiikuhalahala k., me Makaiwi w.
POHAKU—NAMAIELUA—Ma Kawaiahao, Sept. 7, mareia e H. H. Pareka o Pohaku k. me Namaielua w.
ALLEN—NAPELA—Ma Auwaiolimu, Sept. 25, mareia e H. H. Pareka o William Allen k, me Luka Napela w.
PANAEWA—KAANAANA—Ma Kawaiahao, Sept. 25, mareia e H. H. Pareka o Panaewa k, me Kaanaana w., no Hana, Maui, mamua.
HOAPILI—MAAIKINI—Ma Kawaiahao, Sept. 28, mareia e H. H. Pareka o John Hoapili k, me Maaikini w.
WAIHINANO—PILIKAI—Ma Kawaiahao, Sept. 28, mareia e H. H. Pareka o John Waihinano k., me Pilikai w.
HANAU.
Na Hanau o Molokai—Sept. 19, ma Kaunakakai, hanau o Kalahikiola w., na Jos. Koa k., me Hihilani w. Sept. 21, ma Kawela, hanau o Nadana k. na Hoopii k., me Kaaihue w. Sept. 22, ma Palaau, hanau o Kiniakekua w., me Kalalaniakua w., he mau mahoe, na Kiekie k., me Aimoku w.
MAKE.
Na Make o Molokai—Sept. 5, ma Kaunakakai, make o Kekua k. Sept. 7, ma Ualapue, make o Keoni k. Sept. 11, ma Kumueli, make o Poaimoku k. Sept. 22, ma Ualapue, make o Kahoohuli w. Sept. 26, ma Kaunakakai make o Kamoku w. Sept. 18, ma Kalaupapa, make o Nunumea k.
Sept. 15 —Ma Kapalama, Oahu, make o Nunumea k.